POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 23.04.2010

Njoftim për shtyp

Menaxhimi bazuar në performancë në Policinë e Shtetit, aktivitet në bashkëpunim me IDN, Misionin Pameca dhe Programin Icitap

Në ambientet e Drejtorisë së Përgjithshme të Policisë së Shtetit u zhvillua sot, datë 23.04.2010, workshopi me temë “Menaxhimi bazuar në performancë”, i cili u organizua në bashkëpunim me Qendrën për Çështjet Evropiane dhe të Sigurisë (IDN) dhe Misionin PAMECA e programin ICITAP.

Pjesëmarrës në këtë aktivitet ishin Drejtuesit më të lartë të Policisë së Shtetit, si dhe Drejtues të strukturave qendrore e vendore të policisë.

Në fjalën e hapjes Drejtori i Përgjithshëm i Policisë së Shtetit, Z.Hysni Burgaj, theksoi se menaxhimi përmes performancës është një çështje shumë e rëndësishme për Policinë e Shtetit dhe gjatë viteve të fundit është bërë një progres i dukshëm në organizatën e policisë në këtë drejtim.

“Manaxhimi i bazuar mbi performancën” para disa kohësh do të dukej terminologji e largët për tu kuptuar, adoptuar dhe zbatuar për strukturat tona policore. Por sot ne jemi ndërgjegjësuar, veçanërisht drejtuesit e strukturave policore, se ka ardhur koha plotësisht që njerëzit ta meritojnë pozicionin e punës dhe të punojnë për ta justifikuar e përmirësuar  vazhdimisht atë.” – evidentoi Z.Burgaj.

Në vijim të fjalës së tij Drejtori i Përgjithshëm i Policisë u ndal në disa arritje të rëndësishme të bëra nga Policia e Shtetit në këtë drejtim, konkretisht :

« -Kemi bërë përmirësime të rëndësishme në vlerësimin e punës së personelit të Policisë së Shtetit. Nga një vlerësim formal e tepër të përgjithshëm, tashmë ne realizojmë një vlerësim real të punës dhe aftësive të çdo punonjësi mbështetur mbi parametra konkret dhe të gjithanshëm, i cili na jep një gjendje të matshme të performancës së gjithsecilit.

- Kemi përcaktuar dhe po aplikojmë një politikë të hapur të administrimit të burimeve njerëzore të mbështetur mbi rregulla të përcaktuara qartë të emërimeve, gradimeve  dhe gjithë lëvizjeve të tjera në polici.

- Aplikimi i konkurrimeve, në sistemin e gradimeve nëpërmjet një procesi transparent të mundshëm për tu njohur nga gjithë aplikuesit dhe një sistemi testimi dhe vlerësimi bashkëkohor jep mundësinë e përshtatjes sa më të mirë të performancës së çdo punonjësi policie me pozicionin e tij të punës.

-Përfundimi dhe aplikimi për herë të parë i procedurave standarde të punës në Policinë e Shtetit është një hap  tepër i rëndësishëm në rritjen e parametrave të performancës së çdo punonjësi në punën e tij, vetë punonjësi i policisë tashmë ka mundësi të vlerësojë punën dhe aftësitë e tij në përshtatje me detyrën që ka.

- Riaokimi i burimeve njerëzore gjithashtu është një proces që synon drejt rritjes së performancës së personelit të Policisë së Shtetit,  sepse synon në përshtatjen sa më të mirë të aftësive të secilit punonjës me pozicionin e tij të punës.

- Ne kemi institucionalizuar procesin e vlerësimit të performancës nëpërmjet krijimit dhe funksionimit të një strukture të veçantë në Drejtorinë e Standardeve, dhe që pavarësia e saj nga strukturat e tjera policore rrit integritetin e saj duke realizuar një vlerësim objektiv. »

Ndërkohë Drejtori Ekzekutiv i IDN-së vuri në dukje faktin se menaxhimi bazuar në performancë është një praktikë e re dhe në vendet evropiane dhe qëllimi i aktivitetit është prezantimi  i parimeve mbi bazën e të cilave duhet të funksionojë ky menaxhim, parime të cilat rrisin efikasitetin dhe përmirësojnë koston e shërbimeve të ofruara për komunitetin. Po ashtu Z. Hroni theksoi faktin se është hera e parë që një institucion realizon një aktivitet të tillë për të promovuar aspektin e menaxhimit në performancë.

Në vijim të aktivitetit nga përfaqësues të Policisë së Shtetit, IDN-së,  Misionit PAMECA e Programit ICITAP u trajtuan një sërë çështjesh, si:

-          Modeli i menaxhimit të bazuar në performancë,

-          Modeli aktual i performancës së Policisë së Shtetit, dhe përvoja e mbretërisë së bashkuar në këtë drejtim.

-          Sfidat e matjes së performancës së Policisë

-          Njohja e vlerave në policim,

-          Matja e rezultateve të planeve vendore për sigurinë në komunitet etj.

Gjatë prezantimit të tyre u vu në dukje fakti se modeli i menaxhimit të bazuar në performancë konsiderohet si një instrument përmes të cilit veprojnë zyrtarët publikë në ndërmarrjen e reformave dhe ofrimit të transparencës maksimale me synimin përfundimtar të optimizmit të vlerës sociale. Menaxhimi bazuar në performancë konsiderohet si fleksibël, në mënyrë të tillë që u lejon strukturave që ta përshtatin atë sipas nevojave të tyre, ndërkohë që sërish u ofron drejtuesve indikatorë ndër-sektorialë të qartë dhe konsistentë të performancës dhe kostove të përpjekjeve për të krijuar vlerën e synuar sociale.

Fjala e plotë e Drejtorit të Përgjithshëm të Policisë, Z. Hysni Burgaj,  në këtë aktivitet

Drejtoria e Përgjithshme e Policisë së Shtetit