POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 02.04.2010

Deklaratë për shtyp

dhënë nga Drejtori i Përgjithshëm i Policisë së Shtetit, Z. Hysni BURGAJ

Në vijim të operacioneve të suksesshme të zhvilluara nga strukturat e Policisë për goditjen e trafikut të lëndëve narkotike, gjatë natës së mbrëmshme është zhvilluar një operacion i përbashkët me Autoritetet policore Italiane, gjatë të cilit u bë e mundur bllokimi i një sasie të konsiderueshme lënde narkotike prej rreth 1 ton e 115, 5 kg,  si dhe arrestimi i 7 personave.

Për kurorëzimin me sukses të këtij operacioni edhe nga autoritetet policore Italiane po mbahet një Konferencë për shtyp në këto momente gjatë të cilës po prezantohen rezultatet e operacionit.

Ky operacion i rëndësishëm u zhvillua mbrëmë, pas konstatimit nga Qendra Ndërinstitucionale Operacionale Detare të mjeteve të shpejta lundruese të cilët po lëviznin në ujërat detare.

Sapo ato janë konstatuar nga strukturat e Policisë së Shtetit  u morën masat për organizimin e punës me qëllim bllokimin e tyre.

Në këtë kontekst u informuan dhe autoritetet Italiane, përkatësisht Guardia Di Finanzia dhe Interforza, të cilëve nga ana jonë iu dhanë koordinata të sakta mbi lëvizjen e këtyre mjeteve lundruese, me synim organizimin e operacionit të përbashkët për kapjen e tyre. Për të njëjtin qëllim u informuan dhe autoritete policore Greke.

Po ashtu u organizuan dhe shërbime të tjera nga toka për të bërë kontrollin e gjithë territorit.

Në sajë të këtij bashkëpunimi të suksesshëm u bë i mundur bllokimi në zonën e Leçes në Itali i një sasie prej rreth 900 kg lëndë narkotike cannabis sattiva, si dhe kapja e 3 shtetasve shqiptarë, emrat e të cilëve do bëhen të ditur në një moment të dytë.

Ndërkohë po në vijim të këtij operacioni nga Drejtoria e Policisë së Qarkut Gjirokastër u bë i mundur sekuestrimi i një sasie prej rreth 215.5 kg lëndë narkotike cannabis sattiva, si dhe arrestimi i 4 shtetasve përkatësisht:

-          Eduart Kujtim Lushkaj, vjeç 20, banues në Dermenas të rrethit Fier, me precedentë të mëparshëm penal,

-          Eglivan Novruz Atija, vjeç 28, banues në Sulaj të Rrethit Fier, me precedentë të mëparshëm penal,

-          Andi Hysen Kurti, vjeç 41, banues në Tiranë,

-          Selami Hamet Lushkaj, vjeç 37, banues në Baltëz të rrethit Fier me precedentë të mëparshëm penal.

Këta shtetas janë kapur në flagrancë mbrëmë rreth orës 23.00’ në Memaliaj, në urën e Lumit Vjosë, teksa po transportonin lëndën narkotike prej 215, 5 kg nga Tepelena në drejtim të Fierit e më pas në Vlorë. Nga hetimet e kryera ka rezultuar se lënda do të trafikohej jashtë vendit në drejtim të Italisë.

Theksojmë që Policia e Shtetit ka marrë të gjitha masat e duhura për goditjen në kohë të çdo rasti trafikimi veçanërisht të trafikut të drogës, ku vetëm në muajin e fundit nga strukturat e hetimit të krimit të Policisë së Shtetit në bashkëpunim dhe me autoritetet policore të vendeve fqinje është bërë i mundur sekuestrimi i një sasie prej rreth 4,5 ton marijuanë.

Me masat që janë marrë objektivi i Policisë së Shtetit është që e gjithë sasia e lëndës narkotike të prodhuar në Lazarat apo gjetkë të sekuestrohet, kjo falë dhe bashkëpunimit me strukturat homologe të vendeve fqinje.

Drejtoria e Përgjithshme e Policisë së Shtetit