Strukturat e Policisë së Shtetit janë të angazhuara për parandalimin, evidentimin dhe goditjen e paligjshmërive.
PKK Morinë
Kapet në hyrje, një shtetas i shpallur në kërkim për 2 vepra penale.
Shërbimet e Policisë Kufitare në PKK Qafë Morinë, si rezultat i kontrolleve të shtuara dhe i shkëmbimit të informacioneve me DVP Tiranë, kanë kapur shtetasin D. K., 41 vjeç.
Nga verifikimet, ky shtetas rezultoi i shpallur në kërkim për llogari të Komisariatit të Policisë Nr. 4, pasi Gjykata e Shkallës së Parë e Juridiksionit të Përgjithshëm Tiranë i ka caktuar masën e sigurisë “Arrest në burg”, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Vënia në dispozicion e lokaleve për lojëra të palejuara”.
Ky shtetas iu dorëzua shërbimeve të Komisariatit të Policisë Nr. 4, të cilët ekzekutuan masën e sigurisë.
DVP Tiranë/Finalizohet operacioni policor i koduar “Foreigners”.
Shfrytëzonin 2 shtetase të huaja, për prostitucion, kapen dhe vihen në pranga një 31-vjeçar dhe një 27-vjeçare (shtetas turq).
Procedohen penalisht 2 shtetaset që ushtronin prostitucion.
Sekuestrohen shuma parash të dyshuara të përfituara nga kjo veprimtari e paligjshme dhe 3 celularë.
Specialistët e Seksionit për Hetimin e Trafiqeve të Paligjshme, si rezultat i veprimeve hetimore të kryera në drejtimin e Prokurorisë, pas informacioneve të siguruara nga inteligjenca policore, për një rast të prostitucionit, kanë organizuar dhe finalizuar operacionin e koduar “Foreigners”.
Nga veprimet hetimore ka rezultuar se shtetasit turq M. H. dhe S. B., në bashkëpunim me njëri-tjetrin, shfrytëzonin për prostitucion një shtetase nga Turqia dhe një shtetase nga Azerbajxhani, të cilat e ushtronin prostitucionin në një apartament në Rrugën e Barrikadave.
Në përfundim të veprimeve, u arrestuan shtetasja M. H., 27 vjeçe dhe shtetasi S. B., 31 vjeç, të dy banues në Tiranë, për veprën penale “Shfrytëzimi i prostitucionit”, kryer në bashkëpunim.
Gjithashtu, nisi procedimi në gjendje të lirë për 2 shtetaset që ushtronin prostitucion.
Në cilësinë e provës materiale u sekuestruan 2500 euro dhe 200 dollarë të dyshuara të përfituara nga kjo veprimtari e paligjshme, si dhe 3 celularë.
Materialet procedurale iu referuan Prokurorisë së Tiranës, për veprime të mëtejshme.
Vlorë/Finalizohet operacioni policor i koduar “Nightfall”, për goditjen e një rasti të armëmbajtjes pa leje.
Qarkullonte me armë zjarri pistoletë me silenciator, në automjet, kapet në flagrancë dhe vihet në pranga 20-vjeçari.
Vihet në pranga dhe drejtuesi i automjetit, për moskallëzim krimi.
Sekuestrohet arma e zjarrit.
Në vijim të punës për parandalimin dhe goditjen e veprimtarisë kriminale të armëmbajtjes pa leje, Sektori për Hetimin e Krimeve të Rënda i DVP Vlorë, në bashkëpunim me Seksionin për Mbështetjen Operacionale të Hetimit, bazuar në informacionet e siguruara në rrugë operative, organizuan dhe finalizuan operacionin policor të koduar “Nightfall”.
Gjatë këtij operacioni, në mbrëmje, në aksin rrugor “Orikum-Vlorë”, në Radhimë, është ndaluar për kontroll një automjet tip “Mercedes Benz” me të cilin qarkullonin 2 shtetas. Në momentin e ndërhyrjes së Policisë, pasagjeri ka hedhur nga automjeti një çantë dhe ka tentuar të largohet me vrap, por është kapur menjëherë nga shërbimet e Policisë.
Gjatë kontrollit në çantën marsup, u gjet një armë zjarri pistoletë me silenciator, e cila u sekuestrua në cilësinë e provës materiale.
Në përfundim të veprimeve, specialistët për Hetimin e Krimeve të Komisariatit të Policisë Vlorë arrestuan në flagrancë shtetasit:
- K., 19 vjeç, banues në Orikum, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
- K., 34 vjeç, banues në Orikum, për veprën penale “Moskallëzim i krimit”.
Në drejtimin e Prokurorisë, vijojnë hetimet për rastin.
Materialet procedurale iu referuan Prokurorisë, për veprime të mëtejshme.
Drejtoria Vendore e Policisë Shkodër
Specialistët për Hetimin e Krimeve të Komisariatit të Policisë Shkodër shpallën në kërkim shtetasin S. I., 31 vjeç, banues në fshatin Kosmaç, pasi dyshohet se ka përndjekur një 28-vjeçare. Punohet për kapjen e tij.
Ditën e djeshme:
-është paraqitur për të marrë mjekim, shtetasi E. M., 31 vjeç, banues në Shkodër, i cili dyshohet se është rrëzuar aksidentalisht, me monopatinë elektrike. 31-vjeçari, pasi ka marrë asistencë mjekësore, është larguar në banesë;
-ka kallëzuar shtetasja A. P., 39 vjeçe, me detyrë infermiere në qendrën shëndetësore të fshatit Trush, se është kanosur nga shtetasi N. Z., 41 vjeç, dyshohet me probleme të shëndetit mendor. Ky shtetas është transportuar në Spitalin Psikiatrik, për të marrë asistencën e nevojshme.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
Drejtoria Vendore e Policisë Korçë
Specialistët për Hetimin e Narkotikëve ekzekutuan masën e sigurisë “Arrest në burg”, për shtetasin K. D., 36 vjeç, banues në Korçë, caktuar nga Gjykata, për veprën penale “Trafikimi i narkotikëve”, kryer në bashkëpunim.
Specialistët e Sektorit të Qarkullimit Rrugor arrestuan në flagrancë shtetasin E. D., 30 vjeç, banues në Pogradec, pasi u kap duke drejtuar automjetin, në gjendje të dehur.
Specialistët për Hetimin e Krimeve të Komisariatit të Policisë Korçë referuan materialet në Prokurori, ku filloi procedimi penal për shtetasin P. B., 63 vjeç, banues në Tiranë, për veprën penale “Shkelja e rregullave të mbrojtjes në punë”, pasi është dëmtuar në dorë, gjatë çmontimit të një pajisjeje në dyqanin e tij. 63-vjeçari mori mjekim dhe është jashtë rrezikut për jetën.
Komisariati i Policisë Devoll referoi materialet në Prokurori, për vlerësim, pasi shtetasja T. K., 66 vjeçe, ka humbur jetën, dyshohet nga vetëhelmimi. Po punohet për dokumentimin e shkakut të vdekjes.
Në Komisariatin e Policisë Korçë është paraqitur shtetasi V. B., 62 vjeç, banues në Korçë, i cili ka kallëzuar se gjatë kohës që nuk ka patur njeri në banesë, i kanë vjedhur një shumë parash. Po punohet për identifikimin dhe kapjen e autorit/ve.
Maliq/Në fshatin Libonik, në vendin e quajtur “Rruga e varrezave”, është gjetur në kanal, e mbështjellë me qese plastike, 1 armë zjarri e ndryshkur, jofunksionale. Arma e zjarrit do të dërgohet në Institutin e Policisë Shkencore, për ekspertizë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Drejtoria Vendore e Policisë Berat
Specialistët e Seksionit për Hetimin e Krimeve të Komisariatit të Policisë Berat:
-kapën dhe ndaluan shtetasin e shpallur në kërkim E. K., 40 vjeç, banues në Berat, pasi Gjykata e Shkallës së Parë e Juridiksionit të Përgjithshëm Berat e ka dënuar me 10 muaj burgim, për veprën penale “Dhuna në familje”.
-referuan materialet në Prokurori, ku nisi procedimi në gjendje të lirë për shtetasin A. K., 35 vjeç, banues në Berat, pasi dyshohet se për motive të dobëta, ka fyer nëpërmjet thirrjeve/mesazheve në celular, një 30-vjeçar.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
Drejtoria Vendore e Policisë Fier
Specialistët e Sektorit të Qarkullimit Rrugor:
-arrestuan në flagrancë shtetasin L. K., 47 vjeç, banues në Fier, pasi u kap duke drejtuar automjetin, në gjendje të dehur;
-referuan materialet në Prokurori, ku nisi procedimi penal për një 14-vjeçar, pasi u kap duke drejtuar motomjetin.
Specialistët për Hetimin e Krimeve Ekonomiko-Financiare referuan materialet në Prokurori, ku nisi procedimi penal për shtetasit:
-D. T., 57 vjeç, banues në Fier, pasi ka kallëzuar një 56-vjeçar, se shtetasi D. T. duke shpërdoruar detyrën si administrator i njësisë adminsitrative Frakull, i ka dhënë leje një shtetasi, për rikonstruksionin e një objekti që është pronë shtetërore. Vijojnë verifikimet rreth këtij kallëzimi;
-R. Ll., 31 vjeç, banues në Fier, pasi dyshohet se ka marrë në kundërshtim me ligjin, xhiron ditore të postës private në të cilën ishte i punësuar.
Specialistët e Seksionit për Hetimin e Krimit Kibernetik referuan materialet në Prokurori, ku nisi procedimi penal për shtetasin K. K., 35 vjeç, banues në Divjakë, pasi dyshohet se ka postuar në rrjete sociale, fotografi të një 17-vjeçareje, me mbishkrime fyese.
Shërbimet e Komisariatit të Policisë Lushnjë referuan materialet në Prokurori, ku nisi procedimi penal për shtetasin A. K., 57 vjeç, banues në Lushnjë, pasi dyshohet se për motive të dobëta, ka shtyrë fizikisht një 82-vjeçar, i cili është rrëzuar dhe dëmtuar lehtë.
Ditën e djeshme:
-ka kallëzuar shtetasi I. S., 24 vjeç, se është kanosur nga një shtetas me numër celulari të paidentifikuar. Punohet për identifikimin dhe nxjerrjen përpara përgjegjësisë penale, të autorit të rastit.
-është konstatuar se në varrezat e fshatit Ninësh, dyshohet se si pasojë e erozionit, kanë dalë në sipërfaqe, mbetje kockore. Për këtë rast është njoftuar bashkia Mallakastër, me qëllim marrjen e masave.
Materialet procedurale iu referuan Prokurorisë së Fierit, për veprime të mëtejshme.
Drejtoria Vendore e Policisë Lezhë
Specialistët e Seksionit për Hetimin e Krimeve të Komisariatit të Policisë Lezhë referuan materialet në Prokurori dhe shpallën në kërkim shtetasin E. U., 24 vjeç, banues në Lezhë, pasi dyshohet se ka vjedhur një shumë parash në banesën e një shtetaseje. Po punohet për kapjen e tij.
Gjithashtu, referuan materialet në Prokurori, pasi shtetasja M. N., 56 vjeçe, banuese në fshatin Kallmet i Vogël, ka kallëzuar se dyshon që është tentuar të vidhet në banesën e saj, pasi ka konstatuar një dëmtim në derën e banesës. Punohet për zbardhjen e rrethanave të rastit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.
Gjatë 24 orëve të fundit, në të gjithë vendin janë proceduar penalisht 137 shtetas, konkretisht: 28 shtetas janë vënë në pranga, 98 janë proceduar në gjendje të lirë, si dhe janë shpallur në kërkim 11 shtetas, për vepra të ndryshme penale. Për lokalizimin, kapjen dhe vënien në pranga të shtetasve janë shpallur në kërkim, vijojnë punën intensivisht, strukturat e Policisë.
Në fushën e narkotikëve janë evidentuar 8 raste. 2 shtetas janë ndaluar dhe 8 shtetas janë proceduar në gjendje të lirë.
Në fushën e mbajtjes pa leje të armëve dhe municionit luftarak, janë evidentuar 5 raste. 1 shtetas është vënë në pranga dhe 4 shtetas janë proceduar në gjendje të lirë.
Në fushën e krimeve kundër personit janë evidentuar 16 raste, njëri prej tyre me autor/ë të paidentifikuar. Për raste të tjera, 2 shtetas janë vënë në pranga, 1 shtetas është shpallur në kërkim dhe 20 shtetas janë proceduar në gjendje të lirë.
Në fushën e krimeve ekonomike, janë evidentuar 5 raste. 1 shtetas është ndaluar, 1 shtetas është shpallur në kërkim dhe 4 shtetas janë proceduar në gjendje të lirë.
Për veprat penale në fushën e vjedhjes/tentativës për vjedhje të pronës dhe pasurisë janë evidentuar 5 raste, 2 prej tyre me autorë të paidentifikuar. Për raste të tjera, 7 shtetas janë vënë në pranga, 4 shtetas janë shpallur në kërkim dhe 2 shtetas janë proceduar në gjendje të lirë.
Në fushën e krimeve kundër mjedisit dhe veprave penale dhe objekt shkatërrimin e pronës me mjete të ndryshme, janë evidentuar 17 raste, njëri prej tyre me autor/ë të paidentifikuar. Për raste të tjera, 1 shtetas është shpallur në kërkim dhe 17 shtetas janë proceduar në gjendje të lirë.
Janë evidentuar 4 raste të dhunës në familje. 2 shtetas janë ndaluar, 1 shtetas është arrestuar, 1 shtetas është shpallur në kërkim dhe 2 shtetas janë proceduar në gjendje të lirë. Gjithashtu, janë plotësuar 11 kërkesëpadi për lëshimin e urdhrit të mbrojtjes së menjëhershme.
Janë evidentuar:
-5 raste të vetëgjyqësisë, me 1 shtetas të shpallur në kërkim dhe 6 shtetas të proceduar në gjendje të lirë;
-3 raste të veprimeve në kundërshtim me vendimin e gjykatës, me 3 shtetas të proceduar në gjendje të lirë;
-nga 2 raste të falsifikimit, pastrimit të produkteve të veprës penale, përvetësimit të sendeve të vjedhura, shkeljes së rregullave të mbrojtjes në punë dhe përdorimit me keqdashje të thirrjeve telefonike. Për secilin nga këto raste është proceduar në gjendje të lirë 1 shtetas;
-2 raste të prishjes së qetësisë publike, me 3 shtetas të proceduar në gjendje të lirë;
-2 raste të cenimit të masës së sigurisë “Arrest në shtëpi”, me 1 shtetas të arrestuar dhe 1 shtetas të proceduar në gjendje të lirë;
-2 raste të përndjekjes, me 1 shtetas të shpallur në kërkim dhe 1 shtetas të proceduar në gjendje të lirë;
-1 rast i krimeve kibernetike, me 2 shtetas të shpallur në kërkim;
-nga 1 rast i vjedhjes së energjisë elektrike, mosbindjes/kundërshtimit të urdhrave të punonjësve të Policisë, shpërdorimit të detyrës dhe kanosjes për shkak të detyrës, me 5 shtetas në total, të proceduar në gjendje të lirë.
Janë proceduar në gjendje të lirë 13 shtetas, për pjesëmarrje në një manifestim të kundërligjshëm dhe për pengim të qarkullimit të mjeteve.
2 shtetas janë arrestuar dhe 2 shtetase janë proeduar në gjendje të lirë, për implikim në prostitucion.
2 shtetas të kërkuar për përndjekje, janë kapur.
1 shtetas i kërkuar për mbajtje pa leje të armëve të zjarrit dhe për vënie në dispozicion të lokalit, për lojëra fati, është kapur dhe vënë në pranga.
1 shtetas i kërkuar për kanosje serioze për gjakmarrje, është kapur.
Ka ndodhur 1 aksident rrugor, me 2 shtetas të dëmtuar. Janë evidentuar 17 raste të veprave penale në fushën e qarkullimit rrugor. 9 shtetas janë vënë në pranga dhe 8 shtetas janë proceduar në gjendje të lirë.