Fier
Policia e Fierit godet një tjetër rast të veprimtarisë kriminale në fushën e shpërndarjes së drogave të forta në doza të vogla.
Sekuestrohet një sasi lëndë narkotike heroinë e ndarë në doza, vihen në pranga babë e bir që posedonin lëndën narkotike dhe e shpërndanin atë në doza në qytetin e Fierit.
Gjithashtu, vihen në pranga edhe 2 shtetas të tjerë për vepra të ndryshme penale.
•Në vijim të punës për goditjen e veprimtarisë kriminale të shpërndarjes së drogave të forta në doza, në bazë të informacioneve të marra në rrugë policore për dy shtetas që merreshin me shpërndarjen e lëndëve narkotike në qytetin e Fierit, është organizuar puna për goditjen dhe dokumentimin ligjor të kësaj veprimtarie kriminale.
Specialistët për Hetimin e Narkotikëve në bashkëpunim me Forcën Operacionale në DVP Fier, në lagjen “Sheq i Madh” Fier, kapën me një sasi lëndë narkotike e dyshuar heroinë e ndarë në doza gati për shitje, shtetasin Medjon Karamani (Sulko), 26 vjeç, banues në Bitaj, Kolonjë, Lushnjë.
Gjithashtu, në vijim të veprimeve operacionale, u kap në flagrancë në banesën e tij në fshatin Bitaj, edhe shtetasi Mario(Barjam) Karamani, 56 vjeç, me një sasi lëndë narkotike e dyshuar heroinë e gatshme për t’u shitur.
Në përfundim të veprimeve u bë arrestimi në flagrancë i këtyre shtetasve për veprat penale “Prodhimi dhe shitja e narkotikëve” e kryer në bashkëpunim “Nxitja për përdorimin e drogës” dhe “Vjedhja”.
Në cilësinë e provës materiale u sekuestrua lënda narkotike e dyshuar heroinë, një automjet tip “BMW”, 4 aparate celularë, si dhe 4 palë targa të automjeteve të ndryshme të dyshuara të vjedhura.
•Specialistët për Hetimin e Krimeve në Komisariatin e Policisë Fier arrestuan në flagrancë shtetasin B. K., 36 vjeç, banues në fshatin Sheq Marinëz, Fier, pasi në fshatin Sheq Marinëz, në dyqanin në pronësi të shtetasit E. G., 51 vjeç, pas një konflikti për motive të dobëta i ka shkatërruar sendet në dyqan dhe ka tentuar ta godasë me mjetë prerës (thikë), e cila u sekuestrua në cilësinë e provës materiale.
Po nga këto struktura, u arrestua për veprën penale “Përndjekja”, shtetasi Dh. (E). D., 34 vjeç, pasi në mënyrë të vazhdueshme ka përndjekur një shtetase 37 vjeçe.
Materialet i kaluan Prokurorisë pranë Gjykatës së Shkallës Parë Fier, për veprime të mëtejshme.