Finalizohet me sukses nga strukturat e DVP Kukës, operacioni policor i koduar “Astiri 2020”.
Operacioni për goditjen e veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit.
Arrestohen në flagrancë 2 vëllezër, shpallen në kërkim 3 shtetas, si dhe procedohet në gjendje të lirë një shtetase.
Efektivët e DVP Kukës, në vijim të punës për goditjen e aktivitetit kriminal në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit, mbi bazën e informacioneve të marra në rrugë operative, finalizuan me sukses operacionin policor të koduar “Astiri 2020”, si rezultat i të cilit u arrestuan në flagrancë shtetasit:
F. M., 25 vjeç dhe F. M., 25 vjeç, banues në Tiranë (vëllezër binjakë).
U procedua në gjendje të lirë shtetasja R. B., 19 vjeçe, banuese në Tiranë.
Si dhe u shpallën në kërkim shtetasit Xh. Xh., I. Xh. dhe F. D., banues në Tiranë.
Shtetasit F. M., R. B. dhe F. M., në bashkëpunim me shtetasit Xh. Xh. dhe I. XH., do të transportonin disa shtetas sirianë që të kalonin kufirin në mënyrë të paligjshme, në drejtim të Kosovës, kundrejt fitimit.
Nga hetimi ka rezultuar se shtetasit F. M., F. M. dhe R. B., kishin rolin e paraprijësit të mjetit “Land Rover”, ku ndodheshin shtetasit Xh. Xh. dhe I. Xh., për t’i njoftuar në rast se do të kishte pika kontrolli nga Policia.
Shtetasit Xh. Xh. dhe I. Xh. që udhëtonin me mjetin “Land Rover”, me të cilin dyshohej se po transportonin shtetasit sirian, nuk i janë bindur urdhrit të punonjësit të Policisë për të ndaluar.
Gjatë kontrollit të dokumentacionit rezultoi se shtetasi F. M. drejtonte mjetin në mënyrë të parregullt.
Në vijim të veprimeve u shpallën në kërkim shtetasit Xh. Xh. dhe I. Xh, si dhe pronari i mjetit me të cilin ata qarkullonin, shtetasi F. D.
Vijojnë hetimet për dokumentimin e plotë të kësaj veprimtarie kriminale dhe për kapjen e personave të shpallur në kërkim.
Materialet i kaluan Prokurorisë së Rrethit Gjyqësor Kukës, për veprat penale “Ndihma për kalim të paligjshëm të kufijve”, kryer në bashkëpunim, “Drejtimi i automjeteve në mënyrë të parregullt” dhe “Mosbindja ndaj urdhrit të punonjësit të policisë së rendit publik”.