POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 29.03.2010

Njoftim për shtyp

Drejtori Hysni Burgaj priti ne takim Presidentin e Policise Federale Kriminale gjermane Jörg Ziercke

Drejtori i Përgjithshëm i Policisë së Shtetit z. Hysni Burgaj, ka pritur sot, në një takim në ambientet e institucionit që ai drejton, Presidentin e Policisë Federale Kriminale Gjermane, z. Jörg Ziercke, i cili ndodhet për një vizitë dyditore në vendin tonë.

Në qendër të bisedës së zhvilluar ndërmjet drejtuesve të lartë të Policisë së dy vendeve ishte forcimi i mëtejshëm i bashkëpunimit të suksesshëm policor ndërmjet Shqipërisë dhe Gjermanisë, veçanërisht në fushën operacionale të goditjes së krimit të organizuar, si dhe në fushat e shkëmbimit të informacionit dhe të trajnimeve.

Z. Burgaj, gjatë këtij takimi vlerësoi bashkëpunimin gjithnjë e në rritje si dhe asistencën e vazhdueshme që ka dhënë Policia gjermane për Policinë e Shtetit.

Në vijim të bisedës, z. Burgaj kërkoi mbështetjen e mëtejshme të policisë gjermane në fushën e  krimit kompjuterik, kryesisht përmes trajnimeve.

“Policia e Shtetit ka ngritur së fundi edhe një sektor të veçantë për hetimin e krimit kompjuterik, i cili ka dhënë tashmë edhe rezultatet e para pozitive, por duke qenë se ndodhet ende në fazat e para të implementimit të tij, ka nevojë për përmirësime nëpërmjet trajnimeve të ndryshme”, theksoi z. Burgaj.

Po ashtu, z. Burgaj duke u ndalur në arritjet e Policisë së Shtetit në goditjen e krimit të organizuar si dhe në forcimin e bashkëpunimit me strukturat homologe policore të vendeve të rajonit e më gjerë, theksoi se në kuadër të këtij bashkëpunimi vetëm gjatë vitit të kaluar janë zhvilluar 14 operacione të përbashkëta që kanë rezultuar të suksesshme.

Ndërkohë, gjatë fjalës së tij, Presidenti i Policisë Federale Kriminale Gjermane, z. Jörg Ziercke, përgëzoi në mënyrë të veçantë Policinë e shtetit shqiptar për iniciativat e ndërmarra dhe standardet e arritura.

Nga ana tjetër z. Ziercke, duke u ndalur tek fusha e krimit kompjuterik, të cilën ai e cilësoi si temën e së ardhmes në bashkëpunimin policor mes dy vendeve tona, garantoi mbështetjen e mëtejshme të Policisë gjermane.

U diskutua gjithashtu edhe mbi probleme të bashkëpunimit me interes të përbashkët në fushën e rendit dhe sigurisë.

Të pranishëm në këtë takim ishin edhe Zv/Drejtori i Përgjithshëm për Hetimin e Krimit, z.Agron Kulicaj, Zv/Drejtori i Përgjithshëm për Kufirin dhe Migracionin, z. Pëllumb Nako, Zv/Drejtori i Përgjithshëm për Trajnimin Policor, z. Ahmet Haxhiaj, Zv/Drejtori i Përgjithshëm për Shërbimet Mbështetëse, z. Rasim Borishi, si dhe përfaqësues të tjerë të Policisë së Shtetit.

Gjatë kësaj vizite në drejtorinë e Përgjithshme të Policisë së Shtetit, delegacioni gjerman është njohur edhe me sistemin database “Inteligence Manager MEMEX”, për menaxhimin e informacionit kriminal, si dhe sistemin “TIMS”, për përpunimin e të dhënave të shërbimit kufitar.

Drejtoria e Përgjithshme e Policisë së Shtetit