Gjatë kontrolleve në territoret e 5 njësive administrative, u gjetën dhe u asgjësuan 4639 bimë të dyshuara narkotike Cannabis Sativa.

Identifikohen dhe shpallen në kërkim 3 shtetas, të cilët dyshohet se kanë kultivuar 780 bimë narkotike në fshatin Bajzë dhe kanë lidhur në mënyrë të kundërligjshme energjinë elektrike në një banesë në funksion të kësaj veprimtarie kriminale.

Procedohen penalisht 5 kryetarë fshatrash, për shpërdorim të detyrës dhe moskallëzim të krimit, dhe 2 shtetas, për moskallëzim të krimit.

Shërbimet e Drejtorisë Vendore të Policisë Shkodër dhe të komisariateve në varësi vijojnë me intensitet kontrollet në të gjithë territorin e qarkut, në vijim të operacionit policor të koduar “Koordinata”, me qëllim goditjen e rasteve të kultivimit të bimëve narkotike. Si rezultat i kontrolleve:
-në territoret e njësive administrative Shosh dhe Pult, shërbimet e Komisariatit të Policisë Shkodër gjetën dhe asgjësuan 3092 bimë të dyshuara narkotike Cannabis Sativa. Në vijim të veprimeve procedurale, u referuan materialet në Prokurori ku nisi procedimi në gjendje të lirë për kryetarët e fshatrave Gimaj, Vuksanaj dhe Nicaj, shtetasit P. Sh., K. Gj. dhe M. M., për veprat penale “Shpërdorimi i detyrës” dhe “Moskallëzimi i krimit”; për shtetasin P. D., për veprën penale “Moskallëzimi i krimit.”

-Në territorin e njësisë administrative Kastrat, shërbimet e Komisariatit të Policisë Malësi e Madhe, në bashkëpunim me shërbimet e DVKM Shkodër, gjetën dhe asgjësuan 1274 bimë të dyshuara narkotike Cannabis Sativa. Në vijim të veprimeve u shpallën në kërkim shtetasit A. M., 57 vjeç, R. M., 30 vjeç, dhe R. M., 24 vjeç, banues në Bajzë, pasi dyshohet se kanë kultivuar 780 bimë narkotike që u gjetën në fshatin Bajzë dhe kanë lidhur në mënyrë të kundërligjshme energjinë elektrike në një banesë që kishin në përdorim, e vënë në funksion të kësaj veprimtarie kriminale. Gjithashtu, u referuan materialet në Prokurori ku nisi procedimi në gjendje të lirë për kryetarët e fshatrave Bajzë dhe Hot, shtetasit P. K. dhe A. H., për veprën penale “Shpërdorimi i detyrës”; për shtetasin P. S., për veprën penale “Moskallëzimi i krimit”.

-Në territorin e njësive administrative Shllak dhe Temal, shërbimet e Komisariatit të Policisë Vau i Dejës gjetën dhe asgjësuan 273 bimë të dyshuara narkotike Cannabis Sativa.

Vijon puna për identifikimin, kapjen dhe vënien para përgjegjësisë penale të autorëve të kultivimit të bimëve narkotike.

Operacioni antikanabis i koduar “Koordinata” vijon në të gjithë territorin e qarkut Shkodër.

#angazhimpërkushtimsakrificë
#tëvendosurkundërkrimit
#nëçdoskajtëvendit
#nëshërbimtëqytetarëve
#denonconë112

The post Shkodër/Vijon operacioni policor i koduar “Koordinata”, gjenden dhe asgjësohen 4639 bimë narkotike appeared first on Policia e Shtetit.

Finalizohet operacioni policor antidrogë i koduar “Aksi”, për goditjen e veprimtarisë kriminale në fushën e narkotikëve.

Kishte fshehur në motorrin e automjetit katër qese me lëndë narkotike dhe e transportonte për në Korçë me qëllim shitjen, kapet në flagracë dhe vihet në pranga një 32-vjeçar.

Seksioni për Hetimin e Narkotikëve i DVP Korçë, në vijim të punës për goditjen e veprimtarisë kriminale në fushën e narkotikëve në kuadër të operacionit të koduar “Aksi”, kapën dhe arrestuan në flagrancë shtetasin S. S., 32 vjeç, banues në fshatin Cangonj.

Ky shtetas u kap në aksin “Bilisht -Korçë”, duke transportuar me automjetin e tij 4 qese me kanabis (3 kilogramë) të cilat i kishte fshehur në pjesën e motorrit të automjetit.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

The post Korçë – Finalizohet operacioni policor antidrogë i koduar “Aksi” appeared first on Policia e Shtetit.

Vijon operacioni policor kombëtar i koduar “Sundimi i ligjit”, i cili ka si qëllim kapjen e shtetasve të shpallur në kërkim dhe të atyre që posedojnë armë zjarri, pa leje.

Ndalohen 4 shtetas të kërkuar për vepra të ndryshme penale:

një 32-vjeçar i dënuar me 3 vjet burgim, për mashtrim lidhur me TVSh-në;
një 38-vjeçar që i vodhi para 2 ditësh, automjetin tip “BMW”, një shtetasi italian, në Durrës. Ndalimi i 38-vjeçarit dhe gjetja e automjetit të vjedhur, u bënë në fshatin Manati, Lezhë, si rezultat i bashkëpunimit ndërmjet komisariateve të të dy qarqeve;
një shtetas, për përndjekje dhe një shtetas me masë sigurie, për dhunë në familje.

Si rezultat i kontrolleve dhe veprimeve të tjera procedurale të kryera me intensitet, nga shërbimet e Drejtorisë Vendore të Policisë Durrës, në vijim të operacionit policor kombëtar të koduar “Sundimi i ligjit”, si dhe me mbështetjen e informacioneve të siguruara nga inteligjenca policore, u vunë në pranga shtetasit:

-Regan Merdani, 32 vjeç, banues në Tiranë, i cili u lokalizua dhe u kap në lagjen nr. 4, pasi Gjykata e Apelit, Tiranë, e ka dënuar me 3 vjet burgim, për veprën penale “Krijimi i skemave mashtruese lidhur me tatimin mbi vlerën e shtuar”. Hetimet për 32-vjeçarin kanë nisur që në vitin 2016 dhe si rezultat i tyre është provuar se ky shtetas e kryente mashtrimin lidhur me TVSh-në, përmes një biznesi në fushat e prodhimit dhe tregtimit të produkteve ushqimore;

-E. J., 38 vjeç, pasi dyshohet së më datë 13.11.2023, ka vjedhur në lagjen nr. 18, një automjet tip “BMW”, në pronësi të një shtetasi italian, banues në Durrës. Si rezultat i koordinimit të informacioneve dhe veprimeve me shërbimet e Komisariatit të Policisë Lezhë, 38-vjeçari u vu në pranga në banesën e tij, në fshatin Manati, Lezhë, ku dhe u gjet automjeti i vjedhur. Vijojnë hetimet për të identifikuar shtetasit e tjerë që mund të jenë implikuar në këtë vjedhje.

-E. P., 33 vjeç, banues në Laç, pasi dyshohet se për rreth një vit, ka përndjekur një 24-vjeçare;

-D. M., 48 vjeç, banues në lagjen nr. 8, pasi Gjykata e Shkallës së Parë e Juridiksionit të Përgjithshëm Durrës i ka caktuar masën e sigurisë “Arrest në burg”, për veprën penale “Dhuna në familje”. 48-vjeçari akuzohet se në mars të vitit 2023, ka dhunuar bashkëshorten e tij.

Operacioni policor “Sundimi i ligjit”, vijon.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

The post Durrës – Vijon operacioni policor kombëtar i koduar “Sundimi i ligjit”, ndalohen 4 shtetas në kërkim appeared first on Policia e Shtetit.

DEA – Policia e Shtetit: bashkëpunim të shkëlqyer për goditjen e trafikimit të lëndëve narkotike nga grupet kriminale dhe të trafiqeve të tjera të paligjshme.

Pas takimit shumë të rëndësishëm të zhvilluar ditën e djeshme, me Ndihmës Sekretarin e Shtetit të SHBA-së, Todd Robinson, Drejtori i Përgjithshëm i Policisë së Shtetit u takua edhe me zv. administratorin e DEA-s, z. George Papadopoulos, gjatë Konferencës Vjetore të Shoqatës Ndërkombëtare të Shefave të Policisë, në San Diego, Kaliforni.

Kjo konferencë zhvillohet në një klimë shumë miqësore dhe përfaqëson një gamë të madhe aktivitetesh, që përfshin sesione me tematika të ndryshme, ekspozita të pajisjeve të avancuara për parandalimin dhe goditjen e krimit, ruajtjen e rendit dhe sigurisë, si dhe zhvillimin e takimeve bilaterale me drejtues të policive të vendeve të tjera, të institucioneve të agjencive të zbatimit të ligjit, shoqatave dhe organizatave që operojnë në fushën e parandalimit dhe luftës kundër krimit të organizuar dhe terrorizmit.

Në këtë konferencë, administratori i DEA-s shoqërohej nga drejtori i operacioneve të kësaj agjencie dhe nga agjenti special që mbulon Evropën dhe Ballkanin, me të cilin u diskutuan operacionet e suksesshme dhe mundësitë e forcimit të bashkëpunimin dypalësh.

Gjatë takimit, z. Papadopoulos nënvizoi se drejtuesit e DEA-s ndihen të nderuar që kanë një partner si Policia shqiptare, bashkëpunimi me të cilën është vendosur mbi baza të shëndosha të besimit reciprok. Ai theksoi se për vetë pozicionin gjeografik që Shqipëria ka dhe të rëndësisë strategjike si një nga rrugët e trafikimit të drogave të forta, është e domosdoshme që ky bashkëpunim të vijojë dhe të forcohet duke u ngritur në nivele më të larta të përfaqësimit.

Zoti Papadopoulos e përgëzoi Drejtorin e Përgjithshëm të Policisë, për rezultatet ambicioze të Policisë së Shtetit, në parandalimin dhe goditjen e veprimtarive kriminale në fushën e narkotikëve dhe për goditjen e rrjeteve të shpërndarjes së drogave në vend. Ai evidentoi se DEA ka vlerësuar në vijimësi se bashkëpunimi i ngushtë me agjencitë e zbatimit të ligjit në Shqipëri është gjëja e duhur, me vendin e duhur dhe me njerëzit e duhur. Ai e falënderoi Drejtorin e Përgjithshëm, për bashkëpunimin dhe mbështetjen që i është ofruar përfaqësuesve të kësaj zyre, të cilët mbulojnë Shqipërinë. Gjithashtu, z. Papadopoulos falënderoi Drejtorin e Përgjithshëm të Policisë dhe nëpërmjet tij strukturat për hetimin e krimit të organizuar, për efektivitetin në shkëmbimit të informacionit në kohë reale dhe reagimin e menjëhershëm për çdo informacion të marrë prej tyre.

Drejtori i Përgjithshëm i Policisë së Shtetit e falëndëroi z. Papadopoulos, për takimin, dhe i shprehu atij, mirënjohjen për DEA-n, për besimin që i është dhënë Policisë së Shtetit dhe veçanërisht për informacionet me vlerë që kanë shkëmbyer.

Drejtori i Përgjithshëm informoi përfaqësuesit e lartë të DEA-s, për zhvillimet në organizatën e Policisë së Shtetit, të cilat kanë sjellë mjaft ndryshime, qoftë strukturore ashtu edhe menaxheriale duke qenë se i përgjigjen në tërësinë e tyre zhvillimeve mjaft pozitive në institucionet e drejtësisë.

Gjatë takimit, Drejtori i Përgjithshëm siguroi përfaqësuesit e DEA-s se trafikimi i drogave sintetike, do të mbetet prioritet i strukturave të Policisë së Shtetit. Ai e vuri theksin në bashkëpunimin mjaft të mirë me përfaqësuesit e kësaj agjencie, me FBI-në dhe me CIA-n, për fushat e kompetencave të këtyre agjencive. Nga ana tjetër vlerësoi nevojën e domosdoshme për forcimin e këtij bashkëpunimi, për t’iu përgjigjur me sa më shumë efiçenca situatave të krijuara kohët e fundit, sidomos rritjes së aktivitetit kriminal të grupeve shqiptare të trafikimit të drogave, por çka është më e rëndësishme për parandalimin e krimeve të rënda, të cilat kanë ndodhur në Shqipëri për shkak mosmarrëveshjeve ndërmjet grupeve kriminale që ushtrojnë aktivitet kryesisht në vendet e origjinës së drogave të forta.

Drejtori i Përgjithshëm vijoi duke garantuar koleget e DEA-s se Policia e Shtetit do të vijojë të mbetet e përkushtuar për parandalimin dhe goditjen e drogave të forta dhe do të vijojë të jetë partner serioz dhe i besueshëm, tek i cili mund të mbështeten në çdo kohë dhe për çdo gjë. Ai falënderoi DEA-n, në mënyrë të veçantë për mbështetjen që i siguroi gjatë zhvillimit të operacionit të fundit policor, që mundësoi goditjen e një prej eksponentëve mjaft të njohur të krimit të organizuar, i cili ushtronte aktivitetin e tij kriminal gjatë 20 viteve të fundit në vendin tonë.

Në përfundim të takimit, z. Papadopoulos e ftoi Drejtorin e Përgjithshëm të Policisë së Shtetit, për një vizitë pranë zyrave të agjencisë në një kohë të përshtatshme në interes të hetimeve të përbashkëta.

The post Kaliforni, SHBA – Drejtori i Përgjithshëm takohet me zv. administratorin e DEA-s, z. George Papadopoulos appeared first on Policia e Shtetit.