I nderuar Ministër i Punëve të Brendshme, z. Lamallari,

I nderuar rektor i Akademisë së Sigurisë, Drejtor i Kolegjit Profesional të Arsimit Policor dhe pedagogë,
Të nderuar partnerë,
Të nderuar kolegë të sapocertifikuar,

Sot është një ditë e mirë për Policinë dhe për qytetarët. Qindra djem dhe vajza, pas përfundimit me sukses të Kolegjit, i bashkohen familjes sonë të madhe, Policisë së Shtetit, dhe dalin në terren, në shërbim të qytetarëve dhe në mbrojtje të ligjit.

Ju falënderoj për zgjedhjen tuaj për t’u bërë pjesë e stafit tonë, për disiplinën, për rezultatet e arritura në teori dhe në praktikë, si dhe për vullnetin dhe vendosmërinë tuaj që ju çoi në fund të këtij rrugëtimi fillestar, por të përgatitur për të nisur një rrugë të gjatë dhe plot sfida në përmbushje të misionit tonë të shenjtë.

Shqipëria, qytetarët dhe Policia kanë nevojë për ju, për energjitë dhe mentalitetin e ri evropian, ndaj për qytetarët sot është një lajm shumë i mirë që ju sot certifikoheni.

Përtej emocioneve tuaja të arsyeshme dhe shpresës sonë se ju do të jepni më të mirën nga vetja në funksion të së mirës së përgjithshme dhe krahas urimit për certifikimin tuaj, ku ju bëheni pjesë e familjes së madhe, kam disa porosi që besoj se do t’i keni parësore në përditshmërinë e punës suaj.

Busulla juaj në këtë mision duhet të ketë vetëm tri drejtime. Në drejtim të ligjit, në shërbim të qytetarëve dhe në përmbushjen e amanetit të Dëshmorëve të Policisë së Shtetit njëherazi Dëshmorë të Atdheut.

Këto tri drejtime mos i ndryshoni kurrë përballë çdo sfide e tundimi, sepse po humbët busullën, humbët qytetarin, humbët dinjitetin dhe rruga më pas është plot dritëhije ndoshta dhe në errësirë.

Ju jeni të parët që do të merrni kontakt me qytetarët në çdo cep të vendit ku do të shërbeni, jeni në terren 24/7, për të parandaluar dhe goditur paligjshmëritë dhe për t’ju dhënë ndihmë qytetarëve, vizitorëve dhe turistëve nga e mbarë bota.

Shërbejuni qytetarëve me përulësi ndërsa atyre që shkelin ligjin, me forcën e ligjit. Reagoni me guxim, korrektësi e paanshmëri dhe brenda kornizës ligjore përballë çdo padrejtësie e paligjshmërie.

Vrulli rinor që ju keni t’ju shërbejë për të mirën e përgjithshme, për përmirësimin e mëtejshëm të performancës së Policisë së Shtetit dhe në funksion të ligjit.

Dhe mos harroni se arroganca është fundi i rrugëtimit tuaj. Përballë çdo situate qofshi, kurrë mos u tregoni arrogantë me qytetarët që duan dhe zbatojnë ligjin.

Detyra jonë është t’i dëgjojmë, të zbatojmë procedurat e punës dhe t’i japim qytetarit përgjigjen që na kërkon ligji, dhe jo të krijojmë në sytë e tij bindjen se jemi të njëanshëm, arrogantë apo të pazotë.

Kurrë mos ia bëni këtë të keqe Policisë së Shtetit, e cila pa besimin dhe mbështetjen e qytetarëve, nuk e përmbush dot si duhet misionin e saj.

Mos u tundoni nga ofertat e propozimet për të bashkëpunuar me krimin, sepse kjo rrugë mund t’ju duket e shkurtër, por pasojat e saj janë të rënda dhe pa kthim. Mos shkëmbeni kurrë uniformën, imazhin e Policisë, dinjitetin, dhe të ardhmen tuaj me një përfitim të momentit. Asnjë përfitim nuk vlen më shumë se uniforma që mbani veshur dhe besimi që qytetarët kanë te ju.

Bëjeni punën me dëshirë e përgjegjshmëri, respektoni njëri-tjetrin, sepse puna bëhet në grup, dhe besoni se me punën tuaj të ndershme do të bëni karrierë. Pse jo, në të ardhmen, njëri apo njëra prej jush do mbajë fjalim, do të këshillojë dhe do të frymëzojë brezat që do vijnë në Policinë e Shtetit.

Ju falënderoj që arritët këtu dhe do t’ju jem mirënjohës çdo ditë, në rast se secili prej jush do të zbatojë ligjin dhe do të respektojë qytetarët, sikundër do të qëndroj fort ndaj atyre që do të devijojnë nga ligjshmëria dhe etika.

Sot ju mirëpres në familjen e madhe të Policisë së Shtetit dhe ju uroj që këtë ditë ta kujtoni gjithmonë si ditën kur nisët një mision të madh.

Më keni në krah dhe mos nguroni të më shkruani e të shprehni çdo shqetësim që lidhet me përmirësimin e punës, por edhe për problemet tuaja, pasi për mua pasuria më e madhe e Policisë së Shtetit jeni ju, janë burimet njerëzore.

Mbajeni me dinjitet këtë uniformë të shenjtë të sigurisë dhe shërbimit ndaj Republikës dhe qytetarëve.

Shërbeni me përkushtim, veproni në bazë të ligjit dhe qëndroni pranë qytetarëve.

Suksese e mbarësi paçi në detyrën e re dhe në familjet tuaja!

Faleminderit!

The post Akademia e Sigurisë/Certifikohen 389 kursantë që përfunduan Kolegjin Profesional të Formimit Policor appeared first on Policia e Shtetit.

Paraditen e sotme, me rastin e 113-vjetorit të krijimit të Policisë së Shtetit, Drejtori i Përgjithshëm i Policisë së Shtetit Drejtues Madhor Ilir Proda, së bashku me familjarë të Dëshmorëve të Policisë, vendosën kurora me lule, në memorialin përkujtimor të Dëshmorëve të Policisë së Shtetit, të rënë në krye ose për shkak të detyrës.

Drejtori i Përgjithshëm shprehu mirënjohjen e pakufishme dhe ndërimet më të larta, për veprën e Dëshmorëve të Policisë së Shtetit, njëkohësisht Dëshmorë të Atdheut, gjaku i të cilëve qëndron në flamurin kombëtar dhe në themelet e kombit.

Proda, gjatë ceremonisë: “Sakrifica sublime dhe emri i secilit prej ish-kolegëve të rënë gjatë përballjes me krimin, janë motive të forta pse Policia e Shtetit është sot më e angazhuar se kurrë, për t’i ruajtur të denja simbolin kombëtar, jetën dhe pronën e çdo qytetari.”

Lavdi veprës dhe sakrificës së Dëshmorëve të Policisë së Shtetit!

I përjetshëm kujtimi i heronjve tanë!

The post Nga sakrifica lind shpresa, në 113-vjetorin e Policisë nderohet vepra e dëshmorëve appeared first on Policia e Shtetit.

The post Akademia e Sigurisë / Vijon tradita e fundvitit “Një kafe me miqtë” appeared first on Policia e Shtetit.

Kjo iniciativë, që do të pasurojë armatën e Policisë me profesionistë të pajisur me dije të mirëfillta shkencore, u përshëndet nga Drejtori i Përgjithshëm i Policisë së Shtetit, Drejtues Madhor Ilir Proda, i cili u shpreh:

“Fakti që Akademia ofron një program master shkencor është një arritje shumë e madhe, akademike dhe vlerësuese për shkollën. Quajeni veten të privilegjuar! Kam besim se ky është një produkt që do t’i japë vlera të shtuara organizatës sonë.
Ofrimi i këtij masteri nga Akademia e Sigurisë është një gjë madhore, për shkak të faktit se deri dje e ofronin universitete që në fakt nuk kishin asnjë lidhje me informacionet profesionale në fushën e rendit, sigurisë dhe metodikave të hetimit.
Në Akademi ka ekspertë profesionistë me një karrierë të gjatë profesionale, që mund ta ofrojnë eksperiencën e tyre gjatë zhvillimit të programit mësimor në nivelin “Master Shkencor”. Gjithashtu, ju keni përvojë në fushën e sigurisë dhe jam i bindur që produkti në përfundim do të jetë i shkëlqyer. Suksese të gjithëve!”

Ndërkaq, Rektori i Akademisë së Sigurisë, Profesor Ilirjan Mandro, theksoi se pas akreditimit institucional dhe programor të kësaj Akademie, hapja e programit të nivelit të dytë të arsimimit “Master Shkencor” konsolidon këtë Akademi në përgatitjen e kapaciteteve profesionale jo vetëm në Policinë e Shtetit, por edhe në strukturat e tjera ligjzbatuese.

Mandro: “I gjithë ky proces për hapjen e këtij programi është kryer në përputhje me standardet më të mira të arsimimit dhe kualifikimit. Certifikimi në nivelin “Master” është kërkesë edhe për ecurinë në karrierë të punonjësve të Policisë së Shtetit në nivelet e larta drejtuese.”

Akademia e Sigurisë, institucioni elitë i formimit policor, angazhohet të vijojë me këmbëngulje dhe përkushtim punën, me qëllim ofrimin e një arsimimi cilësor dhe me standarde europiane, për të gjithë ata që synojnë t’i shërbejnë misionit të Policisë së Shtetit dhe sigurisë së qytetarëve.

The post Hapet për herë të parë programi Master Shkencor “Siguria Publike dhe Hetimi i Krimit”, në Akademinë e Sigurisë. appeared first on Policia e Shtetit.

Drejtori i Përgjithshëm të Policisë së Shtetit, Drejtues Madhor Ilir Proda:

Mos harroni kurrë, qytetarët janë të parët, silluni me ta me respekt dhe me maturi, si dhe përmbushni çdo detyrë me ndershmëri dhe profesionalizëm! Në çdo situatë, busulla juaj është ligji, jo zgjidhjet personale. Punoni me pasion dhe përulësi!

Keni zgjedhur të shërbeni, të mbroni, si dhe të garantoni rendin dhe sigurinë. Ky është një mision që kërkon ndershmëri, guxim, përkushtim dhe humanizëm. Uniforma që do të mbani veshur është simbol përgjegjësie dhe nderi. Kujtoni gjithmonë që për këtë uniformë kanë dhënë jetën qindra dëshmorë të Policisë dhe të atdheut!

Si Drejtor i Përgjithshëm, do të jem pranë çdo punonjësi të ndershëm e të përkushtuar të Policisë së Shtetit, por po me aq vendosmëri do të qëndroj kundër kujtdo që abuzon me detyrën ose cenon uniformën dhe besimin e qytetarëve.

Urime për certifikimin tuaj dhe mirë se vini në familjen e madhe të Policisë së Shtetit! Ta nderoni uniformën që do të vishni dhe t’i shërbeni me krenari flamurit dhe atdheut! Suksese të gjithëve!

The post Certifikimi i 415 kursantëve të Patrullës së Përgjithshme appeared first on Policia e Shtetit.

Drejtues Madhor Ilir Proda, gjatë ceremonisë së certifikimit të 415 kursantëve të Patrullës së Përgjithshme

E nderuar Ministre e Punëve të Brendshme, znj. Koçiu,

Të nderuar përfaqësues të misioneve që asistoni Policinë e Shtetit,

I nderuar Drejtor i Përgjithshëm i Agjencisë së Mbikëqyrjes Policore, z. Merkaj,

I nderuar Rektor i Akademisë së Sigurisë, pedagogë dhe lektorë,

Të nderuar familjarë,

Të dashur kolegë të rinj që sot certifikoheni,

Sot padyshim është një ditë e veçantë për Policinë e Shtetit, për Akademinë e Sigurisë, por mbi të gjitha, është dita juaj.

Një ditë që shënon fundin e një etape të rëndësishme përgatitjeje dhe fillimin e një rrugëtimi të ri, në shërbim të qytetarëve dhe të vendit.

Ju keni zgjedhur një profesion të vështirë, por fisnik. Keni zgjedhur të shërbeni, të mbroni, të garantoni rend e siguri.

Ky është një mision që kërkon ndershmëri, guxim, përkushtim dhe humanizëm.

Uniforma që do të mbani veshur është simbol përgjegjësie dhe nderi. Kujtoni gjithmonë se për këtë uniformë kanë dhënë jetën qindra dëshmorë të policisë dhe të atdheut.

Mos harroni kurrë: qytetarët janë të parët.
Silluni me ta me respekt dhe maturi, përmbushni çdo detyrë me ndershmëri e profesionalizëm.

Qytetarët presin shumë nga ju, si brezi i ri i Policisë së Shtetit. Ata presin të shohin një polici më afër tyre, më njerëzore, më profesionale dhe më të drejtë.

Nga ana tjetër, organizata vetë pret që përmes punës suaj të përditshme të forcohet akoma më shumë besimi te Policia e Shtetit.

Në çdo situatë, busulla juaj është ligji, jo zgjidhjet personale.
Punoni me pasion dhe përulësi.

Respektoni hierarkinë, bashkëpunoni me kolegët dhe mos harroni se çdo veprim i juaji është pasqyra e imazhit të institucionit tonë.

Jam i bindur se ju do të jeni shembull i korrektesës, i respektit dhe i vendosmërisë për ta bërë Policinë e Shtetit çdo ditë e më të mirë, më të besuar dhe më moderne.

Si Drejtor i Përgjithshëm, do të jem pranë çdo punonjësi të ndershëm e të përkushtuar të Policisë së Shtetit, por po me aq vendosmëri do të qëndroj kundër kujtdo që abuzon me detyrën, që cenon uniformën dhe besimin e qytetarëve.

Urime për certifikimin tuaj dhe mirë se vini në familjen e madhe të Policisë së Shtetit!

Ta nderoni uniformën që do të vishni dhe t’i shërbeni me krenari flamurit dhe atdheut.

Suksese të gjithëve!

The post Akademia e Sigurisë/Certifikohen 415 kursantë të Patrullës së Përgjithshme appeared first on Policia e Shtetit.

Akreditimi ndërkombëtar i Kolegjit Profesional të Formimit Policor, hap historik drejt standardeve të reja të arsimit policor në Shqipëri.

Në një ceremoni të mbajtur në ambientet e Akademisë së Sigurisë, u dorëzua certifikata e akreditimit të Kolegjit Profesional të Formimit Policor nga Shoqata Ndërkombëtare e Drejtorëve të Standardeve dhe Trajnimit të Agjencive të Zbatimit të Ligjit – IADLEST. Ky moment shënon një arritje madhore për arsimin policor në vendin tonë dhe për Policinë e Shtetit në tërësi.

Në ceremoni morën pjesë Zëvendësministri i Brendshëm, Drejtori i Përgjithshëm i Policisë së Shtetit, Rektori i Akademisë së Sigurisë, Rektori i Universitetit të Tiranës, Drejtori i Agjencisë së Mbikëqyrjes Policore, Drejtori dhe Atasheu i ICITAP, Zëvendësshefja e Misionit në Detyrë e Ambasadës së ShBA, Drejtoresha e Përgjithshme e ASCAL, përfaqësues të tjerë të Policisë së Shtetit, të Ambasadës së ShBA në Shqipëri dhe të Akademisë së Sigurisë, si dhe kursantë të Kolegjit Profesional të Formimit Policor. Të gjithë pjesëmarrësit e konsideruan këtë certifikim si një arritje strategjike në funksion të rritjes së standardeve të trajnimit dhe edukimit të punonjësve të Policisë së Shtetit.

Drejtori i Përgjithshëm i Policisë së Shtetit, gjatë fjalës së tij, e cilësoi këtë akreditim si një dëshmi konkrete e përkushtimit për standarde ndërkombëtare dhe cilësi në formimin profesional të punonjësve të Policisë. “Ky sukses nuk do të ishte i mundur pa bashkëpunimin e ngushtë me partnerët tanë ndërkombëtarë, veçanërisht ICITAP dhe IADLEST”, u shpreh ai, duke theksuar rolin vendimtar që kanë luajtur këto institucione në modernizimin e kurrikulave dhe në rritjen e cilësisë së arsimit policor.

Në fjalën e mbajtur në ceremoni, Zëvendësshefja e Misionit në Detyrë zj. Kathryn Hammond evidentoi rolin aktiv të Policisë së Shtetit në forcimin e partneritetit në fushën e zbatimit të ligjit. Në emër të Ambasadës së Shteteve të Bashkuara të Amerikës dhe në emër të të Ngarkuarës me Punë të Ambasadës së ShBA zj. Nency VanHorn, zj Hammond u shpreh: “Policia e Shtetit dhe oficerët që trajnohen në Akademinë e Sigurisë janë tashmë pjesë e një standardi ndërkombëtar. Ata janë partnerët tanë në luftën kundër krimit të organizuar dhe mbrojtjen e komuniteteve tona, si në Shqipëri ashtu dhe në Shtetet e Bashkuara.”

Në të njëjtën linjë, Zëvendësministri i Brendshëm vlerësoi akreditimin si një gur themeli për një polici moderne dhe profesionale. “Në themel të çdo shërbimi të mirë që ofron Policia qëndron një komponent bazë, arsimimi cilësor dhe me standarde të larta etike dhe profesionale. Një polici e mirë nis nga një arsimim i mirë”, theksoi ai. Zëvendësministri theksoi gjithashtu se ky certifikim vjen në një moment ku Shqipëria ka demonstruar kapacitete të larta në menaxhimin e tri ngjarjeve madhore brenda një jave, Giro d’Italia, Samiti i Komunitetit Politik Europian dhe procesi zgjedhor i 11 majit.

Ndërkaq, Rektori Mandro u shpreh: “Ky vlerësim maksimal dhe titulli “Ekselent” që na rreshton mes vetëm 4 akademive ndërkombëtare me këtë nderim, është një moment historik për Akademinë e Sigurisë. Jemi thellësisht mirënjohës për besimin, mbështetjen dhe bashkëpunimin e vazhdueshëm të partnerëve tanë ndërkombëtarë. Kjo arritje është fryt i përkushtimit të palodhur të stafit tonë akademik dhe administrativ, një dëshmi se kur punohet me vizion dhe seriozitet, standardet më të larta jo vetëm që arrihen, por dhe tejkalohen.”

Akreditimi ndërkombëtar i Kolegjit Profesional të Formimit Policor do t’i shërbejë drejtuesve, stafit dhe studentëve të Akademisë së Sigurisë, si një motiv i lartë për të vijuar me angazhim maksimal rrugën e profesionalizmit dhe të bashkëpunimit ndërkombëtar, për forcimin e sigurisë publike.

The post Akademia e Sigurisë/Ceremonia e akreditimit ndërkombëtar të Kolegjit Profesional të Formimit Policor appeared first on Policia e Shtetit.

Sot, u zhvillua ceremonia e diplomimit të 93 studentëve që përfunduan me sukses ciklin e parë “Bachelor” në Fakultetin e Sigurisë dhe Hetimit në Akademinë e Sigurisë.

Drejtori i Përgjithshëm i Policisë së Shtetit ka miratuar urdhrat për emërimin e tyre në detyrë dhe dhënien e gradës policore “Nënkomisar”.

Gjatë ceremonisë, Drejtoresha e Burimeve Njerëzore e Drejtorisë së Përgjithshme të Policisë së Shtetit Drejtues Anisa Duçkollari, në emër të Drejtorit të Përgjithshëm të Policisë së Shtetit Drejtues Madhor Ilir Proda, ka uruar nënkomisarët e rinj, për gradën policore dhe detyrën që do të kryejnë, të cilën duhet ta përmbushin me përkushtim dhe ndershmëri.

Rektori i Akademisë i ka falënderuar 93 studentët e sapodiplomuar, për disiplinën, dëshirën për të mësuar dhe përkushtimin që treguan përgjatë 3 viteve, në Fakultetin e Sigurisë dhe Hetimit të Krimit.

93 nënkomisarët janë emëruar në 12 qarqet e vendit, sipas nevojave organike të strukturave policore. Injektimi i impulseve të reja në strukturat policore do të ndikojë në rritjen e cilësisë së hetimit dhe performancës se Policisë në tërësi.

The post Akademia e Sigurisë/Diplomohen 93 studentë që përfunduan ciklin e studimeve “Bachelor” appeared first on Policia e Shtetit.

Në këtë kuadër, Fakulteti i Sigurisë së Brendshme dhe Qendra e Trajnimit të Shefave të Policisë pranë Akademisë së Policisë Kombëtares turke (TNPA), ofron gjithsej 5 vite arsim, duke përfshirë 1 vit arsim përgatitor në gjuhën turke dhe 4 vite arsimim bachelor ndërsa Qendra e trajnimit të shefave të Policisë përfshin programin njëvjeçar përgatitor të gjuhës turke i cili pasohet nga trajnimi njëvjeçar i Shefit të Policisë së Nivelit të Parë dhe Programi i diplomës master, pa teza, për menaxhimin e sigurisë, gjatë semestrit 2024-2025, për aplikantët nga disa vende, përfshirë Shqipërinë.

Sipas kuotës së përcaktuar, vetëm dhjetë aplikantë të kualifikuar (8 meshkuj – 2 femra) për programin e ofruar nga Fakulteti i Sigurisë Kombëtare dhe për programin e ofruar nga Qendra e Trajnimit të Drejtorëve të Policisë, pesë aplikantë të kualifikuar (4 meshkuj – 1 femër) nga Shqipëria, do të kualifikohen për të ndjekur programet e trajnimit të lartpërmendura.

A. Arsimi universitar – Kërkesa për pranim

Të jetë i diplomuar në shkollë të mesme ose shkolla të barazvlefshme

Të ketë kushtet për të qenë punonjës policie në vendin e tij/saj

Të jesh mbi 18 vjeç (i lindur në 2003 e më vonë, kandidatët duhet të jenë nën 22 vjeç, kufiri i moshës për 22 vjeç llogaritet si 01 janar 2024)

B. Arsimi Master – Kërkesa për Pranim:

Të ketë diplomë bachelor ose të barazvlefshme, ose të jesh punonjës policie me diplomë bachelor

Të mos jetë i diplomuar në Fakultetin e Shkencave të Sigurisë (të mbyllura) të TNPA

Të ketë kushtet për të qenë punonjës policie në vendin e tij/saj

Të qenit i një shkalle të barabartë me gradën e policit ose zëvendësinspektorit në vendin e tij/saj

Të qënit nën 28 vjeç (i lindur në 1997 dhe më vonë)

C. Dokumentet që kërkohen nga studentët universitar dhe master:

Kopja e pasaportës (duke marrë parasysh kohëzgjatjen e pasaportës, kohëzgjatjen e arsimit)

8 fotografi biometrike (të diagnostikueshme)

Raport mjeko-ligjor

Kopja origjinale e diplomës/certifikatës së diplomimit ose e diplomës/certifikatës së diplomimit të miratuar nga institucioni (për çdo faqe, e dyanshme),

Formulari i informacionit të studentit i dorëzuar në mënyrë dixhitale duhet të plotësohet në formatin Microsoft Excel dhe të dërgohet në adresën e postës elektronike paogrenciisleri@egm.gov.tr, jo më vonë se data 20 gusht 2024.

Për të kryer regjistrimin e kadetëve të huaj të Policisë, të cilët do të kenë një program universitar në Fakultetin e Sigurisë së Brendshme dhe do të kenë program master pa tezë, në Qendrën e Trajnimit të Drejtorëve të Policisë në TNPA, origjinalet e dokumenteve të përmendura më sipër, duhet të jenë të certifikuara në gjuhën turke.

Kopjet, të plotësuara veçmas dhe të miratuara nga institucioni dhe kopjet e formularit të informacionit të studentit të sillen në TNPA ,nga secili kandidat për kadetët e Policisë.

Kandidatët e kadetëve të Policisë, të cilët do të ndjekin arsimin, duhet të pajisen me vizë studentore në Ambasadën e Turqisë, për të marrë leje qëndrimi dhe pasaportat e tyre duhet të kenë një vlefshmëri minimale prej 5 (pesë) vitesh për arsimin universitar dhe 2 (dy) vjet për arsimin master.

Në këtë kontekst, duke pasur parasysh se kandidatët kadetë të Policisë së huaj, të planifikuar për t’u dërguar në TNPA, për vitin akademik 2024-2025, do t’i nënshtrohen provimit të aftësisë së gjuhës turke dhe do të marrin një raport të bordit shëndetësor, atyre iu kërkohet të jenë të pranishëm në Golba§i të TNPA-së, jo më vonë se data 9 shtator 2024.

Aplikantët priten të dorëzojnë dokumentet e kërkuara në Akademinë Kombëtare të Policisë Turke, jo më vonë se data 20 gusht 2024.

Aplikantet e interesuar, si dhe për cdo paqartësi, të dergojne email në adresën linditashesha@asp.gov.al, cc: arbengjergji@asp.gov.al.

The post Policia e Shtetit, njoftim appeared first on Policia e Shtetit.

The post Akademia e Sigurisë/Zhvillohet ceremonia e certifikimit të kursantëve për “Patrullë e Pergjithshme” appeared first on Policia e Shtetit.