Djali i Dëshmorit të Atdheut tashmë ka statusin “Fëmijë në përkujdesje të Republikës”.

Me rastin e ditëlindjes së djalit të Dëshmorit të Atdheut, Enea Mekolli, Drejtori i Përgjithshëm i Policisë së Shtetit, Drejtues Madhor Skënder Hita, i shoqëruar nga drejtues të lartë të Policisë së Shtetit, zhvilloi një vizitë në familjen Mekolli.

Skënder Hita:
“E di që asnjë fjalë dhe asnjë mbështetje nuk mund ta zëvendësojë Enean. Unë nuk jua kthej dot Enean tonë, por dua t’ju siguroj se nuk do të jeni kurrë vetëm. Unë, Policia e Shtetit, çdo punonjës policie, Ministria e Brendshme dhe Qeveria Shqiptare do të jemi gjithmonë pranë jush, për t’ju mbështetur në çdo nevojë dhe në çdo moment.
Djali i Eneas mbushi një vjeç. Është një ditëlindje e mbushur me dhimbje për mungesën e babait, por edhe me krenari për trashëgiminë që ai i ka lënë.
Djali i Dëshmorit tonë tashmë ka statusin “Fëmijë në përkujdesje të Republikës” dhe deri në përfundimin e arsimit të lartë, do të përfitojë pagën e plotë të Eneas, arsim dhe shërbim shëndetësor falas, si dhe të gjitha të drejtat e tjera që parashikon ligji. I urojmë jetë të gjatë, shëndet dhe mbarësi këtij engjëlli. Urojmë që të rritet me krenarinë se babai i tij dha jetën në shërbim të atdheut dhe të qytetarëve.”

Drejtori i Përgjithshëm i dorëzoi familjes dokumentacionin që njeh djalin e Dëshmorit me statusin “Fëmijë në përkujdesje të Republikës”, medaljen e mirënjohjes të akorduar Inspektorit Enea Mekolli për aktin sublim në krye të detyrës, si dhe çekun simbolik me vlerën 7 milionë lekë të rinj (shumë e transferuar në llogarinë bankare), kontribut i punonjësve të Policisë së Shtetit në shenjë solidariteti për familjen e Dëshmorit.

Skënder Hita:
“Ky është një kontribut i mbledhur me zemër nga punonjësit e Policisë së Shtetit, si një shenjë respekti, mirënjohjeje dhe solidariteti për sakrificën sublime të Eneas, si dhe mbështetje për familjen e Dëshmorit të Atdheut.

Ne kemi detyrimin moral dhe institucional të kujdesemi për familjen e tij dhe këtë detyrim do ta përmbushim me përgjegjësi dhe përkushtim.
Ju humbët djalin tuaj, ne humbëm një koleg, një mik dhe një punonjës policie shembullor. Por emri dhe sakrifica e Eneas nuk do të harrohen kurrë. Ne do të qëndrojmë pranë jush, ndërsa kujtimi i tij do të jetojë përherë në zemrat tona, në historinë e Policisë së Shtetit dhe në nderimin e gjithë shqiptarëve.”

Familjarët e Dëshmorit, mes dhimbjes dhe krenarisë, falënderuan Drejtorin e Përgjithshëm të Policisë së Shtetit, Drejtues Madhor Skënder Hita, për mbështetjen e vazhdueshme që nga dita kur Enea ra Dëshmor i Atdheut në krye të detyrës.

Ata shprehën mirënjohjen edhe për të gjithë punonjësit e Policisë së Shtetit për solidaritetin dhe kontributin e dhënë në mbështetje të familjes së tyre.

The post Drejtori i Përgjithshëm Skender Hita i dorëzon familjes së Dëshmorit të Atdheut, medaljen e mirënjohjes appeared first on Policia e Shtetit.

Drejtori i Përgjithshëm i Policisë së Shtetit, Drejtues Madhor Skënder Hita, vizitoi në Spitalin e Traumës punonjësit e tjerë të Policisë së Shtetit që mbetën të lënduar gjatë tubimit të zhvilluar sot para Parlamentit, në ushtrim të detyrës.

Gjatë vizitës, Drejtori i Përgjithshëm bisedoi me mjekët dhe me efektivët e lënduar për gjendjen e tyre shëndetësore, si dhe shprehu mirënjohjen për profesionalizmin, vetëpërmbajtjen dhe përkushtimin që treguan në përballimin e një situate të tillë të tensionuar.

Si pasojë e sulmeve me gurë, sende të forta dhe mjete piroteknike ndaj forcave të rendit, 15 punonjës policie pësuan lëndime gjatë ushtrimit të detyrës.

Drejtori Hita i siguroi efektivët për mbështetjen e plotë të institucionit dhe për garantimin e të gjithë kujdesit të nevojshëm mjekësor deri në rikuperimin e plotë të tyre, duke vlerësuar sakrificën dhe angazhimin e çdo punonjësi që shërben në mbrojtje të rendit dhe sigurisë publike.

Drejtues Madhor Skënder Hita theksoi se misioni i Policisë së Shtetit kërkon profesionalizëm, kurajo dhe përgjegjësi, duke nënvizuar se efektivët do të vijojnë ta ushtrojnë detyrën me vendosmëri, në zbatim të ligjit dhe në shërbim të qytetarëve, për të garantuar rendin, sigurinë publike, mbrojtjen e institucioneve të vendit dhe sundimin e ligjit, pa asnjë kompromis.

The post Drejtori i Përgjithshëm viziton sërish në Spitalin e Traumës, efektivët e dëmtuar gjatë tubimit appeared first on Policia e Shtetit.

Ata uruan shërim sa më shpejtë për 2 punonjësit e Policisë që po marrim mjekim në Spitalin e Traumës dhe për kolegun e tyre, i dëmtuar gjithashtu gjatë protestës, i cili po merr ndihmën mjekësore në QSUT.

The post Drejtori i Përgjithshëm Skender Hita vizitoi në spital, punonjësit e Policisë që u dëmtuan sot, gjatë protestës appeared first on Policia e Shtetit.

I nderuar Ministër i Punëve të Brendshme, z. Lamallari,

I nderuar Komandant i Forcës Detare, Kundëradmiral z. Mullaj,

Të nderuar kolegë të Guardia di Finanza,

Të dashur punonjës të Policisë së Shtetit,

Shqipëria po përjeton vitet e saj më të mira në turizëm. Miliona vizitorë zgjedhin vendin tonë jo vetëm për bukuritë natyrore, historinë dhe kulturën, por edhe sepse e perceptojnë atë si një vend mikpritës dhe të sigurt. Kjo është një arritje kombëtare, por njëkohësisht edhe një përgjegjësi e madhe për të gjitha institucionet e sigurisë dhe veçanërisht për Policinë e Shtetit.

Shifrat e larta të turizmit në Shqipëri, tashmë të konsoliduara prej vitesh, e bëjnë këtë takim të domosdoshëm dhe na vendosin përballë një realiteti të ri, ku duhet të shohim jo vetëm arritjet tona, por edhe përgjegjësitë dhe sfidat që na presin.

Viti 2025 tregoi një rritje të jashtëzakonshme të fluksit të turistëve, pushuesve dhe vizitorëve, ndërsa viti 2026 po dëshmon se Shqipëria është tashmë një destinacion i konsoliduar turistik rajonal dhe europian gjatë gjithë vitit.

Zgjedhja që miliona vizitorë bëjnë për Shqipërinë përkthehet drejtpërdrejt në përgjegjësi të lartë për të gjitha agjencitë e zbatimit të ligjit, për të garantuar një mjedis sa më të sigurt.

Për Policinë e Shtetit, menaxhimi i sezonit turistik mbetet prioritet absolut dhe shoqërohet me një angazhim të shtuar operacional në të gjithë territorin.

Për ne, ky fluks nuk është thjesht një ngarkesë pune. Ai është testi më i rëndësishëm i profesionalizmit tonë, i aftësisë për të garantuar sigurinë publike, për të ofruar shërbim me dinjitet dhe etikë dhe për të përmbushur me efikasitet detyrat tona funksionale.

Në këtë realitet të ri të zhvillimit të turizmit, etika në komunikim merr rëndësi të veçantë. Policia Kufitare dhe më pas Policia Rrugore janë kontaktet e para që një vizitor krijon me vendin tonë.

Uniforma jonë duhet të përfaqësojë autoritetin e ligjit, por njëkohësisht edhe mikpritjen, integritetin dhe mirësjelljen, si vlera të spikatura të shoqërisë shqiptare. Komunikimi profesional dhe etik është çelësi për të ndërtuar besimin e vizitorëve që në minutat e para të qëndrimit të tyre në Shqipëri.

Për të favorizuar këtë proces, Policia e Shtetit ka riorganizuar shërbimet dhe ka lehtësuar procedurat në bashkëpunim me fqinjët, për të reduktuar kohën e pritjes dhe burokracitë e tepërta.

Ky imazh pozitiv i ndërtuar në kufi duhet të pasqyrohet me të njëjtën vëmendje dhe në brendësi të territorit, veçanërisht në qendrat turistike ku përqendrimi i pushuesve është më i lartë. Në këto qendra, ne po aplikojmë me sukses, për të disatin vit tashmë, praninë e efektivëve me biçikleta, në zonat pedonale dhe përgjatë vijës bregdetare. Ky model rrit jo vetëm perceptimin mbi sigurinë, por dhe efikasitetin dhe komunikimin e drejtpërdrejtë me qytetarët.

Vëmendje e jashtëzakonshme po i kushtohet garantimit të sigurisë detare, dhe ujore në tërësi, nëpërmjet Njësisë Policore Detare, e cila prej 3 sezonesh tashmë, është njësi e konsoliduar e Policisë së Shtetit, në favor të zbatimit të ligjshmërisë në hapësirën ujore dhe mbrojtjes së jetës dhe shëndetit të qytetarëve në këtë hapësirë.

Njësia Policore Detare është në gatishmëri të plotë 24/7, dhe në këtë kuadër dua të falënderoj përzemërsisht kolegët e Guardia di Finanza, për mbështetjen që kanë ofruar gjatë gjithë këtyre viteve, veçanërisht për mbështetjen që kanë ofruar këtë vit për të siguruar gatishmërinë teknike të mjeteve të lundrimit që do të jenë në funksion të menaxhimit të sezonit turistik.
Patrullimet dhe monitorimet shtrihen përgjatë gjithë vijës bregdetare, në bashkëpunim dhe me rojën bregdetare që përvit është në mbështetjen tonë dhe të sigurisë detare. Gjej rastin t’i falënderoj për bashkëpunimin e shkëlqyer në funksion të rritjes së sigurisë, si dhe të parandalimit dhe goditjes së trafiqeve të paligjshme që tentojnë të zhvillohen në hapësirën ujore.

Ndryshe nga vitet e tjera, këtë sezon Njësia Policore Detare do mbështetet në mënyrë të integruar dhe nga ajri, me monitorim përmes dronëve, për të garantuar një kontroll më gjithëpërfshirës të territorit.

Theksoj me vendosmëri se nuk do të tolerohet asnjë lloj shkeljeje me mjete lundruese që rrezikon jetën e pushuesve. Kontrollet ndaj mjeteve lundruese, nga motorët e ujit, te skafet dhe anijet turistike, do të jenë të rrepta e të pandërprera, duke verifikuar me rigorozitet dokumentacionin, si dhe respektimin e korridoreve të sigurisë dhe vendbazimeve të miratuara.

Ndërkohë duke filluar nga ky sezon, po aplikojmë një risi të rëndësishme teknologjike, shërbimet tona do të kryejnë verifikimet dhe regjistrimet e mjeteve të huaja lundruese direkt në hapësirën detare, nëpërmjet tabletave të lidhura me sistemin TIMS, duke lehtësuar procedurat pa pasur nevojë që të bregëzohen apo paraqiten për regjistrim në pikat e kalimit kufitar.

Paralelisht me sigurinë në ujë, kontrolli ynë do të shtrihet me vendosmëri të plotë dhe mbi operatorët ekonomikë që zhvillojnë aktivitetin e tyre në bregdet dhe në zona turistike, në zbatim të detyrimeve në kuadër të Task Forcës Ndërinstitucionale të Sezonit Turistik.
Gjithashtu, parandalimi dhe goditja e krimeve mjedisore dhe parandalimi i ndotjes akustike në tejkalim të orarit dhe kufirit të përcaktuar me ligj janë të tjera sfida për shërbimet policore në terren.
Argëtimi i disave nuk mund dhe nuk duhet të prishë kurrsesi qetësinë e familjeve dhe qetësinë publike në tërësi, ndaj kontrollet ndaj subjekteve që zhvillojnë aktivitete që gjenerojnë muzikë, në zona urbane, turistike dhe bregdetare, do të jetë rutinë dhe i pandërprerë.

Ashtu siç e theksova që Shqipëria tashmë është pothuaj tërë vitin në sezon turistik, por gjatë verës shumëfishohet, një rol të rëndësishëm në sigurinë e jetës së vizitorëve dhe turistëve zënë Forca Kombëtare e Sigurisë, Policia Alpine, Delta Forcë dhe Forcat Speciale “RENEA”, të cilat përgjatë vitit 2025 dhe këtij 6-mujori, kanë kryer dhjetëra operacione kërkim-shpëtimi, mbeten në gatishmëri të plotë për çdo rast emergjence, operacion kërkim-shpëtimi apo ndërhyrje të specializuar, duke garantuar siguri shtesë për turistët dhe qytetarët në të gjithë territorin e vendit.

Siguria në tërësi do ishte e cunguar pa sigurinë rrugore. Rrugët e Shqipërisë sonë duhet të jenë sa më të sigurta dhe kjo arrihet me mënyrën e re të monitorimit të qarkullimit rrugor që tashmë po aplikojmë. Zero ndalime pa shkak dhe arsye, shtim në maksimum të teknologjisë me qëllim që të parandalohen aksidentet dhe të evidentohen dhe ndëshkohen shkelësit e kodit rrugor.

Të nderuar kolegë,

treguesit e vitit të kaluar shprehin se kemi bërë hapa të rëndësishëm përpara, për sa i përket përmbushjes së detyrave funksionale, element i cili ka bërë që pritshmëritë e qytetarëve, pushuesve dhe të vizitorëve, ndaj nesh, të jenë më të larta.

Siguria është komponent shumë i gjerë dhe kontribues janë të gjithë aktorët dhe faktorët që i ngarkon ligji, ndaj bashkëpunimi dhe koordinimi me pushtetin vendor, ministritë përkatëse dhe agjencitë e tjera të zbatimit të ligjit, është i domosdoshëm, që secili të bëjë atë çka i takon në funksion të sigurisë dhe imazhit.
Në këtë aspekt kërkoj nga ju të dashur kolegë, vigjilencë të shtuar në çdo pikë kalimi e në çdo stacion plazhi, si dhe qytetari, etikë, durim dhe humanizëm, në çdo fjalë përshëndetëse dhe fjali sqaruese që komunikoni me qytetarët, vizitorët e turistët nga mbarë bota.

Me përgjegjshmëri, profesionalizëm dhe përkushtim, jam besimplotë se këtë vit do të tregojmë shembullin e një policie moderne, europiane, të shpejtë në reagim dhe në shërbim të plotë të qytetarëve.

Në kuadër të rritjes së parametrave të sigurisë sot dua t’ju drejtohem disa fokusgrupeve që gjatë kësaj periudhe intensive kanë një rol të rëndësishëm në këtë drejtim.

Së pari, një ftesë të drejtpërdrejtë për qytetarët, aleatin tonë kryesor, besimin dhe bashkëpunimin me të cilët e kemi çelësin e realizimit të misionit tonë. Të nderuar qytetarë, vizitorë dhe pushues, gjatë sezonit turistik, çdo indicie prej jush, ka rëndësi jetike.

Mos ngurroni të bashkëpunoni me Policinë, për të raportuar menjëherë çdo paligjshmëri që hasni dhe çdo nevojë për ndihmë.

Të gjendur në çdo cep të Shqipërisë, asnjë telefonatë e juaja nuk do gjejë veshë të shurdhër dhe për këtë do të angazhohem personalisht dhe me të gjitha kapacitetet e Policisë së Shtetit.

Ndërkaq, ndaj kujtdo që lundron me mjet lundruese, kam thirrje për më shumë kujdes përgjegjësinë maksimale, pasi e kundërta mund të kushtojë përveç ndëshkimit administrativ, edhe cenimin e jetës dhe shëndetit.

Ndaj operatorëve dhe kujtdo që kryen veprimtari ekonomike gjatë sezonit, apeloj për lexim dhe zbatim të përpiktë të çdo porosie ligjore, pasi verifikimet dhe kontrollet do të jenë 24/7.

Së fundi, kërkoj nga ju, të dashur kolegë, drejtues menaxherialë dhe operacionalë, si dhe nga çdo punonjës policie që shërben 24/7 në terren, angazhim maksimal, përkushtim, guxim, humanizëm, etikë dhe përgjegjshmëri të lartë profesionale dhe ligjore.

Vetëm në këtë mënyrë do të forcojmë më tej besimin e qytetarëve, do të garantojmë sigurinë e pushuesve dhe do t’iu japim turistëve përvojën që meritojnë në një vend të sigurt, mikpritës dhe europian.

Le të bëhemi të gjithë ambasadorë të sigurisë, profesionalizmit dhe mikpritjes shqiptare, t’iu japim qytetarëve, besim, turistëve, siguri dhe Shqipërisë, imazhin që meriton.

Ky është misioni ynë dhe jam i bindur se do ta përmbushim me sukses. Më keni në krah në përmbushje të këtij misioni jetik.

Ju faleminderit dhe ju uroj një sezon turistik të sigurt dhe të mbarë.

The post Durrës/Drejtori i Përgjithshëm Skender Hita prezanton masat e Policisë, për sezonin veror 2026 appeared first on Policia e Shtetit.

Siguria e qytetarëve dhe e miliona turistëve që zgjedhin Shqipërinë mbetet prioritet

Policia e Shtetit, Policia Kufitare dhe Njësia Policore Detare do të jenë në terren me kapacitete të shtuara, teknologji moderne dhe gatishmëri të plotë për të garantuar rendin, sigurinë dhe një shërbim dinjitoz gjatë gjithë sezonit

The post Durrës/Prezantohen masat për garantimin e sigurisë gjatë sezonit veror 2026 appeared first on Policia e Shtetit.

Drejtori i Përgjithshëm i Policisë së Shtetit, Drejtues Madhor Skënder Hita, mirëpriti në ambientet e DPPSh-së Ambasadorin Ventura, të shoqëruar nga Atasheu i Ministrisë së Brendshme të Spanjës dhe nga Oficeri Ndërlidhës pranë Ambasadës së Spanjës në Tiranë.

Gjatë takimit u vlerësuan marrëdhëniet e shkëlqyera dhe partneriteti strategjik i ndërtuar ndër vite ndërmjet dy vendeve në fushën e sigurisë, duke vënë theksin te mekanizmat efektivë dhe konkretë si operacioni “Nomada” dhe Skuadra e Përbashkët Hetimore, me rezultate të prekshme në luftën kundër trafikimit të narkotikëve dhe armëve të zjarrit, si dhe lëvizjes së paligjshme të emigrantëve.

Drejtori Hita konfirmoi vendosmërinë e Policisë së Shtetit për ta intensifikuar këtë bashkëpunim, përmes rritjes së numrit të operacioneve të përbashkëta dhe zgjerimit të shkëmbimit të informacionit në kohë reale.

Gjithashtu, ai vuri theksin te bashkëpunimi ndërmjet Akademisë së Sigurisë dhe Shkollës Kombëtare të Policisë së Spanjës, i cili do të shërbejë për modernizimin e mësimdhënies dhe trajnimin profesional të brezit të ri të efektivëve me metoda dhe kurrikula bashkëkohore.

Ndërkohë, Ambasadori Ventura shprehu mirënjohje për mikpritjen dhe vlerësoi angazhimin e Policisë së Shtetit si një partner i besueshëm në rajon. Ai konfirmoi gjithashtu gatishmërinë e autoriteteve spanjolle për të intensifikuar bashkëpunimin me Policinë e Shtetit në fusha të tjera, me objektivin e përbashkët goditjen e krimit ndërkombëtar dhe garantimin e sigurisë së qytetarëve.

The post Ambasadori i Spanjës, Sh. T. Z. Gabriel Cremades Ventura, vizitë në Drejtorinë e Përgjithshme të Policisë së Shtetit appeared first on Policia e Shtetit.

Të nderuar përfaqësues të EVU-së, i nderuar Drejtor i Drejtorisë së Përgjithshme të Shërbimeve të Transportit Rrugor, të nderuar ekspertë të fushës së sigurisë rrugore, përfaqësues të shoqërive të sigurimit, autoshkollave dhe institucioneve arsimore, kolegë dhe të ftuar,

Është kënaqësi dhe përgjegjësi e veçantë t’ju përshëndes sot në këtë aktivitet të përbashkët me Shoqatën Evropiane për Kërkimin dhe Analizën e Aksidenteve. Prania juaj këtu dëshmon se siguria rrugore nuk njeh kufij dhe se sfidat tona janë të përbashkëta.

Siguria rrugore nuk është thjesht një sfidë institucionale. Ajo është një përgjegjësi e përbashkët, një detyrim moral dhe një garanci për jetën e çdo qytetari që lëviz në rrugë.

Sot nuk jemi këtu për një aktivitet sensibilizues të radhës, por për diçka shumë më të shtrenjtë, për jetën. Çdo humbje jete në statistikat tona të aksidenteve nuk është thjesht një numër, është një jetë e ndërprerë në mes, është një familje e lënduar. Drejtuesit e automjeteve, motomjeteve dhe këmbësorët duhet të ndërgjegjësohen dhe të zbatojnë me rigorozitet rregullat e qarkullimit, pasi rruga nuk është një pistë garash, por një hapësirë bashkëjetese ku përgjegjshmëria e secilit prej nesh përcakton nëse do të kthehemi shëndoshë e mirë në shtëpi, te njerëzit tanë, ose jo.

Për të përmbushur një ndër prioritetet madhore të Policisë së Shtetit, siç është rritja e parametrave të sigurisë rrugore, dua të ndalem te një iniciativë e rëndësishme që kemi ndërmarrë në mënyrën se si e kontrollojmë qarkullimin. Koha e ndalimeve pa shkak apo e “gjuetisë” së gjobave ka mbaruar.

Sot, Policia e Shtetit ka hyrë në epokën e monitorimit inteligjent. Strategjia jonë e re bazohet në parimin, fajtorin e përcakton teknologjia, jo intuita.

Nëpërmjet mjeteve inteligjente si pajisjet “Poliscan”, dronët e cilësisë së lartë dhe radarët automatikë, ne evidentojmë shkeljet në kohë reale pa ndërprerë rrjedhën e trafikut dhe pa krijuar stres të panevojshëm te drejtuesit e rregullt të mjeteve. Ky është një hap i rëndësishëm drejt një policimi më profesional, më të saktë dhe më transparent, por, teknologjia nuk na shpëton dot nëse mungon vetëdija. Prandaj, gjej rastin t’iu bëj një thirrje të gjithë drejtuesve të mjeteve:
-Shpejtësia vret. Mos nxitoni për të mbërritur disa minuta më parë, duke rrezikuar të mos mbërrini kurrë ose të mbërrini të gjymtuar!
-Parakalimet e gabuara janë lojë me jetën;
-Celulari në timon ju verbon për sekonda që mund të jenë fatale, dhe mbi të gjitha
-Alkooli dhe substancat e tjera nuk kanë vend në timon! Kush drejton automjetin nën efektin e tyre, nuk po drejton një makinë, por një armë që rrezikon të vrasë jetën.

Po aq i rëndësishëm është edhe dimensioni i parandalimit dhe edukimit. Mesazhet sensibilizuese për drejtuesit e mjeteve janë thelbësore për të ndryshuar sjelljen në rrugë dhe për të rritur ndërgjegjësimin publik.

Një rol të veçantë në këtë proces ka bashkëpunimi me institucionet arsimore. Nxënësit dhe të rinjtë janë brezi që formëson kulturën e ardhshme të qarkullimit rrugor, ndaj edukimi i tyre që në moshë të hershme është investimi më i rëndësishëm për një Shqipëri më të sigurt.

Kjo është arsyeja pse ne po bashkëpunojmë fort me institucionet arsimore, sepse fëmijët dhe nxënësit tanë kanë një impakt të jashtëzakonshëm sensibilizues. Kur një fëmijë i thotë prindit në makinë, “Vendos rripin!” apo “Mos fol në telefon!”, ai mesazh vlen më shumë se dhjetëra gjoba të Policisë.

Ky aktivitet merr një rëndësi akoma më specifike sot, teksa jemi në kulmin e sezonit turistik dhe siguria rrugore ka një rëndësi të veçantë në mbarëvajtjen e këtij sezoni, pavarësisht se vitet e fundit Shqipëria është pothuajse tërë vitin, në sezon turistik.

Për këtë fakt, Policia e Shtetit është në gatishmëri të plotë. Kemi hartuar plane të detajuara masash për menaxhimin e fluksit të madh të automjeteve që gjatë verës shumëfishohen. Fokusimi ynë do të jetë maksimal në pikat nevralgjike të trafikut, në akset bregdetare dhe turistike, duke bërë të mundur rritjen e parametrave të sigurisë rrugore, lehtësimin e qarkullimit dhe një shërbim mikpritës e më profesional për çdo qytetar dhe turist që zgjedh vendin tonë.

Të nderuar të pranishëm,

As Policia e Shtetit dhe as teknologjia inteligjente nuk mund ta fitojnë këtë betejë pa kontributin e të gjithëve. Siguria rrugore është një kontratë sociale ku secili ka një pjesë të detyrës.

Është kontribut i këmbësorëve, që duhet të respektojnë vijat e bardha dhe mbikalimet.

Është kontribut i drejtuesve të motomjeteve që duhet të vendosin kaskën, dhe i drejtuesve të automjeteve që të respektojnë përparësinë në lëvizje dhe zbatojnë me rigorozitet rregullat e qarkullimit rrugor.

Është kontribut i autoshkollave, që nuk duhet të nxjerrin në rrugë thjesht njerëz me patentë, por shoferë të përgjegjshëm.

Është kontribut i shkollave, i çdo prindi, i institucioneve përgjegjëse dhe i mbarë shoqërisë. Çdo qytetar duhet të kuptojë se siguria rrugore fillon nga vetë përgjegjësia personale.

Duke bërë secili pjesën e vet, duke ndarë eksperiencat më të mira sensibilizuese, si kjo e sotmja me EVU-në, dhe duke rritur bashkëpunimin ndërinstitucional dhe bashkëpunimin me qytetarët, do të kemi rrugë më të sigurta dhe më shumë jetë të shpëtuara.

Faleminderit!

The post Tiranë/Policia e Shtetit dhe EVU, aktivitet sensibilizues për sigurinë rrugore appeared first on Policia e Shtetit.

Gjatë takimit u vlerësua niveli shumë i lartë i bashkëpunimit ndërmjet Policisë së Shtetit dhe autoriteteve policore italiane, si dhe rezultatet konkrete të arrira në luftën kundër krimit të organizuar, trafikimit të narkotikëve, pastrimit të produkteve të veprës penale dhe kapjes së shtetasve në kërkim ndërkombëtar.

Një vlerësim i veçantë iu bë dhe funksionimit të skuadrave të përbashkëta hetimore. Për këtë aspekt, Policia shqiptare ka numrin më të madh të këtyre skuadrave me autoritetet italiane, tregues që dëshmon nivelin e lartë të besimit reciprok dhe efektivitetin e bashkëpunimit mes dy policive.

Po ashtu, palët vlerësuan bashkëpunimin e suksesshëm për monitorimin ajror dhe goditjen e kultivimit të bimëve narkotike, model i cili ka dhënë rezultate të prekshme dhe është vlerësuar gjerësisht nga partnerët ndërkombëtarë.

Drejtori i Përgjithshëm i Policisë së Shtetit shprehu mirënjohjen për mbështetjen e vazhdueshme që autoritetet italiane i kanë dhënë Policisë së Shtetit, ndër vite, si në aspektin operacional, ashtu edhe për ngritjen e kapaciteteve profesionale. Në takim u vlerësua gjithashtu mbështetja e partnerëve italianë për Akademinë e Sigurisë, veçanërisht nëpërmjet përdorimit të literaturës profesionale italiane në programet mësimore, si dhe shkëmbimit të eksperiencave dhe praktikave më të mira në fushën e edukimit policor.

Palët riafirmuan angazhimin për forcimin e mëtejshëm të partneritetit strategjik, rritjen e shkëmbimit të informacionit dhe zhvillimin e iniciativave të reja të përbashkëta për përballimin e sfidave të sigurisë me karakter ndërkombëtar.

The post Drejtori i Përgjithshëm i Policisë së Shtetit Skender Hita priti në takim 2 drejtues të Policisë italiane appeared first on Policia e Shtetit.

Drejtori i Përgjithshëm i Policisë së Shtetit, Drejtues Madhor Skender Hita, i shoqëruar nga Drejtoresha e Përgjithshme e Spitalit Universitar të Traumës, zj. Edlira Bode, vizitoi sot, në Spitalin e Traumës, punonjësin e Policisë Edison Adri, i cili mbeti i plagosur më datë 4 qershor, gjatë një operacioni të rrezikshëm në Malin Boden, Maliq, për kapjen e një shtetasi me rrezikshmëri të lartë. Gjatë këtij operacioni humbi jetën, në krye të detyrës, punonjësi i Policisë, tashmë Dëshmor i Atdheut, Enea Mekolli.

Gjatë vizitës, Drejtori i Përgjithshëm i shprehu mbështetjen maksimale efektivit të plagosur në detyrë, dhe i uroi shërim sa më të shpejtë.

Skender Hita:

“Erdha sot këtu për të të shtrënguar dorën, Edison, për të të uruar shërim sa më të shpejtë dhe për të të shprehur mirënjohjen më të thellë për guximin, përkushtimin dhe trimërinë e jashtëzakonshme që tregove gjatë përballjes me rrezikun.

Humbja e kolegut tonë të shtrenjtë, Enea Mekolli, i cili ra në krye të detyrës dhe sot është Dëshmor i Atdheut, është një dhimbje e madhe për të gjithë familjen e Policisë së Shtetit. Fatmirësisht, ti i mbijetove sulmit me armë dhe sot je mes nesh, duke na dhënë forcë dhe shpresë.

Mbështetja jonë, por edhe e qytetarëve që respektojnë ligjin dhe duan rendin dhe sigurinë, do të jetë e palëkundur për ty dhe për familjen e Eneas.

Dua t’i garantoj të gjithë punonjësit e Policisë së Shtetit që shërbejnë çdo ditë me integritet dhe sakrificë, se do të kenë gjithmonë mbështetjen time të plotë, në çdo kohë dhe përballë çdo sfide.

Qytetarëve iu garantoj se, pavarësisht rrezikut dhe kostove njerëzore që kjo luftë mund të sjellë, ne nuk do të tërhiqemi asnjë hap përballë krimit. Do të vazhdojmë të jemi në vijën e parë, me vendosmëri, profesionalizëm dhe dinjitet, për të luftuar krimin dhe për të garantuar sigurinë e qytetarëve.”

Gjatë vizitës së Drejtorit, punonjësi i Policisë Edison Adri u shpreh:

“Faleminderit shumë z. Drejtor! Interesimi, përkujdesja dhe ardhja juaj përsëri sot këtu tregojnë shumë dhe janë një shpresë e madhe për mua dhe për të gjithë Policinë. Jemi të gjithë bashkë në luftën kundër krimit dhe në shërbim të qytetarëve. Mirënjohje për ju z. Drejtor, për Ministrinë e Punëve të Brendshme, si dhe për të gjithë stafin mjekësor për gjithçka kanë bërë dhe vazhdojnë të bëjnë për mua.”

Ndërkaq, Drejtoresha e Përgjithshme e Spitalit Universitar të Traumës, zj. Bode theksoi:

“Edisoni është më mirë. Kemi bërë më të mirën, brenda mundësive tona. E mira nuk ka fund, por stafi këtu ka bërë një punë të shkëlqyer. Jemi të përkushtuar që t’i ofrojmë atij kujdesin më të mirë deri në rikuperimin e plotë.”

The post Drejtori i Përgjithshëm Skender Hita viziton në spitalin e Traumës, punonjësin e Policisë Edison Adri appeared first on Policia e Shtetit.

Drejtori i Përgjithshëm i Policisë së Shtetit, Drejtues Madhor Skender Hita, ka vlerësuar me Certifikatën e Karrierës, punonjësit e strukturave të DVP Fier, Nënkomisar Vasillaq Ziu dhe Nënkomisar Agron Nako, të cilët përfunduan karrierën e tyre pas 40 vitesh shërbim në strukturat e Policisë së Shtetit.

Gjatë ceremonisë së zhvilluar në ambientet e Drejtorisë Vendore e Policisë Fier, Drejtori i DVP Fier, Drejtues Erion Ahmeti, dhe zëvendësdrejtori për Hetimin e Krimit, Kryekomisar Alket Ahmetaj, në emër të Drejtorit të Përgjithshëm të Policisë së Shtetit, iu dorëzuan Certifikatat e Karrierës, nënkomisarëve Vasillaq Ziu dhe Agron Nako, me motivacionin “Për kontributin e vyer të dhënë gjatë viteve të punës në radhët e Policisë së Shtetit.”

Gjatë karrierës së tyre 40-vjeçare, oficerët Vasillaq Ziu dhe Agron Nako janë dalluar për profesionalizëm, korrektësi dhe integritet, duke shërbyer me përkushtim dhe duke u bërë shembull për kolegët dhe brezat e rinj të punonjësve të Policisë së Shtetit.

Në përfundim të ceremonisë, dy efektivët falënderuan drejtuesit, për certifikatën e akorduar, si dhe iu uruan kolegëve të tyre, suksese të mëtejshme në përmbushjen e detyrave.

The post Fier/Drejtori i Përgjithshëm Skender Hita vlerëson me Certifikatën e Karrierës, 2 punonjës të DVP fier appeared first on Policia e Shtetit.