POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 15.04.2010

Njoftim për shtyp

Fjala e Drejtorit të Përgjithshëm të Policisë së Shtetit, z. Hysni BURGAJ në Mbledhjen Plenare të Konsorciumit Ndërkombëtar

Mbledhja Plenare e Konsorciumit Ndërkombëtar dhe pjesëmarrja juaj në këtë eveniment  është një rast i mirë për mua  dhe Policinë e Shtetit për të prezantuar  dhe për t’ju falënderuar  për kontributin tuaj të çmuar në drejtim të  zhvillimit dhe implementimit të shumë projekteve, të cilat kanë ndikuar drejtpërsëdrejti në performancën e dëshiruar të Policisë së Shtetit.

Policia e Shtetit mbetet një nga përfituesit kryesorë të programeve të zhvillimit dhe ndihmës së huaj, nëpërmjet asistencës së ofruar nga Bashkimi Evropian, SHBA si dhe një numër organizatash ndërkombëtare që operojnë në Shqipëri.

Qëllimi kryesor i të gjithë donacioneve dhe projekteve të realizuar ka qenë dhe mbetet rritja e kapaciteteve te Policisë së Shtetit në funksion të përmirësimit të performancës së saj, si dhe arritjes së sukseseve në fushën e rendit dhe sigurisë publike.

Ato kanë ndikuar fuqishëm:

së pari, në rritjen e aftësive profesionale nëpërmjet trajnimit të personelit të policisë. Kjo gjë ka ndikuar indirekt edhe në “çarmatosjen” e policisë nga mentaliteti i forcave të armatosura dhe në konceptimin e ri të shërbimit policor si një shërbim i administratës shtetërore në shërbim të komunitetit.

Së dyti, këto projekte kanë mundësuar modernizimin e shërbimit policor duke ndihmuar në pajisjen e tij me logjistikë të kohës dhe me përmirësimin e kushteve të punës dhe të akomodimit të personelit të policisë.

Mbështetja e përfituar nga financimet e huaja dhe fushat e ndërhyrjes orientohen nga kërkesat e policisë, si dhe në bazë të prioriteteve dhe objektivave kryesorë për  realizimin e detyrimeve të vendosura në dokumentet strategjikë të Policisë së Shtetit.

Donatorët, të cilët në vazhdimësi kanë kontribuar për rritjen e kapaciteteve të Policisë se Shtetit, janë: 

- Bashkimi Evropian, nëpërmjet programeve kombëtare të zhvillimit si CARDS, IPA dhe programeve rajonale me financim të BE si INTEREG;

-  SHBA, nëpërmjet programit ICITAP; OSBE; PNUD;

- Qeveria Angleze; UNDOC etj.

Donatori kryesor për Policinë e Shtetit mbetet Bashkimi Evropian, nëpërmjet të cilit Policia ka përfituar nga Programet Kombëtare CARDS 2001 – 2006, në seksionin  Drejtësia dhe Çështjet e Brendshme, komponentët “Policia dhe Rendi Publik”, “Policia dhe Krimi i Organizuar”, “Menaxhimi i Integruar i Kufirit”, “Azili dhe Migrimi”, dhe në vazhdim me: Programin e Instrumentit të Asistencës së  Para-aderimit IPA 2007, 2009 dhe 2010.

Informacion për përfitimet e Policisë së Shtetit ndër vite nga financimet e KE

Aktualisht projektet e financuara nga programi CARDS dhe IPA janë në statusin e mëposhtëm:

·        Projektet e financuara nga CARDS 2001, 2002, 2003 kanë përfunduar.

·        Projektet e financuara nga CARDS 2004, 2005, 2006 dhe IPA 2007,  janë në fazën e implementimit.

·        Projektet që priten të përfitohen nga IPA 2009 janë në fazë përgatitje dhe brenda vitit 2010 pritet kontraktimi i fondeve.

·        Projektet e pritshme nga IPA 2010 janë identifikuar dhe pritet miratimi nga strukturat financuese. Kontraktimi i fondeve pritet në vitin 2011.

Përfitimi i strukturave të Policisë së Shtetit nga financimet e përfituara në kuadër të programit CARDS 2001-2006 dhe IPA 2007, 2009 dhe 2010 financuar nga BE, është rreth 61 Milion Euro, sipas drejtimeve:

Policia dhe Krimi i Organizuar (PKO),

Menaxhimi Integruar i Kufijve (MIK) dhe

Azili dhe Migrimi (AM)

Gjatë vitit 2009 dhe 2010 ka përfunduar zbatimi i 4 projekteve të financuara nga fondet e Bashkimit Evropian dhe donatorë të tjerë, janë në zbatim 5  projekte (nga të cilat 2 kanë filluar gjatë 2009), si dhe janë në fazë përgatitjeje e pritet të fillojnë brenda 2010, 3 projekte të reja, të cilat do të financohen nga IPA 2009 dhe 2010.

a) Misioni i Asistencës së Policisë së KE në Shqipëri (PAMECA III )

Financohet nga programi IPA 2007, është parashikuar financimi në vlerën  totale 5.5 Milion Euro për Misionin e Policisë së KE në Shqipëri, PAMECA III.

b) Rehabilitimi i Akademisë së Policisë  Faza e I dhe e II

Të dy projektet financohen nga programi CARDS 2004 dhe 2005. Pritet të përfundojnë brenda këtij viti. Objektivi kryesor i tyre është përmirësimi i kapaciteteve infrastrukturore të institucioneve arsimore të Policisë së Shtetit, në përputhje me nevojat e identifikuara në dokumentet strategjik dhe në Master- Planin e hartuar për këtë qëllim me financim të KE.

c) Mbështetje për Policinë Kufitare dhe Administratën doganore në kufi

Projekti përfshin ndërtimin e  10 Pikave të Kalimit të Kufirit dhe synon përmirësimin e infrastrukturës në përmbushjen dhe arritjen e standardeve për kontrollin në kalimin e kufirit. Ky projekt ndiqet bashkërisht me Drejtorinë e Përgjithshme të Doganave , dhe Policia administron vetëm 4 PKK. Projekti ka filluar zbatimin në vitin 2009 dhe vijon normalisht.

d) Ngritja e një Qendre të Mbyllur Pritje për të krijuar lehtësira për të riatdhesuarit e paligjshëm të vendeve të treta

Projekti financohet nga Programi  i BE CARDS 2004, dhe mbështet zbatimin e detyrimeve qe rrjedhin nga Marrëveshja e Ripranimit mes Komunitetit Evropian dhe Shqipërisë. Marrëveshja vendos kushtet për kthimin e emigranteve shqiptare dhe  shtetasve te huaj te cilët refuzohen te qëndrojnë ne vendet e Bashkimit Evropian. Projekti është ne përfundim.

e) Përmirësimi i Infrastrukturës ne Pika të Veçanta të Kontrollit Kufitar

Ky projekt financohet nga CARDS 2006. Qëllimi i tij është përmirësimi i parametrave te punës dhe jetesës se efektivave të policisë kufitare, përgjegjëse për mbikëqyrjen e kufijve. Projekti ka filluar zbatimin ne 2009 dhe vijon normalisht.

Projektet e pritshme me financim te IPA 2009 dhe 2010:

§        “Rritja e kapaciteteve të strukturave të Mbrojtjes së Dëshmitarëve dhe Personave të Veçantë”. 

Objektivi i përgjithshëm i këtij projekti do te jete forcimi i luftës kundër krimit të organizuar dhe terrorizmit në Shqipëri duke përmirësuar  aftësitë e strukturave te Policisë së Shtetit,  me qëllim garantimin e nivelit të duhur të sigurisë për dëshmitarët dhe bashkëpunëtoret e drejtësisë.

§        “Modernizmi dhe rritja e kapaciteteve për sigurinë dhe mbikqyrjen e kufijve blu”.

Objektivi i përgjithshëm i këtij projekti do te jete përmirësimi i kapaciteteve te Policisë se Shtetit për rritjen e bashkëpunimin në agjencitë përgjegjëse për sigurinë e kufirit blu dhe luftën kundër kriminalitetit.

§        “Rritja e Kapaciteteve të Qendrës së Formimit Policor”. Objektivi i përgjithshëm është rritja e kapaciteteve infrastrukturore te mësimdhënies dhe akomodimit të kësaj Qendre si i vetmi institucion arsimor i organizatës që përgatit oficeret e policisë, si dhe përfundimi i investimeve të kryera deri tani nga fondet e BE

Nga strukturat e Policisë është punuar për rritjen e kapaciteteve  te saj në drejtim të planifikimit dhe përmbushjes së detyrimeve si përfitues (sigurimin e dokumentacionit te kërkuar mbi pronësinë, lejen e ndërtimit,  kostot e nevojshme për bashkëfinancim dhe mirëmbajtje, etj.) me qëllim evitimin e problematikës së shfaqur në të kaluarën, kur si rezultat i mos plotësimit të parakushteve ka pasur vështirësi për përfitimin e financimeve të huaja.

Realizimi i detyrimeve dhe prioriteteve të përcaktuara në dokumentet strategjike sektoriale e ndërsektoriale te policisë, kërkojnë vlera të konsiderueshme si në drejtim të burimeve financiare ashtu dhe në drejtim të kapaciteteve njerëzore.

Nisur nga kjo, unë mund të pohoj se Policia e Shtetit tashmë ka kapacitetet e duhura profesionale për menaxhimin e projekteve, qofshin këto të huaja apo ato të financuara nga  Buxheti i Shtetit. Për këtë gjë:

-Së pari, janë bërë ndryshime strukturore duke përfshirë në Departamentin e Shërbimeve Mbështetese, Sektorin e Kordinimit të Projekteve.

-Së dyti, janë hartuar dhe po implementohen manuale dhe procedura standarde të menaxhimit të mirë të projekteve sipas përvojës së vendeve të Bashkimit Europian.

Gjithashtu, ne mendojmë që organizimi i takimeve periodike mes donatorëve dhe Ekipeve të Menaxhimit të Projekteve të Policisë së Shtetit, sipas një procedure dhe kalendari të përcaktuar, do te rrisë fleksibilitetin në realizimin e projekteve dhe do të shkurtojë procedurat burokratike të komunikimit.

Prioritet i yni  mbetet bashkëpunimi me donatoret me qëllim orientimin në vijimësi të ndihmës dhe asistencës ndërkombëtare në përputhje me nevojat tona.

 Shprehim bindjen se Delegacioni i Bashkimit Evropian, si dhe gjithë organizmat e tjera që asistojnë dhe ndihmojnë Policinë e Shtetit, do të vazhdojnë të na mbështesin për implementimin me ritme më të larta të projekteve të planifikuara dhe për sigurimin e financimeve te tjera.

Drejtoria e Përgjithshme e Policisë së Shtetit