Drejtori i Përgjithshëm Archives - Policia e Shtetit

Letër e hapur për punonjësit e Policisë së Shtetit, nga Drejtori i Përgjithshëm Skënder Hita

administrator — Mon, 19 Oct 2026 11:20:46 +0000

Të dashur kolegë,

Prej gjashtë ditësh po përballeni me situata të vështira, me orë të gjata shërbimi, tension dhe akte të rënda dhune. Shumë prej jush janë lënduar në krye të detyrës.

Sot dua t’ju shpreh personalisht mirënjohjen, respektin dhe mbështetjen time të plotë.

E di se pas çdo uniforme është një njeri, një prind, një bashkëshort, një bir apo një bijë, që dikush e pret me shqetësim në shtëpi.

Asnjë sulm ndaj jush nuk është i pranueshëm. Asnjë akt dhune nuk mund të justifikohet.

Ju kërkoj të vijoni detyrën me profesionalizëm, qetësi dhe vendosmëri, duke respektuar në çdo moment ligjin dhe dinjitetin e çdo qytetari.

U uroj shërim të shpejtë kolegëve të plagosur dhe ju siguroj se nuk do të jeni vetëm në përballimin e këtyre sfidave.

Jam krenar për çdo punonjës policie që i shërben vendit me ndershmëri dhe përkushtim.

Qëndroni të fortë, të bashkuar dhe besnikë ndaj misionit tuaj.

Me respekt dhe mirënjohje,

Skënder Hita

Drejtor i Përgjithshëm i Policisë së Shtetit

The post Letër e hapur për punonjësit e Policisë së Shtetit, nga Drejtori i Përgjithshëm Skënder Hita appeared first on Policia e Shtetit.

Deklaratë e Drejtorit të Përgjithshëm të Policisë së Shtetit, Drejtues Madhor Skender Hita

administrator — Sun, 18 Oct 2026 19:11:28 +0000

Të nderuar qytetarë,

Në orët e mbrëmjes, Komisariati i Policisë Nr. 3 në Tiranë u bë objekt i një sulmi të rëndë dhe të paprecedentë nga grupe personash të maskuar, të cilët përdorën bomba molotov, lëndë piroteknike, gurë dhe sende të forta kundër godinës dhe punonjësve të Policisë.

Si pasojë e këtij sulmi, mbetën të plagosur 10 punonjës të Policisë, të cilët ndodheshin në krye të detyrës, në shërbim të ruajtjes dhe sigurisë së Komisariatit. Dua të theksoj se këta punonjës nuk kishin qenë të angazhuar në veprimet policore gjatë ditëve të mëparshme të protestave.

Sulmi krijoi një rrezik serioz jo vetëm për jetën dhe shëndetin e punonjësve të Policisë, por edhe për personat e shoqëruar që ndodheshin brenda ambienteve të Komisariatit.

Dua të jem shumë i qartë për të gjithë se sulmi ndaj një komisariati policie nuk është protestë.

Goditja e punonjësve të Policisë me bomba molotov dhe mjete të tjera të rrezikshme është dhunë e rëndë, e cila dënohet nga ligji dhe nuk mund të justifikohet në asnjë rrethanë.

Edhe gjatë ditës së sotme janë regjistruar sulme të tjera ndaj punonjësve të Policisë, me përdorimin e gurëve, lëndëve piroteknike, sferave metalike dhe bombave molotov, duke shkaktuar plagosjen e disa punonjësve të tjerë.

Prej gjashtë ditësh, punonjësit e Policisë së Shtetit po përballen me akte të përsëritura dhune, ndërkohë që vijojnë të përmbushin detyrën e tyre për garantimin e rendit dhe sigurisë publike.

Dhuna ndaj punonjësve të Policisë, sulmet ndaj institucioneve dhe rrezikimi i jetës së njerëzve nuk mund të tolerohen.

Policia e Shtetit po punon për identifikimin e të gjithë personave të përfshirë në këto sulme, dokumentimin e veprimeve të tyre dhe referimin e provave pranë organeve kompetente të drejtësisë.

Çdo person për të cilin provohet përgjegjësia penale do të përballet me pasojat që parashikon ligji.

Askush nuk mund ta përdorë të drejtën kushtetuese të protestës si mburojë për të ushtruar dhunë, për të sulmuar punonjësit e Policisë apo për të shkatërruar pronën publike dhe private.

E drejta për të protestuar në mënyrë paqësore është e garantuar dhe Policia e Shtetit ka detyrimin ta mbrojë atë. Por po aq i qartë është detyrimi ynë për të ndërhyrë, në përputhje me ligjin, ndaj çdo veprimi që cenon jetën, sigurinë dhe rendin publik.

Kam udhëzuar të gjitha strukturat policore të vijojnë përmbushjen e detyrës me profesionalizëm, vetëpërmbajtje dhe vendosmëri, duke respektuar rigorozisht ligjin, procedurat standarde dhe parimin e proporcionalitetit.

Vendosmëria për të ndaluar dhunën duhet të shoqërohet në çdo rast me respektimin e ligjit dhe të drejtave të qytetarëve.

U bëj thirrje të gjithë personave të përfshirë në veprime të dhunshme që t’i ndërpresin menjëherë ato. Çdo sulm i mëtejshëm ndaj punonjësve të Policisë, institucioneve apo pronës së qytetarëve do të marrë përgjigjen e parashikuar nga ligji.

Njëkohësisht, u drejtohem të gjithë qytetarëve, veçanërisht atyre që ushtrojnë në mënyrë paqësore të drejtën e protestës, që të distancohen nga personat që përdorin dhunën dhe të mos lejojnë që veprimet e tyre të rrezikojnë sigurinë e të tjerëve.

Policia e Shtetit nuk është kundërshtare e qytetarëve. Ajo është në shërbim të tyre.

Nuk duhet dhe nuk mund të krijohet një klimë armiqësie ndërmjet qytetarëve dhe punonjësve të Policisë. Besimi dhe bashkëpunimi me publikun janë themeli i misionit tonë.

U shpreh mbështetjen time të plotë të gjithë punonjësve të Policisë që, pavarësisht vështirësive dhe rrezikut, po vijojnë të përmbushin detyrën me përkushtim.

U uroj shërim të shpejtë kolegëve të plagosur dhe shpreh mirënjohje për profesionalizmin dhe sakrificën e çdo punonjësi policie që është sot në shërbim të qytetarëve.

Në përfundim, dua të siguroj qytetarët se Policia e Shtetit është dhe do të mbetet në krye të detyrës.

Nuk do të tërhiqemi përballë dhunës dhe nuk do të lejojmë që sulmet ndaj institucioneve të cenojnë përmbushjen e misionit tonë.

Do të veprojmë me vendosmëri, profesionalizëm dhe përgjegjësi, gjithmonë brenda kufijve të ligjit.

Siguria e qytetarëve, mbrojtja e jetës dhe garantimi i rendit publik janë detyrimi ynë dhe përgjegjësia jonë e panegociueshme.

Faleminderit!

The post Deklaratë e Drejtorit të Përgjithshëm të Policisë së Shtetit, Drejtues Madhor Skender Hita appeared first on Policia e Shtetit.

Drejtori i Përgjithshëm i Policisë së Shtetit, Drejtues Madhor Skender Hita, konferencë për median

administrator — Sat, 17 Oct 2026 16:50:41 +0000

Përshëndetje!

Prej pesë ditësh, Policia e Shtetit po përballet me akte dhune gjatë tubimeve, ku persona të maskuar dhe të dhunshëm kanë sulmuar për orë të gjata punonjësit e Policisë dhe institucionet publike, si dhe kanë dëmtuar pronën publike dhe private.

Në mënyrë të vazhdueshme, Policia e Shtetit u ka bërë thirrje pjesëmarrësve në protesta që të distancohen nga dhuna dhe personat e maskuar, si dhe të ushtrojnë të drejtën e tyre kushtetuese për tubim në mënyrë paqësore.

Njëkohësisht, u është kërkuar pjesëmarrësve në tubime të mos bëhen pjesë e veprimeve të personave që synojnë të nxisin dhunën dhe shkatërrimin.

Gjatë këtyre ditëve, strukturat e Policisë kanë kryer veprime hetimore dhe procedurale në disa qytete të vendit, me qëllim identifikimin dhe nxjerrjen përpara përgjegjësisë penale të personave të përfshirë në akte dhune, shkatërrimin e pronës dhe sulmet ndaj punonjësve të Policisë.

Si rezultat i këtyre veprimeve, janë arrestuar 167 shtetas dhe janë proceduar penalisht 388 shtetas të tjerë.

Paralelisht, janë pezulluar nga detyra 7 punonjës policie dhe ndaj tyre ka nisur menjëherë hetimi disiplinor për tejkalim të detyrës, mosrespektim të parimit të proporcionalitetit dhe mënyrën e trajtimit të një protestuesi nga ana e punonjësve të Policisë.

Dua t’i siguroj qytetarët se asnjë punonjës policie nuk ka marrë urdhër, në asnjë moment dhe në asnjë rrethanë, për të vepruar në kundërshtim me procedurat standarde të punës. Çdo rast i evidentuar i tejkalimit të kompetencave apo mosrespektimit të këtyre procedurave do të trajtohet sipas ligjit.

Punonjësit e Policisë janë instruktuar vazhdimisht që, në çdo rast ndërhyrjeje apo vetëmbrojtjeje ndaj sulmeve, të zbatojnë me rigorozitet procedurat standarde të punës dhe parimin e proporcionalitetit.

Gjatë tubimeve të dhunshme, ashtu si në vendet e Bashkimit Evropian, Policia e Shtetit përdor mjetet e përcaktuara nga legjislacioni dhe procedurat standarde të punës për garantimin e rendit dhe sigurisë, si dhe për mbrojtjen e punonjësve të Policisë. Përdorimi i këtyre mjeteve bëhet në përputhje me kuadrin ligjor dhe në raport me shkallën e rrezikut.

Dua të theksoj se, gjatë ditëve të tubimeve, punonjësit e Policisë janë sulmuar me gurë, pllaka guri, sende metalike, zara metalikë të hedhur me llastikaë, lëndë piroteknike, bomba molotov dhe sende të tjera.

Si pasojë e dhunës së ushtruar ndaj punonjësve të Policisë, kryesisht në Tiranë, por edhe në Shkodër dhe Lezhë, janë dëmtuar 132 punonjës policie. Disa prej tyre vijojnë të marrin ndihmë mjekësore në spital.

Gjithashtu, dua të bëj me dije se në rrjetet sociale, kryesisht në grupe të hapura së fundmi në Telegram, po bëhen thirrje të vazhdueshme për ushtrimin e dhunës ndaj punonjësve të Policisë. Këto thirrje, sipas të dhënave që disponohen në kuadër të hetimeve penale, synojnë nxitjen e sulmeve me çdo mjet të mundshëm, përfshirë lëndë djegëse dhe plasëse.

Edhe gjatë paradites së sotme, në këto rrjete janë publikuar thirrje që protestuesit e maskuar të sigurojnë mjete të ndryshme për të sulmuar Policinë dhe për t’u vënë zjarrin automjeteve të saj.

Përballë kësaj situate, në zbatim të ligjit dhe në përmbushje të detyrës, Policia e Shtetit ka marrë masat për identifikimin dhe kapjen e personave të përfshirë në këto veprime, si dhe për t’iu përgjigjur çdo akti kriminal me forcën e ligjit, në mbrojtje të punonjësve të Policisë, institucioneve shtetërore dhe pronës publike e private.

Në funksion të garantimit të rendit dhe sigurisë publike, si dhe të mbrojtjes së jetës dhe pronës, u bëj thirrje personave që kryejnë këto akte dhune të ndalojnë menjëherë veprimet e tyre të paligjshme. Njëkohësisht, u bëj thirrje qytetarëve të distancohen nga personat e dhunshëm, të cilët nuk përfaqësojnë studentët dhe aspiratat e tyre.

Të nderuar qytetarë!

Policia e Shtetit nuk është, në asnjë rrethanë, kundër qytetarëve, medias, studentëve apo fëmijëve tanë. Përkundrazi, ajo është në mbështetje të së drejtës kushtetuese për të protestuar dhe për t’u tubuar në mënyrë paqësore.

U bëj thirrje prindërve dhe familjarëve që të mos lejojnë përfshirjen e fëmijëve të mitur në protesta ku ekziston rreziku i përshkallëzimit të dhunës. Fëmijët nuk duhet të ekspozohen ndaj rrezikut dhe as të përdoren si mburojë nga persona të dhunshëm e të maskuar. Siguria e tyre duhet të jetë mbi gjithçka.

Policia e Shtetit do të vijojë të zbatojë ligjin, të mbrojë jetën dhe pronën e qytetarëve, institucionet publike dhe të drejtën kushtetuese për tubim paqësor.

Siguria e qytetarëve, mbrojtja e jetës dhe e pronës dhe zbatimi i ligjit mbeten detyrimet tona të panegociueshme.

Faleminderit!

https://youtu.be/s9ZuGjNFDXc

The post Drejtori i Përgjithshëm i Policisë së Shtetit, Drejtues Madhor Skender Hita, konferencë për median appeared first on Policia e Shtetit.

Drejtori i Përgjithshëm Skender Hita viziton punonjësit e Policisë të dëmtuar gjatë tubimit

administrator — Wed, 14 Oct 2026 20:20:40 +0000

Drejtori i Përgjithshëm i Policisë së Shtetit, Drejtues Madhor Skender Hita, viziton punonjësit e Policisë të dëmtuar gjatë tubimit të zhvilluar ditën e sotme

Pas përfundimit të tubimit të dhunshëm, Drejtori i Përgjithshëm i Policisë së Shtetit, Drejtues Madhor Skender Hita, vizitoi në Spitalin e Traumës punonjësit e Policisë të dëmtuar si pasojë e sulmeve me gurë, sende të forta dhe bomba molotov nga pjesëmarrës të maskuar, të cilët për më shumë se 14 orë sulmuan punonjësit e Policisë dhe vunë në rrezik sigurinë e tyre.

Drejtori Hita u uroi punonjësve të dëmtuar shërim të shpejtë, i falënderoi për profesionalizmin, përgjegjësinë dhe përmbajtjen e treguar përballë sulmeve të pandërprera, si dhe i siguroi për mbështetjen e plotë të tij dhe të institucionit që drejton.

Drejtori Hita bisedoi edhe me stafin drejtues të spitalit dhe ekipin mjekësor, nga të cilët u informua se punonjësit e Policisë që kanë pësuar dëmtime më të rënda dhe do të vijojnë të qëndrojnë në spital, po marrin trajtimin e duhur mjekësor.

Gjatë tubimit të dhunshëm të ditës së sotme, u dëmtuan 51 punonjës policie, të cilët ishin në krye të detyrës për garantimin e rendit dhe sigurisë publike.

Shërbimet e Policisë, deri në këto momente, kanë shoqëruar për veprime të mëtejshme 65 shtetas pjesëmarrës në tubim, të dyshuar për sulme ndaj punonjësve të Policisë, institucioneve dhe pronës publike e private.

Policia e Shtetit do të vijojë veprimet ligjore për identifikimin e të gjithë personave të përfshirë në aktet e dhunës dhe vënien e tyre përpara përgjegjësisë ligjore.

https://youtu.be/1IqOVpFBJRM

The post Drejtori i Përgjithshëm Skender Hita viziton punonjësit e Policisë të dëmtuar gjatë tubimit appeared first on Policia e Shtetit.

Maqedoni e Veriut/Skender Hita dhe Victoria Pullen: Task Forca, modeli më i suksesshëm i bashkëpunimit

administrator — Fri, 09 Oct 2026 15:09:50 +0000

Maqedoni e Veriut/Skender Hita dhe Victoria Pullen: Task Forca, modeli më i suksesshëm i bashkëpunimit

Në vijim të pjesëmarrjes në tryezën e Task Forcës së Përbashkët kundër Migracionit të Parregullt, Drejtori i Përgjithshëm i Policisë së Shtetit, Drejtues Madhor Skender Hita, u takua me Victoria Pullen, Shefe e Operacioneve Ndërkombëtare në Ministrinë e Brendshme britanike.

Palët vlerësuan bashkëpunimin e deritanishëm dhe theksuan rëndësinë e forcimit të shkëmbimit të informacionit, koordinimit të veprimeve operacionale dhe zgjerimit të Task Forcës me anëtarë të rinj nga vendet e rajonit.

Victoria Pullen konfirmoi vijimin e mbështetjes për Policinë e Shtetit, përmes trajnimeve të specializuara dhe pajisjeve logjistike, me qëllim rritjen e kapaciteteve profesionale dhe operacionale.

The post Maqedoni e Veriut/Skender Hita dhe Victoria Pullen: Task Forca, modeli më i suksesshëm i bashkëpunimit appeared first on Policia e Shtetit.

Maqedoni e Veriut/Skender Hita merr pjesë në tryezën për Task Forcën e Përbashkët kundër Migracionit të Parregullt

administrator — Fri, 09 Oct 2026 14:03:55 +0000

Maqedoni e Veriut/Skender Hita merr pjesë në tryezën për Task Forcën e Përbashkët kundër Migracionit të Parregullt

Në kuadër të forcimit të bashkëpunimit rajonal në luftën kundër krimit të organizuar dhe migracionit të parregullt, Drejtori i Përgjithshëm i Policisë së Shtetit, Drejtues Madhor Skënder Hita, mori pjesë në tryezën për vijimin dhe zgjerimin e Task Forcës së Përbashkët kundër Migracionit të Parregullt.

Gjatë fjalës së tij, Hita falënderoi partnerët për bashkëpunimin e ngushtë dhe theksoi se migracioni i parregullt lidhet ngushtë me veprimtarinë e grupeve kriminale, trafikimin e qenieve njerëzore, falsifikimin e dokumenteve, pastrimin e parave dhe format e tjera të krimit të organizuar transnacional.

“Task Forca është më shumë se një mekanizëm bashkëpunimi; është një shembull konkret i asaj që mund të arrijmë kur informacioni, ekspertiza dhe veprimi operacional i vendeve tona bashkohen në kohë”, u shpreh Hita.

Ai vlerësoi rezultatet e Task Forcës së Përbashkët Shqipëri–Mbretëri e Bashkuar, të ngritur në vitin 2023 dhe të zgjeruar me përfshirjen e Kosovës, Maqedonisë së Veriut dhe Malit të Zi, duke theksuar se bashkëpunimi ka forcuar kapacitetet profesionale dhe teknike të Policisë përmes operacioneve të përbashkëta, trajnimeve, shkëmbimit të informacionit në kohë reale dhe hetimeve që kanë goditur grupet kriminale.

Hita nënvizoi gjithashtu rëndësinë e zgjerimit të mëtejshëm të këtij mekanizmi, duke propozuar përfshirjen me të drejta të plota të Greqisë dhe Bosnjës dhe Hercegovinës.

Në përfundim, ai rikonfirmoi angazhimin e Policisë së Shtetit për ta çuar bashkëpunimin në një nivel më të lartë dhe për ta konsoliduar Task Forcën si një mekanizëm të fuqishëm rajonal kundër krimit të organizuar transnacional.

The post Maqedoni e Veriut/Skender Hita merr pjesë në tryezën për Task Forcën e Përbashkët kundër Migracionit të Parregullt appeared first on Policia e Shtetit.

Ceremonia për fillimin e studimeve bachelor “Siguria dhe Hetimi” në Akademinë e Sigurisë

administrator — Wed, 07 Oct 2026 11:39:46 +0000

Fjala e Drejtorit të Përgjithshëm të Policisë së Shtetit Drejtues Madhor Skender Hita, gjatë ceremonisë për fillimin e studimeve bachelor “Siguria dhe Hetimi” në Akademinë e Sigurisë

Është emocionuese dhe shpresëdhënëse kur ulesh mes të rinjve dhe të rejave që aspiratat e tyre i adresojnë në një drejtim: në shërbim të qytetarëve dhe të Republikës.

Por sot ndihem i emocionuar dhe i bindur se vendimmarrja për t’u dhënë mundësinë maturantëve të konkurrojnë për të ndjekur Fakultetin “Siguria dhe Hetimi” ishte e duhura. Policisë së Shtetit i duhet brezi i ri, energjia, mentaliteti dhe fytyra e re, komponentë që ndikojnë drejtpërdrejt në besimin e qytetarëve te Policia.

Në tri vitet e fundit, që kur kemi hapur dyert e Akademisë për maturantët, interesi ka qenë shumë i lartë. Mijëra të rinj e të reja kanë zgjedhur Fakultetin “Siguria dhe Hetimi” për të ndjekur studimet Bachelor dhe sot, pas një procesi konkurrues dhe transparent, janë 390 maturantë që ndjekin këto studime.

Sot, Akademia e Sigurisë është zhvilluar në çdo drejtim. Ajo është e binjakëzuar dhe anëtare e bordeve të akademive prestigjioze në rajon, Evropë dhe SHBA. Ka në dispozicion literaturë të akademisë italiane, si dhe ambiente e laboratorë të përshtatshëm për të përmbushur sa më mirë procesin e mësimdhënies dhe mësimnxënies.

Në këto ambiente jam shkolluar edhe unë, e bashkë me mua breza të tërë të Policisë së Shtetit. Por, ndryshe nga sot, ne ishim shumë më pak të privilegjuar në të gjitha aspektet, pasi edhe Policia ishte ende e brishtë.
Ndërsa sot, Policia e Shtetit është rritur profesionalisht dhe është e barabartë me partnerët, e besueshme dhe pjesë e hetimeve dhe operacioneve ndërkombëtare.

Të dashur studentë,

Për ju nisi një rrugëtim i ri, si në aspektin e dijes, ashtu edhe të misionit që keni marrë përsipër.

Sepse Policia e Shtetit nuk është thjesht profesion, por është mision. Dhe për të përmbushur këtë mision duhen këmbëngulje, vullnet, dije, përgatitje fizike, disiplinë, respekt për njëri-tjetrin dhe për pedagogët.

Pas tri vitesh do të jeni oficerë të Policisë së Shtetit, një titull që ju jep privilegjin, por mbi të gjitha përgjegjësinë, për t’iu shërbyer qytetarëve, sigurisë dhe vendit.

Ndaj mësoni sa më shumë, sepse dija, e gërshetuar me stërvitjen dhe disiplinën, do të jenë faktorët kryesorë në formësimin tuaj profesional dhe njerëzor gjatë këtyre viteve.

Që ditën e parë të punës sime si Drejtor i Përgjithshëm, Akademia ka qenë dhe do të jetë në vëmendjen time të veçantë, sepse ajo është motori kryesor i rigjenerimit të Policisë, i shkollimit, trajnimit dhe përgatitjes së brezave të rinj të Policisë së Shtetit.

Jam angazhuar maksimalisht, së bashku me Rektorin dhe Bordin e Akademisë, për të eliminuar çdo problematikë që kemi hasur gjatë këtij viti dhe do të jem pranë jush, ashtu siç do të jem pranë çdo punonjësi të Policisë së Shtetit që, me ndershmëri, përkushtim dhe sakrificë, përmbush këtë mision të shenjtë.

Mos nguroni të më shkruani për çdo shqetësim apo ide për përmirësim. Duke folur, komunikuar dhe duke dhënë kontributin tuaj në zgjidhjen e problematikave kudo që ato shfaqen.

Dhe mos harroni përgjegjësinë që keni marrë mbi vete dhe përkushtimin që duhet të keni për të dalë sa më të aftë nga ky fakultet, për t’i shërbyer qytetarit, ligjit dhe atdheut!

Ju uroj shumë suksese në këtë rrugëtim të ri!

Faleminderit!

The post Ceremonia për fillimin e studimeve bachelor “Siguria dhe Hetimi” në Akademinë e Sigurisë appeared first on Policia e Shtetit.

Shkodër/Ministri i Punëve të Brendshme Ervin Demo dhe Drejtori i Përgjithshëm Skender Hita, takim me strukturat e DVP Shkodër

administrator — Tue, 06 Oct 2026 16:23:06 +0000

Shkodër

Drejtori i Përgjithshëm i Policisë së Shtetit, Drejtues Madhor Skender Hita, gjatë takimit me strukturat e Policisë së Shkodrës, ku mori pjesë Ministri i Punëve të Brendshme, z. Ervin Demo, vuri theksin te rritja e forcës parandaluese, goditja e paligjshmërive në qark dhe etika në komunikim.

Drejtori falënderoi Ministrin për mbështetjen, vlerësoi punën e strukturave dhe kërkoi prej tyre forcim të mëtejshëm të forcës parandaluese dhe goditëse, për goditjen e grupeve kriminale, kapjen e shtetasve që qarkullojnë me armë dhe/ose lëndë narkotike, si dhe kapjen e shtetasve që merren me trafikimin e emigrantëve të paligjshëm.

Drejtori Hita:

“Krimet e rënda, plagosjet dhe vjedhjet me dhunë janë pothuajse 50% më pak se në të njëjtën periudhë të vitit të kaluar. Pavarësisht kësaj statistike, krimet kundër personit, kryesisht ato të mbartura nga vitet e kaluara, janë probleme që kërkojnë angazhim maksimal dhe profesionalizëm. Në këtë kuadër, besoj se, në zbatim të porosisë që ju kam lënë, po vijoni me studimin e të gjitha dosjeve të vjetra dhe me analizën e vrasjeve të së kaluarës.”

Në vijim, Drejtori i kushtoi vëmendje të veçantë luftës kundër kultivimit të bimëve narkotike dhe theksoi se ka kërkuar ndryshim të qasjes, drejt goditjes në burim, te organizatorët dhe financuesit, dhe jo te reagimi i vonuar që mjaftohet vetëm me asgjësimin e bimëve.

Si dëshmi të kësaj qasjeje kryesisht parandaluese, Drejtori theksoi se gjatë këtij viti rreth 122 000 fidanë janë asgjësuar pa u hedhur në tokë për kultivim, krahasuar me rreth 8500 fidanë në të njëjtën fazë, të asgjësuar vitin e kaluar.

Më tej, gjatë takimit, Drejtori shprehu se siguria në shkolla mbetet një detyrim i panegociueshëm, përmes masave të shumëfishta për sigurinë e nxënësve, si siguria rrugore, siguria ushqimore, siguria kibernetike dhe goditja e çdo tentative për shitje lëndësh narkotike në perimetrin e shkollave.

Gjithashtu, Drejtori i Përgjithshëm kërkoi standard të lartë etike dhe profesionalizmi nga punonjësit e Policisë, me qëllim forcimin e besimit të qytetarëve.

Drejtori Hita:

“Shkodra është qark që frekuentohet nga shumë vizitorë e turistë dhe kjo kërkon më shumë etikë e angazhim.

Ne jemi këtu për t’u shërbyer qytetarëve, për të zbatuar ligjin dhe për të goditur këdo që e shkel atë, pa dallim.

Kjo është detyra dhe përgjegjësia jonë.”

Në përmbyllje të takimit, një punonjës i Drejtorisë Vendore të Policisë Shkodër dhe një punonjëse e Drejtorisë Vendore për Kufirin dhe Migracionin Shkodër u vlerësuan nga Drejtori i Përgjithshëm me certifikata “Për shërbime të dalluara”, të cilat iu dorëzuan në prani të Ministrit të Punëve të Brendshme.

The post Shkodër/Ministri i Punëve të Brendshme Ervin Demo dhe Drejtori i Përgjithshëm Skender Hita, takim me strukturat e DVP Shkodër appeared first on Policia e Shtetit.

Hagë, Holandë/Konventa Evropiane e Shefave të Policisë, Hita forcon bashkëpunimin me partnerët ndërkombëtarë

administrator — Thu, 01 Oct 2026 08:23:43 +0000

Hagë, Holandë

Konventa Evropiane e Shefave të Policisë, Hita forcon bashkëpunimin me partnerët ndërkombëtarë.

Në kuadër të Konventës Evropiane të Shefave të Policisë, Drejtori i Përgjithshëm i Policisë së Shtetit, Drejtues Madhor Skender Hita, zhvilloi një sërë takimesh me drejtues të lartë të agjencive ligjzbatuese të vendeve partnere, me fokus forcimin e bashkëpunimit policor, shkëmbimin e informacionit dhe rritjen e bashkëpunimit operacional.

Hita zhvilloi takime me drejtorët e përgjithshëm të Policisë së Shtetit të Italisë, Spanjës dhe Finlandës, me Drejtorin e Përgjithshëm në detyrë të Policisë së Sllovenisë, Komisioneren e Policisë së Holandës, Drejtuesen e Lartë të Byrosë së Sigurisë Diplomatike të ShBA-së, Drejtorin e Përgjithshëm të Agjencisë Kombëtare të Krimit (NCA) të Mbretërisë së Bashkuar, si dhe me përfaqësues të lartë të agjencive ligjzbatuese të Suedisë, Izraelit dhe Moldavisë.

Gjatë takimeve, Drejtor Hita përcolli gatishmërinë e Policisë së Shtetit për të thelluar më tej marrëdhëniet me partnerët ndërkombëtarë, përmes shkëmbimit në kohë të informacionit, koordinimit operacional dhe zhvillimit të hetimeve të përbashkëta, veçanërisht në luftën kundër krimit të organizuar, krimit kibernetik, terrorizmit dhe krimeve ndërkufitare.

Nga ana e tyre, homologët vlerësuan profesionalizmin dhe kontributin e Policisë së Shtetit në përpjekjet e përbashkëta kundër kriminalitetit, si dhe besimin e ndërsjellë tashmë të konsoliduar, duke shprehur gatishmërinë për forcimin e mëtejshëm të marrëdhënieve.

Drejtues Madhor Skender Hita:

“Jemi përballë një krimi gjithnjë e më të organizuar dhe ndërkombëtar, ndaj edhe përgjigjja jonë duhet të jetë e përbashkët, e shpejtë dhe pa barriera.

Policia e Shtetit shqiptar mbetet maksimalisht e angazhuar për të konsoliduar urat e bashkëpunimit operacional dhe informativ me partnerët, me koordinimin e EUROPOL-it, INTERPOL-it dhe agjencive të tjera ligjzbatuese, me qëllim përmbushjen e objektivave tona të përbashkëta dhe garantimin e sigurisë së qytetarëve të vendeve tona.

Ky bashkëpunim duhet të mbështetet në shkëmbimin e shpejtë të informacionit, koordinimin operacional dhe veprimin e përbashkët, për t’iu përgjigjur me efektivitet kërcënimeve kriminale që kapërcejnë kufijtë. Policia e Shtetit do të vijojë të investojë në partneritete të qëndrueshme dhe mekanizma efikasë bashkëpunimi, në funksion të një përgjigjeje të koordinuar dhe sigurisë së qytetarëve.”

The post Hagë, Holandë/Konventa Evropiane e Shefave të Policisë, Hita forcon bashkëpunimin me partnerët ndërkombëtarë appeared first on Policia e Shtetit.

Hagë, Holandë/Policia e Shtetit shqiptar, pjesë aktive e arkitekturës evropiane të sigurisë

administrator — Wed, 30 Sep 2026 11:49:44 +0000

Hagë, Holandë/Policia e Shtetit shqiptar, pjesë aktive e arkitekturës evropiane të sigurisë.

Drejtori i Përgjithshëm i Policisë së Shtetit, Drejtues Madhor Skender Hita, mori pjesë në Konventën Evropiane të Drejtuesve të Policisë, një ngjarje strategjike e organizuar dhe koordinuar nga EUROPOL-i, e cila bëri bashkë në Hagë drejtuesit më të lartë të agjencive ligjzbatuese të 59 shteteve dhe përfaqësues të 15 organizatave ndërkombëtare.

Pjesëmarrja e Drejtorit të Përgjithshëm në këtë Konventë dëshmon angazhimin e Policisë së Shtetit shqiptar për të qenë pjesë aktive e arkitekturës evropiane të sigurisë dhe për t’iu përgjigjur sfidave të reja të sigurisë në Evropë.

Në fokus të Konventës, ku morën pjesë mbi 500 drejtues policie dhe delegatë nga 59 vende dhe 15 organizata ndërkombëtare, ishte nevoja për të unifikuar strategjitë dhe për të bashkërenduar forcat, përballë kompleksitetit gjithnjë në rritje të kërcënimeve globale dhe kriminalitetit modern.

Gjatë Konventës u diskutua mbi parandalimin e radikalizimit dhe sfidat e reja të sigurisë, si dhe nevojën për t’i trajtuar ato në mënyrë të integruar dhe të bashkërenduar.

Në këtë kuadër, u vu theksi te roli i strukturave të sigurisë, puna dhe angazhimi i të cilave janë një barrierë e rëndësishme për lëvizjen dhe shtrirjen e kontingjentit kriminal, si dhe për goditjen e krimeve ndërkufitare.

Gjithashtu, u diskutua mbi dualitetin e zhvillimeve teknologjike: nga njëra anë, mundësitë e jashtëzakonshme që teknologjia u ofron agjencive ligjzbatuese për analiza më të shpejta dhe hetime më efikase dhe, nga ana tjetër, dimensionet e reja, të shpejta dhe pa kufij, me të cilat teknologjia ka krijuar fenomene të reja kriminale dhe ka lehtësuar zhvillimin e formave të tjera të kriminalitetit.

Në lidhje me këtë aspekt qendror të Konventës, u theksua domosdoshmëria e forcimit të bashkëpunimit ndërsektorial ndërmjet Policisë, sektorit financiar dhe platformave teknologjike, me qëllim parandalimin dhe goditjen e mashtrimeve online.

Punimet e Konventës, të zhvilluara nga data 28 deri më 30 shtator, u përqendruan në forcimin e bashkëpunimit dhe të veprimit të përbashkët ndërkufitar, përballë kërcënimeve të reja të sigurisë.

Ndërkaq, për Policinë e Shtetit shqiptar, pjesëmarrja e Drejtorit të Përgjithshëm në këtë Konventë me impakt të lartë ndërkombëtar përbën një mundësi të rëndësishme për të intensifikuar bashkëpunimin ndërkombëtar dhe për të rritur kapacitetet e analizës strategjike, në funksion të luftës kundër krimit dhe garantimit të një mjedisi sa më të sigurt për qytetarët.

The post Hagë, Holandë/Policia e Shtetit shqiptar, pjesë aktive e arkitekturës evropiane të sigurisë appeared first on Policia e Shtetit.