Elbasan/Kontrolle në ambiente të ndryshme, bazuar në informacionet e siguruara nga inteligjenca informative, për evidentimin dhe goditjen e paligjshmërive.
Finalizohet operacioni policor i koduar “Dice”, evidentohet dhe goditet një rast i përshtatjes së lokalit, për lojëra fati.
Vihen në pranga 2 autorët e dyshuar të këtij rasti, të cilët fshihnin të ardhurat e përfituara nga veprimtaria në lokalin e marrë me qira.
Procedohen në gjendje të lirë 13 shtetas që u kapën në ambientet e lokalit, duke luajtur lojëra fati.
Sekuestrohen një tavolinë dhe zara për lojëra fati, shuma parash të valutave të ndryshme të përfituara nga kjo veprimtari dhe 2 celularë.
Në vijim të kontrolleve në terren, për evidentimin dhe goditjen e veprimtarive së paligjshme, shërbimet e Komisariatit të Policisë Elbasan, bazuar në informacionet e siguruara nga inteligjenca informative, për një rast të organizimit të lojërave të fatit, në një lokal, kanë organizuar dhe finalizuar operacionin policor të koduar “Dice”.
Në kuadër të këtij operacioni u arrestuan në flagrancë shtetasit:
A. M., 63 vjeç, banues në Elbasan dhe P. L., 61 vjeç, banues në Tiranë, për veprat penale “Organizimi ose ushtrimi i veprimtarive të lojërave të fatit në kundershtim me ligjin”, “Vënia në dispozicion e lokaleve për lojëra të palejuara” dhe “Fshehja e të ardhurave”.
Këta shtetas kishin përshtatur lokalin e marrë me qira nga 63-vjeçari, për organizimin e veprimtarisë së paligjshme të lojërave të fatit. Nga verifikimet ka rezultuar se këta shtetas fshihnin të ardhurat e përfituara nga ky subjekt.
Gjithashtu, u referuan materialet në Prokurori dhe nisi procedimi në gjendje të lirë për shtetasit: B. A., E. L., Xh. B., V. R., M. S., E. G., A. B., H. M., G. I., A. P., Xh. J., E. T. dhe I. D., për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, pasi u kapën në ambientet e lokalit, duke luajtur lojëra fati.
Shërbimet e Policisë sekuestruan në cilësinë e provës materiale 140 000 lekë të rinj, 580 euro, 50 dollarë, 20 franga, një tavolinë dhe zara për lojëra fati, si edhe 2 celularë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.