Zbardhen dhe dokumentohen 7 vjedhje të ndodhura dy muajt e fundit, në qytetin e Korçës.
Kapen dhe ndalohen dy autorët e dyshuar të tyre, të shpallur në kërkim për veprën penale “Vjedhja”.
Shërbimet e Komisariatit të Policisë Korçë, në vijim të punës për zbardhjen dhe dokumentimin e disa vjedhjeve, të ndodhura dy muajt e fundit në qytetin e Korçës, në lagjet nr. 7, 8, 9, 12 dhe 17, ku autorët iu vidhnin qytetarëve nga xhepat telefona celularë dhe në biznese sasi lekësh, bënë të mundur ndalimin e shtetasve në kërkim:
L. E., 44 vjeç, banues në Korçë, i dënuar më parë për veprën penale “Vjedhja”.
A. K., 19 vjeç, banues në Korçë.
44-vjeçari është ndaluar nga shërbimet e Stacionit të Policisë Kufitare Kapshticë, në dalje të Republikës së Shqipërisë, pasi rezultonte i shpallur në kërkim për pesë vjedhje të ndodhura përgjatë muajve dhjetor, janar dhe shkurt, në Korçë, ku si rezultat i punës hetimore të kryer nga specialistët për Hetimin e Krimeve, ky shtetas dyshohet se iu ka vjedhur pesë qytetarëve, celularët respektivë të tyre të markës “Samsung”, një prej të cilëve iu gjet e sekuestrua në cilësinë e provës materiale.
Ndërsa ndaj shtetasit A. K., Gjykata e Shkallës së Parë Korçë me vendimin e datës 11.02.2020, ka caktuar masën e sigurisë “Arrest në burg”, për veprën penale “Vjedhja”, pasi ky shtetas është autor i dyshuar i dy vjedhjeve, ngjarje të ndodhura në lagjet nr. 7 dhe 12, ku në dyqanet e dy qytetarëve, 19-vjeçari ka vjedhur një sasi lekësh dhe 10 steka cigaresh.
Materialet në ngarkim të tyre i kaluan Prokurorisë pranë Gjykatës së Shkallës së Parë Korçë, për veprime të mëtejshme.