POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 13.03.2010

DEKLARATË PËR SHTYP

dhënë nga Drejtori i Përgjithshëm i Policisë së Shtetit, Z. Hysni Burgaj

Nga Qendra Ndërinstitucionale Operacionale Detare në Durrës, e pajisur me aparatura dixhitale, e inauguruar kohët e fundit, mbrëmë u dha rezultati i parë. Në orët e vona të ditës  së djeshme, datë 12.03.2010, prej saj, u bë i mundur identifikimi i një mjeti lundrues, skaf, i cili po tentonte të vinte nga ishujt në veri të Korfuzit në drejtim të brigjeve shqiptare.

Menjëherë nga kjo qendër, pjesë e së cilës janë dhe strukturat e Policisë së Shtetit, janë informuar shërbimet policore të zonës përreth, me qëllim marrjen e masave si nga toka, ashtu dhe nga deti për kontrollin e territorit.

Në vijim të këtij operacioni nga ana e Komisariatit të Policisë Sarandë në bashkëpunim me Komisariatin e Policisë Kufitare Sarandë dhe Seksionin Kundër Narkotikëve në Drejtorinë e Policisë së Qarkut Vlorë, mbrëmë rreth orës 22.15’, në vendin e quajtur plazhi i Bunecit-Sarandë, u bë i mundur sekuestrimi i një sasie prej rreth prej 676.25 kg lëndë narkotike e llojit cannabis sattiva.

Kjo sasi lëndë narkotike është gjetur e sistemuar në 18 (tetëmbëdhjetë) çanta sportive në një automjet tip Benz furgon.

Nga verifikimet e kryera nga strukturat e policisë rezultoi se ky automjet drejtohej nga shtetasi  Kledian Shefik Koka, vjeç 31, lindur në Progonat, Tepelenë e banues në Sarandë, i dënuar më parë në shtetin Grek me 4.5 vjet burg për “Trafik të narkotikëve”, për të cilin është bërë shpallja e kërkimit.

Nga informacionet e grumbulluara rezulton se kjo sasi lëndë narkotike do të trafikohej në drejtim të vendeve fqinje.

Strukturat e Policisë së Shtetit kanë marrë të gjitha masat dhe po punojnë për të bërë të mundur kapjen e vënien para përgjegjësisë ligjore të autorëve të kësaj vepre penale, mbi të cilët rëndon akuza e trafikimit të narkotikëve parashikuar nga neni 283/a i Kodit Penal.

Theksojmë se me inagurimin e Qendrës Ndërinstitucionale Operacionale Detare, nuk do të ketë asnjë rast të trafikimit që do të kalojë pa u konstatuar e pa u kapur nga strukturat e policisë së shtetit shqiptar apo shteteve fqinje. Bashkëpunimi me institucionet e zbatimit të ligjit në vendet fqinje do të jetë shumë i shpejtë, duke bërë të mundur ndërhyrjen në kohë dhe bllokimin e çdo tentative për trafiqe të paligjshme.

Informacion Shtesë: Shtetasi Kledian Koka, i sipërcituar, është arrestuar nga strukturat e Policisë së Shtetit, rreth orës 11.00' të ditës së sotme, datë 13.03.2010.

Drejtoria e Përgjithshme e Policisë së Shtetit