Si rezultat i punës profesionale, reagimit të menjëhershëm të strukturave të Policisë dhe bërjes së një sërë veprimesh proaktive, grupi i posaçëm hetimor ka mundur të dokumentojë me prova ligjore ngjarjen e ndodhur në orët e mbrëmjes së datës 20 janar 2020 në Astir, ku mbeti i vrarë me armë zjarri 29-vjeçari V. T.
Bazuar në veprimet e kryera, provat e grumbulluara rezulton se si pasojë e një konflikti të çastit, shtetasi N. D., alias N. K., alias M.P., 29 vjeç, në orën 20:30 të mbrëmjes së datës 20 janar, në rrugën “Dhaskal Todri”, në Unazën e Re, ka qëlluar disa herë me armë zjarri duke e vrarë në vend, shtetasin V. T.
Policia e Tiranës ka shpallur në kërkim policor 29-vjeçarin dhe gjatë ditës së djeshme dhe mëngjesit të sotëm ka ushtruar një sërë kontrollesh në disa ambiente dhe terrene, ku dyshohej se mund të fshihej 29-vjecari dhe vijon punën e pandërprerë për kapjen e tij.
Gjithashtu edhe për ngjarjen e ndodhur në Allias, ku u plagos me armë çifti Laze, Policia e Tiranës, nën drejtimin e Prokurorisë vijon punën për zbardhjen dhe dokumentimin me prova ligjore të kësaj ngjarjeje, si dhe kapjen e vënien para përgjegjësisë ligjore të autorëve.
Në lidhje me veprimet e kryera, për shkak të rëndësisë së hetimit nuk bëjmë me dije të dhëna, pasi veprimet janë komplekse dhe publikimi i tyre dëmton ecurinë e hetimeve për zbardhjen e ngjarjes.
Policia e Tiranës garanton qytetarët se është tërësisht e angazhuar për të parandaluar, evidentuar dhe goditur paligjshmërinë, si dhe fton qytetarët për të bashkëpunuar më tej, në drejtim të krijimit të një ambienti sa më të sigurt.