POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 31.03.2010

Njoftim për shtyp

Ceremonia e lançimit të fazës së fundit të projektit  Alb/G70

Faza e tretë përmbyllëse e Projektit Alb/G70 “Mbi forcimin e kontrollit kufitar dhe drejtësisë penale në luftë kundër trafiqeve ilegale dhe krimit te organizuar në Shqipëri”, është lancuar sot nëpërmjet nje ceremonie të zhvilluar në ambientet e Hotel “Rogner”. Ky projekt është vënë në zbatim nga Zyra e Kombeve të Bashkuara për drogat dhe krimin (UNODC), në sajë të financimeve nga qeveritë italiane dhe gjermane, ndërkohë që vazhdimi i fazës së fundit është bërë i mundur nga financimi me një vlerë prej 400.000 eurosh nga Qeveria Italiane.

Të pranishëm në këtë ceremoni kanë qenë Zv/ministrja e Brendshme, znj.  Iva Zajmi, Drejtori i Përgjithshëm i Policisë së Shtetit, z. Hysni Burgaj, Përfaqësuesja e OKB në Tiranë, znj. Gulden Turkoz Cosslett, Koordinatorja rajonale e Zyrës së UNODC-së, znj. Carla Ciavarella, Shefi i Zyrës së Bashkëpunimit Italian në Shqipëri, z. Flavio Lovisolo, Oficeri i Kontaktit në Ambasadën Gjermane në Tiranë, z. Rainer Harms, si dhe Nëndrejtori i Përgjithshëm i Doganave, z. Aleksandër Mucko.

Gjatë fjalës përshëndetëse, Drejtori i Përgjithshëm i Policisë së Shtetit, z. Hysni Burgaj, shprehu në emër të Policisë së Shtetit vlerësimet më të mira për bashkëpunimin disavjeçar me Zyrën e Kombeve të Bashkuara për drogat dhe krimin. Gjithashtu z. Burgaj falenderoi qeverinë gjermane dhe atë italiane për kontributin e vazhdueshëm në forcimin e kapaciteteve të policisë së shtetit për  përdorimin me sukses te informacionit  si një instrument të rëndësishëm në ndërmarrjen e operacioneve taktike dhe strategjike në luftë kundër fenomeneve kriminale ndërkufitare.

Drejtori i Përgjithshëm i Policisë së Shtetit, z. Hysni Burgaj, theksoi se rezultatet pozitive të këtij projekti vihen re edhe në “operacionet e suksesshme antidrogë dhe antitrafik të muajve të fundit, në përfundim të të cilëve janë sekuestruar sasi të konsiderueshme mariuane dhe heroine, si dhe janë arrestuar apo shpallur në kërkim autorët e veprave penale. Gjithashtu, nga ana e policisë kufitare janë goditur në disa raste fenomene të kontrabandimit të njerëzve duke arrestuar edhe autorët.

Forcimi i kapaciteteve operacionale dhe teknike të strukturave të luftës kundër krimit të organizuar dhe të kufirit e migracionit ka qenë dhe mbetet prioritet i yni, i cili është pasqyruar edhe në planifikimin e fondeve të mjaftueshme për këtë qëllim. Por, një komponent tjetër te cilit i është kushtuar vëmendje e veçantë është trajnimi i personelit në kuadër të marrëdhënieve dypalëshe, te iniciativave rajonale,  shkëmbimeve të eksperiencave apo vizitave studimore, si dhe ne kuadër të projekteve të tilla.”, theksoi z. Burgaj.

Vlerësime për këtë bashkëpunim janë dhënë edhe nga të pranishmit, të cilët  theksuan kontributin e këtij projekti në forcimin e kapaciteteve të strukturave vendore të policisë shqiptare në luftën kundër drogës dhe trafiqeve të paligjshme.

Shefi i Zyrës së Bashkëpunimit Italian në Shqipëri, z. Flavio Lovisolo, evidentoi jo vetëm rëndësinë e madhe që ka ky projekt në veçanti, por edhe suksesin e bashkëpunimit me palën shqiptare.

Gjithashtu z. Lovisolo garantoi mbështetjen e vazhdueshme të qeverisë italiane në këto sektorë.

Ndërkohë gjatë fjalës së tij, Nëndrejtori i Përgjithshëm i Doganave, z. Aleksandër Mucko, vuri në dukje bashkëpunimin maksimal që ekziston mes strukturave të Policisë së Shtetit dhe strukturave doganore në plotësimin e standardeve evropiane, menaxhimin e integruar të kufijve, si dhe implementimin e politikave për lëvizjen e lirë dhe luftën kundër krimit të organizuar.

Informacion mbi projektin:

Ky projekt u fokusua në forcimin e bashkëpunimit ndërmjet doganave dhe policisë në luftën kundër krimit ndërkufitar, kryesisht në Pikat e Kontroll Kalimit Kufitar dhe doganor te Kakavijës, Tre Urat, Qafë Botë, Porti i Sarandës, Porti i Vlorës, Shëngjin, Hani i Hotit dhe Muriqan. Gjithashtu asistenca është përqendruar edhe në forcimin e kapaciteteve të zyrave të Anti drogës dhe Anti Trafikut të Drejtorive të Policive të Qarqeve nën varësinë e të cilave janë këto zyra. Projekti ofroi pajisje logjistike për përdorim të përbashkët mes policisë kufitare dhe doganave, si: automjete, mjete të kontrollit antikontrabandë, pajisje kompjuterike dhe programe për analizën e informacionit kriminal, lexues pasaportash biometrike, pajisje për policinë shkencore për krimin elektronik, etj.

Nga ana tjetër u ofruan trajnime, vizita studimore dhe misione ekspertësh.

Faza e parë e këtij projekti u financua nga qeveria italiane me nje fond prej 1 milion dollarësh, ndërsa faza e dytë u financua nga qeveria gjermane me një fond prej 632.000 dollarësh.

Projekti “Mbi forcimin e kontrollit kufitar dhe drejtësisë penale në luftë kundër trafiqeve ilegale dhe krimit të organizuar në Shqipëri” i ka kushtuar një vëmendje të veçantë edhe trajnimit të oficerëve të policisë dhe doganave si dhe po punon në krijimin e një kurrikule kombëtare përmes trajnimit mbi metodat e kontrollit në kufi.

Vizitat studimore të organizuara në vendet e BE-së në kuadër të këtij projekti, kanë nxitur më tej bashkëpunimin e oficerëve të policisë dhe prokurorëve me homologet e tyre evropianë, sidomos ne shkëmbimin e informacionit dhe vendosjen e kontakteve të drejtpërdrejta. Këto vizita janë konsideruar si shkëmbime të vlefshme eksperiencash mes institucioneve që merren me luftën kundër krimit të organizuar.

Të gjitha aktivitetet e projektit janë përcaktuar në bashkëpunim të ngushtë me palën shqiptare duke iu përgjigjur më së miri nevojave të tyre. 

Drejtoria e Përgjithshme e Policisë së Shtetit