Elbasan/Finalizohet operacioni policor i koduar “Reagimi”.
Vodhi gjatë natës një automjet, si rezultat i veprimeve të shpejta operacionale dhe policore, identifikohet, kapet dhe arrestohet në flagrancë 19-vjeçari teksa qarkullonte me automjetin e vjedhur, pa leje drejtimi.
19-vjeçari me precedentë të mëparshëm penal për të njëjtat vepra penale.
Sekuestrohet automjeti i vjedhur.
Si rezultat i veprimeve të shpejta hetimore dhe operacionale të kryera menjëherë pas kallëzimit të shtetasit Sh. K., 60 vjeç, se gjatë natës, në lagjen “28 Nëntori”, i kishin vjedhur automjetin, specialistët për Hetimin e Krimeve të Komisariatit të Policisë Elbasan kanë organizuar dhe finalizuar operacionin policor të koduar “Reagimi”.
Në kuadër të këtij operacioni u bë i mundur identifikimi, kapja dhe arrestimi në flagrancë i autorit të dyshuar, shtetasit E. B., 19 vjeç, banues në Elbasan, i cili u kap nga shërbimet e Policisë teksa qarkullonte me automjetin e vjedhur, pa leje drejtimi.
Automjeti i vjedhur u sekuestrua në cilësinë e provës materiale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Vjedhja” dhe “Drejtimi i automjeteve në mënyrë të parregullt”.