Shërbimet e Policisë në të gjithë vendin vijojnë kontrollin e territorit, monitorimin e qarkullimit dhe operacionet e njëpasnjëshme, bazuar në informacionet e siguruara në rrugë operative, për goditjen e paligjshmërive.
Si rezultat i veprimeve hetimore dhe operacionale janë finalizuar 2 operacione për goditjen e veprimtarive kriminale në fushën e narkotikëve.
Janë kapur/ndaluar 6 shtetas që ishin në kërkim për vepra të ndryshme penale.
Në fushën e narkotikëve janë evidentuar 9 raste në të gjithë territorin, me 4 autorë të arrestuar, 6 të proceduar në gjendje të lirë dhe 3 në kërkim, ndërsa për 2 raste po punohet për identifikimin dhe kapjen e autorëve. Për njërin nga rastet pa autor, janë proceduar në gjendje të lirë 2 kryepleq fshatrash, për shpërdorim detyre, dhe 1 shtetas, pë moskallëzim krimi. Janë asgjësuar bimë të dyshuara narkotike të kultivuara.
Në fushën e krimeve ndaj personit janë evidentuar 10 raste, me 1 autor të arrestuar, 10 të proceduar në gjendje të lirë dhe 1 në kërkim. Është arrestuar 1 shtetas i dyshuar për marrëdhënie seksuale me dhunë dhe është proceduar në gjendje të lirë 1 shtetas i dyshuar për ngacmim seksual.
U arrestua një 42-vjeçar dhe u shpall në kërkim një 52-vjeçar, pasi dyshohet se më datë 07.07.2026, rreth orës 02:00, në rrugën “Siri Kodra”, kanë goditur me grushte dhe me shkelma, një 59-vjeçar, për motive të dobëta. (Për këtë rast, është publikuar video në portalin “JOQ”).
Është arrestuar 1 shtetas, pasi ka tentuar të largohet nga ambientet e Komisariatit të Policisë Nr. 6, duke goditur punonjësin e Policisë. Pas kapjes nga shërbimet e Patrullës së Përgjithshme, ai u arrestua në flagrancë për veprat penale “Goditje për shkak të detyrës” dhe “Largimi i të burgosurit nga vendi i qëndrimit”. Gjithashtu, u ekzekutua dhe vendimi i Gjykatës për këtë shtetas, e cila e ka dënuar me 6 muaj burgim, për veprën penale “Vjedhja”, kryer në bashkëpunim.
Gjithashtu, është arrestuar 1 shtetas dhe janë proceduar në gjendje të lirë 3, për kundërshtim/mosbindje ndaj urdhrit të punonjësve të Policisë/goditje për shkak të detyrës.
U arrestua inxhinieri/përgjegjesi i sigurisë në një firmë ndërtimi, pasi gjatë punimeve në kantierin e firmës, ka rënë nga lartësia, një punonjës, i cili ndodhet në spital, në kujdesin e mjekëve.
Janë evidentuar 11 raste të dhunës në familje, me 1 autor të arrestuar, 11 autorë të proceduar në gjendje të lirë dhe 3 në kërkim, si dhe janë plotësuar 11 kërkesëpadi për urdhër mbrojtjeje.
Në fushën e krimeve kundër pronës janë evidentuar 13 raste, me 9 autorë të proceduar në gjendje të lirë dhe 3 në kërkim, ndërsa për 1 rast po punohet për identifikimin e autorëve.
Janë evidentuar 11 raste të krimeve kundër mjedisit, me 10 autorë të proceduar në gjendje të lirë, ndërsa për 1 rast po punohet për identifikimin e autorëve.
Në fushën e krimeve eknomiko-financiare janë evidentuar 7 raste, me 6 autorë të proceduar në gjendje të lirë dhe 1 në kërkim.
Është arrestuar 1 shtetas, janë proceduar penalisht 16 shtetas dhe janë shpallur në kërkim 3, për vepra të ndryshme penale.
Janë arrestuar 11 shtetas dhe janë proceduar penalisht 6 të tjerë, pasi drejtonin mjete në gjendje të dehur ose pa leje drejtimi. Gjithashtu, janë proceduar penalisht 6 të tjerë, pasi kanë shkelur rregullat e qarkullimit rrugor, si dhe po punohet për identifikimin dhe kapjen e një shtetasi që është larguar nga vendi i aksidentit.
Shërbimet e Policisë Kufitare kanë proceduar në gjendje të lirë 3 shtetas, për kalim të paligshshëm të kufirit/vjedhje.
Policia e Shtetit fton qytetarët të denoncojnë në numrin pa pagesë 112 çdo rast paligjshmërie, duke garantuar reagim profesional, të shpejtë dhe anonimitet të sigurt.