Janë kapur/ndaluar 2 shtetas që ishin në kërkim për vepra të ndryshme penale.

Në fushën e narkotikëve janë evidentuar 3 raste në të gjithë territorin, me 1 autor të arrestuar dhe 2 të proceduar penalisht në gjendje të lirë. Gjithashtu, është sekuestruar një sasi lënde të dyshuar narkotike cannabis sativa.

Në fushën e krimeve ndaj personit janë evidentuar 2 raste, me 2 autorë të proceduar penalisht në gjendje të lirë. Gjithashtu, është shpallur në kërkim 1 shtetas për mosbindje ndaj urdhrit të punonjësit të Policisë, si dhe është proceduar penalisht në gjendje të lirë 1 shtetas, pasi gjatë kontrollit iu gjetën 1 armë gjahu, që e mbante pa lejen përkatëse, dhe 2 radio marrëse-dhënëse, të ngjashme me ato që përdor Policia.

Në Tiranë, u arrestua shtetasi A. N., 49 vjeç, pasi në Tufinë, teksa shkarkonte rërë me kamionçinën e tij, është shkëputur pjesa e karrocerisë, duke dëmtuar 2 shtetas, 39 dhe 25 vjeç, të cilët ndodhen nën kujdesin e mjekëve. Në cilësinë e provës materiale, u sekuestrua automjeti.

Në fushën e krimeve kundër pronës janë evidentuar 2 raste, me 1 autor të proceduar penalisht në gjendje të lirë, ndërsa për 1 rast vijon puna për identifikimin e autorit/autorëve.

Janë evidentuar 4 raste të dhunës në familje, me 1 autor të arrestuar dhe 3 të proceduar penalisht në gjendje të lirë. Gjithashtu, janë plotësuar 4 kërkesë-padi për lëshimin e urdhrave të mbrojtjes.

Janë evidentuar 8 raste të krimeve kundër mjedisit, me 9 autorë të proceduar penalisht në gjendje të lirë.

Janë evidentuar 4 raste të vjedhjes, me 3 autorë të arrestuar dhe 1 të proceduar penalisht në gjendje të lirë.

Janë evidentuar 2 raste të krimeve ekonomiko-financiare, me 2 autorë të proceduar penalisht në gjendje të lirë.

Janë evidentuar 2 raste të mbajtjes pa leje të armëve të ftohta, me 2 autorë të proceduar penalisht në gjendje të lirë.

Janë proceduar penalisht 4 shtetas dhe është shpallur në kërkim 1 tjetër, për vepra të ndryshme penale.

Janë arrestuar 5 shtetas dhe janë proceduar penalisht 5 të tjerë, pasi drejtonin mjete në gjendje të dehur ose pa leje drejtimi. Gjithashtu, janë proceduar penalisht 4 shtetas për shkelje të rregullave të qarkullimit rrugor.

Strukturat e Policisë Kufitare kanë proceduar penalisht 1 shtetas për mosdeklarim të të hollave në kufi.

Në Shkodër, në fshatin Dobraç, është gjetur pa shenja jete në banesën e tij shtetasi S. S., 76 vjeç. Nga veprimet e para hetimore dyshohet se ky shtetas është vetëdjegur, duke përdorur lëndë djegëse (benzinë), dhe, si pasojë e djegieve të marra, ka humbur jetën. Trupi i pajetë është dërguar në morgun e Spitalit Rajonal Shkodër për ekzaminime të mëtejshme.

Gjithashtu, në fshatin Bajzë, Malësi e Madhe, ka rënë zjarr në banesën e shtetasit A. L., 57 vjeç. Si pasojë, janë djegur orenditë shtëpiake të një dhome dhe është asfiksuar pronari i banesës, i cili ndodhet nën kujdesin e mjekëve në Spitalin Rajonal Shkodër. Nga veprimet hetimore dyshohet se zjarri ka rënë aksidentalisht.

Policia e Shtetit fton qytetarët të denoncojnë në numrin pa pagesë 112 çdo rast paligjshmërie, duke u garantuar reagim profesional, të shpejtë dhe anonimitet të sigurt.

The post Rezultatet kryesore të strukturave policore në vend dhe ngjarjet e ndodhura gjatë 24 orëve të fundit appeared first on Policia e Shtetit.

Në vijim të veprimeve hetimore dhe procedurale, nën drejtimin e Prokurorisë, në lidhje me tubimin e djeshëm:

-U arrestuan shtetasit J. B., 54 vjeç, L. B., 48 vjeç, D. Zh., 36 vjeç, Xh. M., 27 vjeç, M. S., 38 vjeç, K. F., 25 vjeç, V. L., 29 vjeç, E. Zh., 34 vjeç, Xh. M., 30 vjeç, A. E., 38 vjeç, R. K., 23 vjeç, E. N., 26 vjeç, M. Sh., 33 vjeç, R. H., 27 vjeç, B. O., 18 vjeç, E. N., 28 vjeç, L. N., 25 vjeç, O. A., 19 vjeç, J. Z., 35 vjeç, R. V., 31 vjeç, V. A., 20 vjeç, E. Xh., 39 vjeç dhe R. D., 31 vjeç;

-Ndërkohë u proceduan penalisht 13 shtetas;

-Si dhe u shpallën në kërkim 30 shtetas.

Policia vijon veprimet hetimore për dokumentimin e plotë të ngjarjeve, identifikimin e personave të tjerë të përfshirë dhe vënien e tyre përpara përgjegjësisë ligjore.

Materialet procedurale iu referuan Prokurorisë për veprime të mëtejshme

The post Tiranë – Kundërshtuan dhe goditën me sende të forta dhe lëndë piroteknike punonjësit e Policisë, si dhe dëmtuan godina institucionesh shtetërore gjatë tubimit të djeshëm, arrestohen 23 shtetas, procedohen penalisht 13 të tjerë dhe shpallen në kërkim 30 shtetas. appeared first on Policia e Shtetit.

Ndërkohë, Drejtori i Përgjithshëm i Policisë së Shtetit u kërkoi drejtuesve të shërbimeve dhe punonjësve të angazhuar në terren vetëpërmbajtje dhe zbatim të parimit të proporcionalitetit në rast të përballjes me akte dhune.

Gjatë protestës, e cila zgjati deri në orët e mbrëmjes së djeshme dhe u shtri në disa pjesë të kryeqytetit, punonjësit e Policisë së Shtetit u sulmuan për orë të gjata me gurë, vida e sfera metalike, shkopinj druri e metalikë, lëndë piroteknike, bomba Molotov dhe bombola gazi të lidhura me kapsolla, duke rrezikuar jetën e punonjësve të Policisë. Si pasojë e sulmeve të personave të maskuar dhe të dhunshëm, 5 punonjës policie u plagosën.

Lidhur me incidentin gjatë të cilit 28-vjeçari E. V. pësoi dëmtim në sy, Drejtori i Përgjithshëm i Policisë së Shtetit urdhëroi nisjen e menjëhershme të veprimeve përkatëse nga Drejtoria e Standardeve Profesionale, për hetimin e plotë dhe të paanshëm të rrethanave të ngjarjes.

Po në lidhje me këtë rast, Agjencia e Mbikëqyrjes Policore dhe Prokuroria kanë nisur hetimet për zbardhjen dhe dokumentimin ligjor të rastit.

Policia e Shtetit shpreh keqardhjen për lëndimin e të riut gjatë protestës dhe i uron atij shërim sa më të shpejtë, ashtu si të gjithë qytetarëve, gazetarëve dhe punonjësve të Policisë që janë lënduar gjatë protestave në Tiranë.

Ndërkohë, pas publikimit në media të një rasti ku një punonjës policie shfaqet në tejkalim të detyrës dhe mosrespektim të parimit të proporcionalitetit, Drejtori i Përgjithshëm i Policisë së Shtetit pezulloi nga detyra punonjësin e Forcës së Posaçme “Shqiponja”, inspektor A. K., dhe ndaj tij Drejtoria e Standardeve Profesionale ka nisur hetimin administrativ.

Mbrojtja e jetës, shëndetit dhe sigurisë së çdo qytetari është një detyrim parësor i Policisë së Shtetit dhe do të hetohet me paanshmëri e profesionalizëm çdo rast i dyshuar për tejkalim të detyrës.

Respektimi i ligjit, proporcionaliteti në përdorimin e forcës dhe përgjegjësia individuale janë parime të panegociueshme në ushtrimin e detyrës policore.

Policia e Shtetit mbetet e vendosur të mos tolerojë asnjë veprim që bie ndesh me ligjin, me të drejtat e qytetarëve dhe me standardet profesionale që duhet të udhëheqin punën e çdo punonjësi të saj.

The post Informacion për mediat për tubimin e datës 24.10.2026 appeared first on Policia e Shtetit.

Nga verifikimet paraprake rezulton se mesazhi është dërguar nga një adresë elektronike që i përket një institucioni arsimor në Arabinë Saudite.

Mënyra e dërgimit të këtij mesazhi paraqet ngjashmëri me raste të mëparshme, kur mesazhe të ngjashme kërcënuese janë dërguar nga adresa elektronike të komprometuara, që u përkisnin studentëve të institucioneve arsimore jashtë vendit.

Strukturat e Policisë së Shtetit po kryejnë verifikimet dhe veprimet e nevojshme hetimore për të përcaktuar origjinën dhe autenticitetin e mesazhit, për të zbardhur plotësisht rrethanat e rastit, si dhe për të identifikuar personat përgjegjës për dërgimin e tij.

The post NJOFTIM PËR MEDIA appeared first on Policia e Shtetit.

Në adresat elektronike zyrtare të disa institucioneve shtetërore është dërguar një mesazh kërcënues, në të cilin pretendohet për vendosjen e lënde shpërthyese në ambientet e tyre.

Policia e Shtetit ka nisur menjëherë verifikimet. Deri tani, nuk është evidentuar asnjë rast i vendosjes së lëndëve shpërthyese.

Nën drejtimin e Prokurorisë, strukturat e specializuara të Policisë së Shtetit vijojnë punën për identifikimin e burimit të mesazhit.

The post Policia e Shtetit/Njoftim appeared first on Policia e Shtetit.

Hapjen e aplikimeve për pranimin në funksionin e veçantë “Specialist i komunikimit të jashtëm, në Sektorin e Komunikimit të Brendshëm dhe të Jashtëm, në Drejtorinë e Rikuperimit të Aseteve”, në Drejtorinë e Përgjithshme të Policisë së Shtetit, me gradën “Kryekomisar”, nga data 04.09.2026 deri më datë 11.09.2026.

Aplikantët duhet të kalojnë me sukses fazat e mëposhtme:

1. Aplikimi;
2. Shqyrtimi dokumentacionit;
3. Verifikimi i aplikantit;
4. Jetëshkrimi i kandidatit;
5. Intervista me gojë;

Kanë të drejtë të aplikojnë shtetasit të cilët plotësojnë kriteret e përgjithshme dhe ato të veçanta sipas përcaktimeve të këtij urdhri.

Kritere të përgjithshme:

1. Të jetë shtetas shqiptar;
2. Të ketë zotësi të plotë për të vepruar;;
3. Të mos jetë i përjashtuar nga Policia e Shtetit, strukturat e tjera të sigurisë kombëtare, apo të jetë larguar nga shërbimi civil me masë disiplinore;
4. Të jetë në gjendje të mirë shëndetësore dhe i aftë fizikisht për të kryer detyrën;
5. Të ketë përfunduar arsimin e lartë dhe kualifikimet e fushës së veçantë;
6. Të mos jetë i dënuar me vendim gjykate, të formës së prerë, për kryerjen e një vepre penale;
7. Të ketë përvojë pune jo më pak se 2 vjet në fushën perkatëse;
8. Të plotësojë kushtet për tu pajisur me certifikate të sigurimit të personelit sipas nivelit të pozicionit të punës për të cilin aplikon.

Kritere të veçanta:

1. Të ketë përfunduar arsimin ciklin e dytë të studimeve të arsimit të lartë në Shkenca Ekonomike ose Juridike;
2. Të ketë eksperiencë pune jo më pak se 2 vjetë në Institucione Ligjzbatuese ose të Sigurisë, në fushën e hetimit të krimit, bashkëpunimit ndërkombëtarë, administrimit dhe shkëmbimit të informacionit, në fushën ekonomiko – financiare ose juridike e lidhur me gjurmimin e aseteve;
3. Të zotërojë gjuhën angleze, të shkruar, lexuar dhe folur, për përdorim profesionale, njohja e një gjuhe tjetër zyrtare të Bashkimit Europian përbën përparësi;
4. Të ketë aftësi të punës në grup, komunikimi dhe prezantimi;
5. Të ketë aftësi të provuara në hartimin, përkthimin dhe administrimin e komunikimeve zyrtare;
6. Të ketë njohuri mbi përdorimin e teknologjisë së informacionit dhe të programeve bazë të punës;
7. Të ketë njohuri mbi mbrojtjen e të dhënave personale, sigurinë e informacionit dhe ruajtjen e konfidencialitetit;
8. Të plotësojë kushtet për t’u pajisur me autorizimet dhe certifikimet e nevojshme për aksesin në sistemet e sigurta të informacionit;
9. Të gëzoj besueshmëri, të jetë i përshtatshëm dhe të mos ketë pengesa ligjore për pranimin në funksione të veçanta të Policisë së Shtetit.

Shtetasit të cilët shprehin interesin për të aplikuar për të marrë pjesë në procesin e konkurrimit, brenda datës 11.09.2026 duhet të dorëzojnë pranë Drejtorisë së Burimeve Njerëzore, në Drejtorinë e Përgjitshme të Policisë së Shtetit dokumentacionin e mëposhtëm:

1. Formularin e aplikimit për pranim në Polici (bashkëlidhur këtij njoftimi);
2. Formularin vetdeklarimi për pranim në Polici (bashkëlidhur këtij njoftimi)
3. Formularin i dekriminalizimit (bashkëlidhur këtij njoftimi);
4. Fotokopje të kartës së identitetit;
5. Dokument zyrtar që vërteton përfundimin e arsimit të lartë me listë notash dhe trajnimeve

      përkatëse, të noterizuara;

1. Certifikatë e gjendjes gjyqësore;
2. Certifikatë familjare;
3. Vërtetim nga gjykata;
4. Vërtetim nga prokuroria;
5. Vertetim nga SPAK
6. Raport mjeko-ligjor, dokument të lëshuar nga institucionet shëndetësore që vërteton se nuk

      është përdorues i lëndëve narkotike; (bashkëlidhur këtij njoftimi)

1. Fotokopje e librezës së punës e noteriazuar ose vërtetim për vjetërsinë në punë;
2. Dëshmi ose certifikatë të gjuhës huaj.

Aplikanti që pas verifikimit rezulton i papërshtatshëm, ka pengesa ligjore dhe është i pabesueshëm, skualifikohet nga procesi i konkurrimit, ndërsa aplikanti që plotëson kriteret e përcaktuara për t’u pranuar në funksione të veçanta, i nënshtrohet fazave të vlerësimit si më poshtë:

a) Jetëshkrimit të kandidatit (vlerësohet me 80 pikë);

Vlerësimi i Jetëshkrimit përfshin vjetërsisë në punë, arsimimin, trajnimet dhe gjuhën e huaj, të lidhura me veprimtarinë në fushën e kërkuar si dhe referencat e punëdhënësve të mëparshëm (vlerësohet me 80 pikë);

b) Intervista me gojë (vlerësohet me 20 pikë).

Vlerësimi i njohurive dhe aftësive komunikuese, përvojën profesionale në fushën përkatëse, si dhe motivimin personal (vlerësohet me 20 pikë).

Koha dhe vendi i zhvillimit të Intervistës me gojë i njoftohen aplikantëve jo me vone së 2 ditë para datës së zhvillimit të testimit nga Drejtoria e Burimeve Njerezore.

Në përfundim të fazave të vlerësimit, Komisioni harton procesverbalin mbi rezultatet e arritura nga secili aplikant dhe në bazë te tyre harton listën e aplikantëve sipas rezultateve të arritura në rend zbritës.

Aplikantët kane të drejtën e ankimimit pranë Komisionit të Shqyrtimit të Ankesave. Ankimimi mund të bëhet nëpërmjet e-mail-it në adresën burimet.njerezore@asp.gov.al, ose pranë sekretarisë së Drejtorisë së Burimeve Njerëzore. Komisioni i Shqyrtimit të Ankesave shqyrton ankesat dhe merr vendim brenda 5 ditëve pune. Sekretaria teknike njofton aplikantët brenda 2 ditëve pune nga data e marrjes së vendimit nga KSHA.

Në përfundim të procesit të ankimimit, Komisioni i Vlerësimit merr vendim përfundimtarë për shpalljen e aplikantit fitues dhe publikon njoftimin në website-in e Policisë së Shtetit. Aplikanti i renditur i pari fiton procesin e konkurrimit për pranimin në funksioni e veçantë të Policisë së Shtetit, për të cilin ka konkurruar.

Në qoftë se asnjë kandidat nuk merr 60% të pikëve, Komisioni i Vlerësimit vendos përfundimin e konkurrimit pa asnjë fitues të përzgjedhur.

Aplikanti i shpallur fitues kryen programin e formimit, në Akademinë e Sigurisë, me kohëzgjatje në përputhje me programin mësimor të miratuar nga Akademia e Sigurisë dhe pas përfundimit me sukses të tij, pranohet në funksionin e veçantë të Policisë së Shtetit, emërohet në detyrë dhe i jepet grada policore “Kryekomisar”, me urdhër të Drejtorit të Përgjithshëm të Policisë së Shtetit.

Shkarkoni formularët:

FORMULAR-VETDEKLARIMI.docx

FORMULAR-DEKRIMINALIZIMI.doc

FORMULARI-I-APLIKIMIT-PER-PRANIM-NE-POLICI.docx

SKEDA-MJEKESORE.docx

The post Hapen aplikimet për pranim në një funksion të veçantë në Drejtorinë e Rikuperimit të Aseteve appeared first on Policia e Shtetit.

Mëngjesin e sotëm, në adresat elektronike të disa institucioneve në disa qytete të vendit, është dërguar një e-mail nga një adresë ende e paidentifikuar, me përmbajtje kërcënuese dhe terroriste, në të cilin pretendohet se në këto institucione është vendosur një bombë.

Menjëherë pas marrjes së këtij informacioni, strukturat e Policisë së Shtetit po kryejnë të gjitha verifikimet e nevojshme në institucionet e përfshira në këtë kërcënim. Nga kontrollet e kryera deri tani, nuk ka rezultuar të jetë vendosur bombë apo ndonjë lloj tjetër eksplozivi.

Ndërkohë, Drejtoria për Hetimin e Krimeve Kibernetike, në bashkëpunim me Drejtorinë e Antiterrorit dhe agjenci të tjera ligjzbatuese, vijojnë punën intensive për identifikimin e autorit dhe të adresës elektronike nga e cila janë dërguar këto kërcënime.

Policia e Shtetit siguron qytetarët se nuk ka vend për panik dhe se strukturat e saj janë të angazhuara maksimalisht për garantimin e rendit dhe sigurisë publike, si dhe për parandalimin dhe goditjen e paligjshmërive.

The post Policia e Shtetit/Njoftim appeared first on Policia e Shtetit.

Policia e Shtetit informon qytetarët se janë konstatuar raste të qarkullimit të mesazheve dhe lidhjeve (linkeve) mashtruese, të cilat synojnë marrjen e kontrollit të llogarive WhatsApp.

Mashtruesit dërgojnë linke me pretendime të ndryshme, si p.sh. për të votuar në një konkurs ose për të konfirmuar një veprim. Më pas, i kërkohet përdoruesit të vendosë kodin 6-shifror të verifikimit të WhatsApp. Ky kod përdoret nga autorët për të regjistruar llogarinë në një pajisje tjetër dhe për të marrë kontrollin e saj.

Policia e Shtetit këshillon qytetarët:

* Mos klikoni në linke të dyshimta, edhe nëse dërgohen nga persona të njohur.
* Mos ndani kurrë kodin e verifikimit të WhatsApp me askënd.
* Aktivizoni funksionin Two-Step Verification (Verifikimi me dy hapa) në aplikacionin WhatsApp.
* Nëse dyshoni se llogaria juaj është komprometuar, veproni menjëherë për ta rikuperuar atë dhe njoftoni personat e kontakteve tuaja.

Mbroni të dhënat tuaja. Kujdesi juaj është mbrojtja më e mirë ndaj mashtrimeve kibernetike.

The post Policia e Shtetit/Apel për qytetarët, që të tregojnë kujdes gjatë përdorimit të aplikacionit WhatsApp appeared first on Policia e Shtetit.

Ky proces zhvillohet me qëllim garantimin e një vlerësimi objektiv, transparent dhe gjithëpërfshirës, nxitjen e konkurrencës profesionale dhe drejtuese, si dhe përzgjedhjen e kandidatëve që shfaqin aftësi drejtuese, rezultate të larta në punë dhe integritet moral e profesional.

Faza e aplikimeve është e hapur deri më 17.07.2026, ora 14:00.

Të drejtë aplikimi për pozicionin “Drejtor Departamenti”, në Departamentin e Policisë Kriminale, Departamentin për Kufirin dhe Migracionin dhe Departamentin për Marrëdhëniet Ndërkombëtare, kanë punonjësit e Policisë së Shtetit që plotësojnë kriteret e përcaktuara në pikën 4 të nenit 60 të ligjit nr. 82/2024 “Për Policinë e Shtetit”, si më poshtë:

– Të mbajnë njërën nga gradat e rolit të mesëm drejtues;
– Të kenë shtetësi shqiptare;
– Të mos kenë masa për shkelje të rënda disiplinore në Policinë e Shtetit gjatë 3 (tre) viteve të fundit;
– Të jenë në gjendje shëndetësore që u lejon ushtrimin e detyrës përkatëse;
– Të mos kenë konflikt interesi në ushtrimin e detyrës, në përputhje me legjislacionin në fuqi.

Policia e Shtetit garanton zhvillimin e një procesi të rregullt, transparent dhe të bazuar në aftësi, meritokraci dhe integritet profesional, duke u ofruar mundësi të barabarta të gjithë kandidatëve që plotësojnë kriteret ligjore.

The post Policia e Shtetit hap aplikimet për konkurrim për pozicionin “Drejtor Departamenti” në strukturat qendrore appeared first on Policia e Shtetit.

Plani i masave parashikon detyrat që do të kryejnë të gjitha strukturat, duke u mbështetur në përvojën pozitive për planifikimin, organizimin dhe menaxhimin e situatës së rendit dhe sigurisë publike gjatë aktiviteteve ndërkombëtare.

Për mbarëvajtjen e këtij aktiviteti, si dhe për të lehtësuar qarkullimin e automjeteve në qytetin e Tiranës, gjatë datës 03.06.2026, nga Policia e Shtetit, në bashkëpunim me Policinë Bashkiake të Tiranës, do të aplikohen kufizime të qarkullimit të mjeteve në disa akse rrugore në afërsi të stadiumit.

Rrugët që do të jenë të bllokuara, duke filluar nga ora 16:00, datë 03.06.2026, deri në përfundim të ndeshjes:

•Bulevardi “Dëshmorët e Kombit”, nga fast food “Laguna”, pranë urës së ish-hotel Dajtit;
•Rruga “Papa Gjon Pali II”, te kryqëzimi i RTSH-së;
•Rruga “Dervish Hima”, pranë ambasadës së SHBA-së;
•Rruga “Asim Zeneli”, pranë ambasadës së SHBA-së;
•Rruga “Themistokli Gërmenji”, në fillim të rrugës;
•Rruga “Ismail Qemali”, te kryqëzimi i RTSH-së;
•Rruga “Lekë Dukagjini”, pranë ish-Gardës së Republikës, korridor hyrjeje për në parkimin e caktuar vetëm për mjetet e autorizuara nga FSHF-ja;
•Rruga “Abdyl Frashëri”, pranë kryqëzimit të Librit Universitar;
•Te sheshi “Willson”, devijohet lëvizja në drejtim të rrugës “Sami Frashëri”, pak para përfundimit të ndeshjes.

-Rruga e Elbasanit, Unaza dhe bulevardi “Bajram Curri” do të jenë të lira për lëvizjen e mjeteve.

Në zbatim të planit të masave, punonjësit e Policisë së Shtetit do të ushtrojnë kontroll të imtësishëm ndaj tifozëve, para futjes në stadium, me qëllim parandalimin e futjes në stadium, të banderolave me përmbajtje raciste, fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve/produkteve për përdorim kozmetik dhe sendeve të tjera të forta, të rrezikshme për jetën dhe shëndetin e pjesëmarrësve.

Kërkojmë mirëkuptimin e tifozëve që të paraqiten në hyrjet e stadiumit, duke filluar nga ora 18:00, pasi, për shkak të fluksit të tifozëve pak para fillimit të ndeshjes, mund të humbasin mundësinë për të hyrë në stadium.

Për mbarëvajtjen e këtij aktiviteti sportiv, Policia e Shtetit ka angazhuar qindra punonjës policie, të cilët do të garantojnë rendin dhe sigurinë publike, si dhe do t’u ofrojnë ndihmë dhe informacion, në rast nevoje, në mënyrë që ky aktivitet të përmbyllet pa incidente, në interes të imazhit të vendit.

The post Policia e Shtetit/Plan masash për garantimin e rendit dhe sigurisë, para, gjatë dhe pas zhvillimit të ndeshjes së futbollit ndërmjet ekipeve të Shqipërisë dhe Izraelit appeared first on Policia e Shtetit.