Vlorë
Vijon puna nga Komisariati i Policisë Vlorë, për goditjen e veprimtarisë kriminale në fushën e vjedhjes së pronës dhe pasurisë.
Vodhi një shumë parash në një lokal ku ka qenë i punësuar, identifikohet dhe arrestohet 17-vjeçari.
Specialistët për Hetimin e Krimeve të Komisariatit të Policisë Vlorë, pas marrjes së njoftimit se në një lokal në bulevardin “Ismail Qemali” ishte vjedhur një shumë parash, organizuan menjëherë punën për identifikimin dhe kapjen e autorit. Si rezultat i veprimeve hetimore të kryera pas administrimit të pamjeve filmike, bazuar dhe në informacionet e siguruara në rrugë operative, u bë i mundur identifikimi dhe arrestimi i një 17-vjeçari, autori i dyshuar për këtë rast.
Nga hetimet rezultoi se ky shtetas, gjatë natës, ka vjedhur 80 000 lekë, në një lokal ku ka qenë i punësuar, duke përdorur një kopje çelësi që e kishte siguruar më parë.
Shërbimet e Policisë gjetën dhe sekuestruan shumën e parave të vjedhur në lokal, si dhe çelësin e përdorur nga 17-vjeçari.
Materialet procedurale i kaluan Prokurorisë, për veprime të mëtejshme.