POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 25.01.2010

Njoftim për shtyp

Raport

Për veprimtarinë e Policisë së Shtetit gjatë vitit 2009

I nderuar zoti Kryeministër.

I nderuar zoti Ministër.

I nderuar zoti Zëvendësministër.

Të nderuar zonja dhe zotërinj të ftuar, pjesmarres në këtë analizë.

Të nderuar punonjes dhe drejtues të Policisë së Shtetit.

Më lejoni të paraqes në këtë analizë një raport përmbledhës mbi veprimtarinë njëvjeçare të Policisë së Shtetit, për vitin 2009, progresin e bërë, realizimet dhe dinamikën, problemet e hasura dhe zgjidhjet e dhëna, si dhe hapat e marra drejt zhvillimit e përsosjes së standarteve profesionale të personelit  të saj.

Në punën e saj Policia është bazuar në prioritetet e programit të Qeverisë, është bazuar në detyrimet që ka patur  nga zbatimi i programit të Ministrisë së Brendshme, nga masat e parashikuara në Strategjinë e Zhvillimit të saj dhe objektivat që ka paraqitur ajo vetë në fillimet e këtij viti.

Në themel të programimit të punës së saj kanë qënë detajimi i prioriteteve e politikave të luftës kundër krimit, në veçanti kundër krimit të organizuar, rritja e nivelit të sigurisë,  ofrimi i shërbimeve sa më cilësore për komunitetin, si dhe progresi i bërë  për zbatimin e detyrimeve në Planin Kombëtar për Zbatimin e Marrëveshjes së Stabilizim Asociimit apo të udhëzuesit për liberalizimin e vizave, si dhe plotësimit të pyetësorit për këtë qëllim.

Në fjalën time, nëpërmjet të dhënave e përshkrimin e aktiviteteve më kryesore do të synoj paraqitjen reale të punës së bërë dhe pasqyrimin me objektivitet të gjëndjes në të cilën ndodhet rendi e siguria në Shqipëri.

Në vitin 2009 në raport me vitet e tjera, janë hedhur hapa cilësore në drejtim të zhvillimit dhe modernizimit të Policisë së Shtetit, nëpërmjet  zhvillimit me sukses të reformave në disa drejtime të ndryshme ndër të cilat, më të rëndësishmet janë:

- hartimi i akteve ligjore e nënligjore që rregullojnë veprimtarinë e Policisë së Shtetit,

- përgatitja dhe zhvillimi i ndryshimeve strukturore e cila bëri riorganizimin e Policisë me synim  ndarjen më efektive të punës e përgjegjësive,

- përgatitja e ndryshimeve në metodën e punës duke synuar përmirësimin e shërbimeve dhe aplikimin e filozofisë së Policimit në Komunitet,

- ndryshimet në personel, bazuar në fazën e parë të studimit për rialokimin e burimeve njerëzore, kryer mbi bazën e vlerësimit të veprimtarisë së çdo funksioni në polici, studim që është kryer për herë të parë në Policinë e Shtetit me asistencë të misioneve policore PAMECA e ICITAP me synim vlerësimin e njeriut të aftë profesionalisht dhe të kualifikuar, si dhe

- plotësimin në vazhdimësi i bazës logjistike e paisjeve të policisë për rritjen cilësore të tyre e për rrjedhojë zbatimin sa më mirë të detyrave.

Ndryshimet në struktura dhe në personelin e Policisë, u ideuan  e realizuan për të sjellë cilësi më të lartë në Policinë e Shtetit, për të bërë të mundur  përzgjedhjen e personelit e për të vlerësuar individët e aftë profesionalisht, si dhe kryerjes me cilësi të objektivave e detyrave të programuara për policinë.

Për realizimin e  ndryshimeve strukturore të Policisë, në bashkëpunim e me asistencën misioneve PAMECA dhe ICITAP, u krye studimi i plotë për veprimtarinë e çdo funksioni në polici. Ky studim bëri të mundur rivlerësimin e burimeve njerëzore, me qëllim

- fuqizimin e Policisë Kufitare e Migracionit, si dhe  shërbime të tjera specifike të policisë

- shkurtimin e aktiviteteve të ruajtjes së objekteve e shtimin e kontrollit të territorit,

- shkurtimin e funksioneve mbështetëse dhe rritjen e funksioneve operuese duke dhënë mundësinë e arritjes së një raporti sa më funksional midis shërbimeve operacionale dhe atyre mbështetëse në Policinë e Shtetit.

Aktualisht personeli i Policisë së Shtetit është bërë edhe më i përafërt në raportet me vendet e zhvilluara perëndimore duke patur 1 polic për rreth 420 banorë nga 1 polic për rreth 370 banorë qe eshte standardi i tyre.

Prioritete të punës për 2009 kanë qënë: - rritja e nivelit të luftës kundër krimit në pergjithësi e krimit të organizuar në veçanti, - rritja e standardeve të policimit duke synuar rritjen e sigurisë në vend e cilësisë së rendit, - ngritjen e nivelit të punës për parandalimin e aksidenteve e rregullimin e qarkullimit të mjeteve, - rritjen e standardeve të kontrollit të kufirit si dhe forcimin e marrëdhënieve me komunitetin, institucionet e tjera të zbatimit të ligjit dhe policitë homologe.

Realizimi i këtyre prioriteteve kërkoi një angazhim serioz të të gjithë shërbimeve policore si dhe marrjen e masave për :

·        Ngritjen e infrastrukturës ligjore, në përputhje me zhvillimet e Policisë dhe përqasjes së saj sipas standardeve të vendeve të BE-së.

Gjatë këtij viti janë hartuar 3 ligje, nga të cilët veçohet ligji “Për Mbrojtjen e Dëshmitarëve dhe Bashkëpunëtorëve të Drejtësisë”, miratuar nga Kuvendi, më 22. 10. 2009.

Njëkohësisht janë hartuar  edhe  20 Projekt-vendime të Keshillit te Ministrave, 16 urdhra e udhëzime  të Ministrit të Brendshëm, si dhe  22 urdhra të Drejtorit të Përgjithshëm e rregullore  të karakterit të aktit normativ profesional

Aktet e  miratuara janë hartuar me asistencë të misioneve të huaja  PAMECA e ICITAP, si dhe në perputhje të plotë apo të pjesëshme  me legjislacionin e  vendeve të BE-së apo dhe rekomandimeve të akteve të tjera ndërkombëtare

-Përmirësimi i metodës së punës së personelit policor ka qënë një nga drejtimet e rëndësishme të trajtuara gjatë vitit 2009, duke e parë atë si mjetin më të mirë të rritjes së eficensës në punë. Kështu gjatë këtij viti nga gjithë departamentet e Drejtorisë së Përgjithshme janë hartuar dhe vënë në zbatim Manualet e Procedurave Standarde të punës, proces ky që realizohet për herë të parë në strukturat tona, si dhe janë miratuar rregullore dhe përmirësuar ndjeshëm programimi i punës.

Krahas implementimit të strategjive, u hartuan një sërë programesh e plane veprimi për koordinimin e veprimeve të strukturave e shërbimeve policore në shkallë kombëtare si  plani i veprimit, miratuar me urdhër të Ministrit të Brendshëm “Për luftën kundër kultivimit të bimëve narkotike”, Plani i veprimit “Për masat e marra gjatë fushatës së zgjedhjeve qershor 2009”, planin e masave “Për sigurimin e rendit e qetësisë dhe rritjen e sigurisë në rrugë gjatë sezonit turistik veror”, etj.

Rol të rëndësishëm në përmirësimin e metodës së punës për strukturat vendore kanë luajtur edhe inspektimet e kryera në Drejtoritë e Policisë së Qarqeve për probleme të menaxhimit të punëve, kryerja e studimit lidhur me rialokimin e burimeve njerëzore dhe analiza faktike që ju bë punës së çdo funksioni në Policinë e Shtetit dhe rekomandimet e dhëna për çdo aktivitet të kontrolluar e monitoruar.

-Rritja e kapaciteteve e aftësive profesionale të personelit policor është parë si një prioritet për cilësinë në sherbim. Kështu gjatë vitit 2009 janë zhvilluar 209 trajnime, pra 116 trajnime më shumë se sa ishin planifikuar. Një numër i konsiderueshëm trainimesh janë propozuar dhe zhvilluar nga donatorë të ndryshëm kryesisht misionet policore, shtetet partnere europiane apo organizatat jo qeveritare të cilat me këtë rast dëshiroj ti falenderoj për kontributin e tyre. 

Në kurset e zhvilluara kanë marrë pjesë 3926 punonjës policie, prej të cilëve janë certifikuar 3184 punonjës policie.

Po ashtu u bë e mundur zhvillimi i trajnimeve për detyrat e Policisë së Shtetit gjatë procesit zgjedhor (Zgjedhjet e përgjithshme për Kuvendin e Shqipërisë). Në trajnim morën pjesë punonjësit e policisë që u ngarkuan me detyra në procesin zgjedhor, si dhe monitoruan veprimet e policisë gjatë këtij procesi.

Veprimtaria e Policisë së Shtetit në zgjedhjet e 28 qershorit mori vlerësim maksimal nga Qeveria Shqiptare, subjektet politike që morën pjesë në procesin zgjedhor dhe monitoruesit shqiptarë dhe të huaj që mbikëqyrën zgjedhjet.

-Rritja e bashkëpunimit policor ndërkombëtar. Viti 2009 shquhet për rritjen e bashkëpunimit policor ndërkombëtar rajonal e më gjërë, ku përveç funksionimit të oficerëve të kontaktit do veçoja lidhjen e 12 marrëveshjeve të bashkëpunimit me një seri vendesh të rajonit dhe me gjërë, si dhe 5 protokolle e plane veprimi në zbatim të marrëveshjeve të lidhura më parë.

mund të përmendim këtu:

-Marrëveshjet ndërqeveritare midis Shqipërise dhe Bosnjë-Hercegovinës, Spanjës ,Cekisë, Greqisë “Për luftën kundër krimit”,

-Marrëveshjet ndërqeveritare me Malin e Zi, Kosovën dhe Bosnjë-Hercegovinën “Për ripranimin e personave me qëndrim të parregullt”,

-Marrëveshja ndërministrore midis Shqipërise dhe Italisë, si dhe midis Shqipërise dhe “Zyrës Evropiane Policore”, ”FRONTEX”etj. 

Gjatë këtij viti bashkëpunimi ndërkombëtar është zhvilluar dhe intensifikuar më tej. Konkretisht kemi marrëdhënie shumë të mira bashkëpunimi me vendet e rajonit si me Maqedoninë, Turqinë, Italinë, Greqinë, Malin e Zi, Institucionet e Zbatimit të Ligjit  në Kosovë,  etj, por edhe me vende të tjera si Zvicrën, Francën, Britaninë, Belgjikën vendet nordike dhe Gjermaninë. Një ndihmëse në shkëmbimin e informacioneve dhe realizimin e operacioneve të përbashkëta kanë dhënë Interpoli, Qendra e SECI-t në Rumani si dhe Oficerët e kontaktit që veprojnë në vendet respektive. Në Shqipëri vepron Zyra Ndërlidhese Italiane Interforce si dhe Oficerë kontakti e atashe policorë nga Greqia, Franca, Vendet Nordike, Gjermania, Mbretëria e Bashkuar etj. Zyra e DEA-s në Romë, gjithashtu luan një rol aktiv në shkëmbimin e informacioneve si dhe për trajnimin e oficerëve të policisë shqiptare. Sic e përmëndëm edhe më lart janë kryer 10 operacione ndërkombëtare në bashkëpunim me autoritetet policore dhe gjyqësore të këtyre vendeve.

Një bashkëpunim shume të mirë kemi patur edhe me misionet PAMECA dhe ICITAP kryesisht në kuadër të ndihmës në pajisje dhe trajnime, si dhe me organizatat ndërkombëtare si UNODC dhe INCB në drejtim të asistencës.

·        Vazhdimi i punës për informatizimin e policisë dhe rritjen e teknologjisë së kontrollit.

Në vitin 2009 ka vazhduar puna për zbatimin e projekteve TIMS, RIMS, sistemit të komunikimit DATACOM, si dhe programit të analizës së informacionit kriminal MEMEX. Në këtë vit arritje e rëndësishme është vënia në punë e sistemeve të mësipërme në gjithë vendkalimet kufitare edhe në funksion të menaxhimit më të mirë të kontrollit të hyrjeve e daljeve në kufi.

Marrja e masave të permendura më sipër ka ndikuar në përmirësimin e punës së Policisë së Shtetit dhe e ka bërë atë një partnere të besueshme për komunitetin dhe policitë homologe në botë.

Duke reflektuar mbi arritjet e problemet, duke analizuar faktorët pozitive,  mangësitë e pengesat bëhet një përmbledhje e shkurtër e  problemeve kryesore që na kanë shqetësuar gjatë vitit 2009.

1-Lufta kundër krimit  është objektivi kryesor i aktivitetit të Policisë së Shtetit dhe do të analizohet sipas formave kryesore të shfaqjes së saj, duke përmëndur fillimisht rezultatet e arritura kundër kriminalitetit në përgjithësi për vitin 2009 e masat që janë marrë për parandalimin e goditjen e tij dhe në vazhdim,  do të raportoj për arritjet në luftën kundër krimit të organizuar, dhe krimeve të tjera

Sipas statistikave të Policisë gjate  vitit 2009 kanë ndodhur 13100 vepra penale nga të cilat janë zbuluar autorët për 9865 prej tyre ose 75%.

Departamenti për Hetimin e Krimit ka menaxhuar strukturat e luftës kundër krimit, duke krijuar kushte për rritjen e eficensës në punë, zgjidhur problemet e dinamikës si dhe orientimit të strukturave vendore, nëpërmjet akteve të dërguara, monitorimeve, inspektimeve e analizave drejt një  force proaktive me eficensë të lartë, ka asistuar e kryer, nëpërmjet personelit të saj operacione të suksesëshme goditëse, rrjedhojë e së cilës është eliminimi i grupeve kriminale.

Objektivat e vendosura në fillim të vitit, për  parandalimin e kriminalitetit dhe uljen e krimit të vrasjes, krahasuar me një vit me parë, Policia e Shtetit i ka realizuar duke bërë të mundur uljen e kriminalitetit me 319 vepra penale  ose rreth 4 % si dhe uljen e krimit të vrasjes  me rreth 11%. është për tu theksuar se në shënojme për herë të parë mbas viteve 1997 numrin më të ulët të vrasjeve në vendin.

Realizimi i objektivave është parë i lidhur ngushtë me goditjen e grupeve kriminale , kështu gjatë këtij viti janë goditur  142 grupe kriminale , nga të cilët 64 për krime të rënda kundër personit e pronës, 31 për luftën kundër  narkotikëve, 23 për trafiqe të paligjëshme dhe 24  për vepra penale në fushën e krimeve ekonomike.

Një shqetësim i veçantë për policinë në këtë vit kanë qënë vjedhjet e pronës, të cilat vazhdojnë të jenë problematike për zona të caktuara të vendit, sidomos vjedhjet e banesave, vjedhjet e lokaleve e të makinave. Kemi parashikuar për vitin 2010, një ndryshim të strategjisë së luftës kundër krimit të pronës me qëllim rritjen e rezultateve në këtë drejtim. Ndryshimi strategjisë do të perfshijë parashikimin e gjithë opsioneve të mundshme për përmirësimin e manaxhimit të drejtimit të  punës kundër krimeve ndaj pronës.

Duke paraqitur punën e kryer në luftën, kundër krimit të organizuar dhe  kundër krimeve të pastrimit të parave, të korrupsionit, të fallsifikimit të monedhave etj, në këtë material raportues, po analizoj vetëm treguesit kryesorë të këtyre veprimtarive duke dhënë një tabllo te shkurtër të progresit të kryer si më poshtë:

• Per luftën kundër drogës

Lufta kundër drogës tanimë ka tregues të performancës në rritje, e shprehur kjo në cilësinë e goditjeve të kryera, si dhe në asgjësimin e rrjeteve apo grupeve kriminale. Ndër treguesit më pozitivë që përmënden për këtë periudhë është rritja  me rreth 40 % e sekuestrimit të drogës heroinë të  kapur në vendin tonë, ulja e ndjeshme e kultivimit të kanabisit me rreth 14 % dhe i sasive të dërguara nga  Shqipëria në drejtim të Italisë apo vendeve të tjera fqinjë.

Për këtë periudhë janë eleminuar 31 grupe kriminale dhe goditur 651 raste të shitjes, trafikimit të lëndëve narkotike  apo kultivimit të bimës së kanabisit, duke vënë në pranga 419 autorë të këtyre veprave.

Në analizën e rasteve dhe situatës së trafikimit konstatohet një ulje në treguesit e tranzitit të drogave të forta nëpërmjet Shqipërisë, duke shprehur në këtë mënyrë një kontroll më të mirë të teritorit në vend si dhe të menaxhimit të kontrollit të kufirit hyrjeve e daljeve.

Kjo konfirmohet edhe nga statistikat e dërguara zyrtarisht nga pala Italiane, ku sipas të dhënave në vitin 2009 u kapën rreth 39 kg. heroinë kundrejt 62 kg të kapura në vitin 2008  dhe rreth 173 kg në vitin 2007. po kështu edhe për tranzitimin e kokainës ku gjatë vitit 2009 të dhënat bëjnë fjalë për zero sasi të kapur, ndërsa në vitet 2008 është kapur  rreth 4 kg dhe në vitin 2007 rreth 14 kg.

Nga analiza e  punës dhe treguesve të kriminalitetit për vitin 2009  për krimin ekonomik e financiar konstatohet:

·        Ruajtja e standardit të punës të vendosur në vitin e kaluar në të gjithë procesin e investigimit të krimeve financiare, por ndërsa ky standard është ruajtur nga struktura në qendër ende  nuk  është në nivelin e duhur  në strukturat e bazës.

·        Rritje e përgjegjshmërisë dhe korrektësisë në hetimin e veprave penale.

·        Ruajtja e integritetit të  oficerëve të policisë të kësaj strukture.

·        Hetimi   dhe vënia para drejtësisë e zyrtarëve të lartë dhe me imunitet praktika pune këto që nuk kanë qenë vitin e kaluar.

Policia shkencore.

Gjatë vitit 2009 shërbimi i Policisë Shkencore ka tregues më të mirë të punës së saj, që konsiston kryesisht në  kryerjen e ekspertimeve të kërkuar nga  prokuroria, gjykata, policia gjyqësore si dhe  nga “të tretë”, persona fizikë apo juridikë.

Gjatë vitit 2009 vetëm në Institutin e Policisë Shkencore janë kryer gjithsej 9650 ekspertime nga  9320 të kryera në vitin 2008 ose 330 më shumë se një vit më parë. Nga Laboratorët Rajonale të Policisë Shkencore janë kryer gjithësej 1528 ekspertime

Treguesit e punës së këtij shërbimi janë të lidhura ngushtësisht me treguesit në rritje të autorëve të veprave penale dhe dokumentimin e veprimtarisë së tyre me prova shkencore.

Nëpërmjet ekspertimeve daktiloskopike janë identifikuar 783  persona përgjegjës dhe 872 autorë të dyshuar të veprave penale , pra  evidentohet rritja e numrit të personave të identifikuar si autorë të dyshuar të veprave penale, në krahasim me vitet e kaluara.

Me sistemin AFIS janë identifikuar 795 autorë të dyshuar të veprave penale. Po ashtu, me anën e këtij sistemi janë evidentuar 1792 raste kur personat kanë përdorur identitete të ndryshme.

ZQK Interpol Tirana:

Interpol Tirana gjatë vitit 2009 ka  thelluar bashkëpunimin me agjensitë e tjera të zbatimit të ligjit në funksion të goditjes së veprimtarisë kriminale e kapjes se autorëve të krimit.

Kështu gjatë vitit 2009 janë ekstraduar drejt vëndit tonë 86 persona kundrejt 75 të vitit 2008. Duhet theksuar se rritja e numrit të ekstradimeve jo vetëm që është një drejtësi e munguar që çohet në vend, por njëkohësisht fshehja e elementëve kriminale në vendet e tjera tashmë s’është më një strehë e sigurtë për ta.

Departamenti për Hetimin e  Krimit në prioritetet e vitit 2010 do te fokusohet në thellimin e luftës kundër, krimit të organizuar, krimit ekonomik e financiar dhe krimeve të rënda ndaj personit e pronës.

Përmirësimi i rezultateve pozitive të arritura gjatë vitit 2009 në luftën kundër kriminalitetit do ta bëjnë  Policinë e Shtetit një partner më të  besueshëm për policitë homologe të rajonit dhe ato të  Bashkimit Evropian, dhe vendin tonë një vend më të sigurtë për qytetarët e vet dhe vizitorët e huaj

Menaxhimi i kufirit

Viti 2009 ka qenë viti i konsolidimit të strukturave të Policisë Kufitare dhe Migracionit si shërbim me vehte, brenda strukturës së Drejtorisë së Përgjithshme të Policisë së Shtetit.

Departamenti për Kufirin dhe Migracionin, ka bërë përmirësime të rëndësishme në përsosjen e metodës së punës dhe performancës së strukturave , përmirësimin e treguesve të parandalimit të krimit ndërkufitar, menaxhimin e migracionit dhe forcimin e kontrollit të të huajve në territor, menaxhimin dhe trajnimin e burimeve njerezore, përmirësimin e infrastrukturës logjistike nëpërmjet përmirësimit të kushteve e paisjeve të punës si dhe menaxhimin me efikasitet   të burimeve financiare.

Duke vlerësuar aktivitetet dhe realizimin e tyre konstatojmë se ky departament i ka realizuar  në mënyre optimale objektivat e parashikuara dhe ka rritur cilësinë e shërbimeve.

Masat e marra nga Departamenti për Kufirin dhe Migracionin për kontrollin dhe mbikqyrjen e kufirit shtetëror janë mbështetur në rekomandimet e KE dhe ato të percaktuara në Marrveshjen Shengen për kufirin të cilat kanë synuar në këto drejtime kryesore:

n      në menaxhimin e kalimin legal të shtetasve, mallrave  dhe mjeteve e në përpunimin në kohë të dokumentacionit të shtetasve të huaj,

n      në luftën për parandalimin dhe goditjen e trafiqeve ilegale që zhvillohen nëpërmjet kufirit  shtetëror,

Si rezultat i punës së bërë gjatë këtij viti nga të gjitha strukturat e Policise Kufitare në qëndër dhe në bazë, është rritur më tej cilësia e korrektesa në  të gjitha veprimet për kontrollin kufitar, për menaxhimin e flukseve të hyrje-daljeve e vecanërisht në periudhën e verës dhe në rastet e festave

Gjatë këtij viti është përballuar dhe rritja me rreth 65 % e hyrjeve-daljeve të të huajve në Shqipëri. Kështu numri i shtetasve të huaj që kanë hyrë në Shqipëri është  2 237 962 persona në një kohë që një vit më parë ka qenë 1 419 191 persona.

Policia Kufitare e Migracionit, për këtë vit ka arritur rezultate në parandalimin dhe luftën ndaj krimit të organizuar, trafikimit të qënieve njerëzore e parandalimit të kalimeve ilegale të kufirit, trafikimit të lëndëve narkotike, kontrabandës së mallrave të ndryshme, etj.

Kështu gjatë këtij viti janë identifikuar 410 vepra penale në kufi dhe janë marrë në përgjegjësi penale 433 autorë të tyre.

Një drejtim i rëndësishëm i Departamentit të Policisë Kufitare dhe Migracionit ka qenë bashkëpunimi me të gjithë strukturat e Policisë së Shtetit, si në përgatitjen e akteve normative, ashtu dhe në drejtim të parandalimit dhe goditjes së krimit ndërkufitar.

Në mënyrë të veçantë është bashkëpunuar me agjensitë e tjera që operojnë në kufi dhe konkretisht me shërbimin doganor , shërbimin fito-sanitar, Kapiteneritë e Porteve dhe  agjensitë e tjera shtetërore e private që operojnë në kufi.

Në kuadrin e zbatimit të protokolleve për patrullimin e përbashkët me vendet  fqinjë janë zhvilluar, me Malin e Zi 168 patrullime të përbashkëta, me Maqedoninë 89  dhe palën greke 10 operacione të përbashkëta.

Ndër treguesit më të mirë të goditjes së krimit ndërkufitar  po ju përmend rritjen e rasteve të kapjeve të drogave në kufi nga 15 raste të vitit të kaluar në 24 raste për këtë vit, ose rritjen e kapjeve të personave në kërkim me rreth  27 %, rritjen e kapjeve të shtetasve shqiptare në tentativë për kalim të paligjshëm të kufirit me rreth 10 %, rritjen e kapjeve të shtetasve të huaj në tentative për kalim të paligjshëm të kufirit me rreth  46 % etj.

Rendi e Siguria Publike

Gjate viti 2009, puna e strukturave të Sigurisë Publike, është fokusuar në zbatimin e objektivave e prioriteteve te parashikuara ne fillim te vitit per garantimin e rendit dhe të sigurisë publike në të gjithë territorin e vendit, implementimin e Strategjisë së Policimit në Komunitet, rritjen e sigurisë rrugore, etj.

Treguesit  kryesorë për këtë periudhë kanë qenë;

§         Janë kryer veprimet procedurale për 3816 vepra penale nga të cilat janë zbuluar 3412, ose e shprehur në përqindje zbulueshmërie 89%, janë zbuluar 16 vepra penale të vjetra, në këtë veprimtari kriminale janë implikuar gjithsej 3854 autorë të veprave, Janë menaxhuar 7645 aktivitete të ndryshme masive.

§         Janë mbështetur institucione të tjera shtetërore në fushën e zbatimit të ligjit për 27.000 raste.

§         Janë menaxhuar dhe zgjidhur gjithsej 20.000 konflikte të ndryshme për motive pronësie dhe motive të tjera.

§         Jane kapur në flagrancë për kryerjen e veprave të ndryshme penale 1657 persona.dhe 744 persona në kërkim.

Është bërë e mundur kontrolli i territorit nëpërmjet shtimit të patrullave të përgjithshme, riorganizimit të shërbimeve, përmirësimit të metodës së kontrollit e monitorimit, si dhe angazhimit në rritje të personelit policor për parandalimin e krimit dhe shkeljeve të tjera të ligjit.

Vetëm për procesin zgjedhor janë realizuar shërbime policore në lidhje me mbarëvajtjen e gjithë procesit zgjedhor, duke menaxhuar 1233 aktivitete të ndryshme elektorale, është bërë ruajtja dhe sigurimi i 66 – KZAZ-ve,  dhe 4746 Qëndra Votimi në të gjithë territorin e vendit, gjithsej 4812 Objekte Zgjedhore.

Për mbulimin me shërbim të këtyre objekteve zgjedhore janë angazhuar me shërbim gjithsej 5000 punonjës policie.

Shërbimet e Policisë së Shtetit arritën që të realizojnë objektivat dhe prioritet e përcaktuara edhe për keto zgjedhje, duke shënuar progres të mëtejshëm në vendosjen e ruajtjen e standardeve të punës policisë në rastet e zhvillimit të zgjedhjeve elektorale në vendin tonë. 

Në fushën e qarkullimit rrugor objektivat kryesore për këtë vit kanë qenë  - rritja e parametrave të Sigurisë Rrugore,  zbatimin e normave të sjelljes,  sigurimit të një trafiku të rrjedhshëm për të gjithë përdoruesit e rrugës, parandalimin e aksidenteve automobilistike, sensibilizimin e opinionit publik për rritjen e edukates rrugore  dhe shtimit të  besimit tek shërbimet e Policisë Rrugore.

Por sa jane realizuar ato?

Gjatë vitit 2009 kanë ndodhur gjithsej 1316 aksidente nga këta: 334 të vrarë, 1309 të plagosur. Si duket dhe më sipër, numri i aksidenteve dhe pasojave të tyre  është më i madh krahasuar me  të njëjtën periudhë të vitit të kaluar  (1096 aksidente, 270 të vrarë, 1142 të plagosur). Aksidentet më të mëdha dhe pasojat e tyre kanë ndodhur gjatë muajve Qershor, Korrik e Gusht.

Faktorët e rriskut për aksidente automobilistike  për vitin 2009 kundrejt   vitit 2008 janë:

·        Gjatë vitit 2009 numri i mjeteve të regjistruara në Shqipëri është rritur mbi 15% krahasuar me vitin 2008.

·        Gjatë vitit 2009 kanë qarkulluar në territorin e Shqipërisë mbi 1 milion  e 200 mijë mjete ( gjate sezonit turistik) rreth 400 mijë mjete më shumë se sezoni i vitit 2008).

·        Gjate vitit 2009 është rritur numri i akseve të reja rrugore në përdorim kundrejt vitit 2008.

Duke iu referuar të dhënave statistikore rezulton se kemi një rritje të numrit të përgjithshëm të aksidenteve me 220 aksidente po ashtu për këtë vit  kemi rritje të numrit të aksidenteve me pasojë vdekjen për 64 persona.

Nisur nga të dhënat e sipërme dilet në përfundimin se strukturat e policisë rrugore nuk i kanë realizuar objektivat  e parashikuara për këtë vit dhe  kanë nevojë riorganizimi dhe monitorimi më të mirë të shërbimeve që ofrojnë.

Ne presim që strukturat e Drejtorisë Policisë Rrugore të paraqesin obsionet e tyre për të rritur më tej nivelin e punës me qëllim uljen e numrit të aksidenteve dhe rritjen e sigurisë rrugore. Masat e parashikuara prej tyre duhet të sjellin ndryshime në funksionimin e shërbimeve të policisë rrugore e rritjen e nivelit të punës së personelit të këtij shërbimi. Ky projekt  mbasi të shqyrtohet nga grupi i politikave do të konkretizohet dhe realizohet në objektivat e vitit 2010.

Forcat lëvizëse operacionale

Gjatë vitit 2009 këto shërbime kanë bërë të mundur zbatimin e detyrave dhe rritjen e cilësisë së shërbimeve.

Shërbimet më kryesore kanë qenë :

§         kapja e personave tepër të kërkuar.

§         ruajtja e të dënuarve me arrest shtëpie

§         sigurimi i personaliteteve të larta shtetërore gjatë aktiviteteve elektorale si dhe vizitave të ndryshme në të gjithë vendin.

§         shoqërimi i të paraburgosurve nga një qark në tjetrin për transferim ose për seanca gjyqësore.

§         sigurimi i rendit e qetësisë në mbështetje të policisë vendore.

§         menaxhimi i situatës e kontrolli i territorit në kufirin e gjelbër me Greqinë, për ndalimin e trafikut të paligjshëm të klandestinëve.

Janë realizuar 780 shërbime, me pjesmarrjen e 7151 punonjës policie, të ndara këto sipas Drejtorive të Policisë së Qarqeve

Drejtoria e Përgjithshme e Policisë është e angazhuar në mënyrë permanente në plotësimin e kushteve optimale të punës dhe pajisjes me teknikën bashkëkohore të forcave speciale të domosdoshme për të realizuar detyrën e tyre

Trajnimi Policor

Objekti dhe qëllimi kryesor i veprimtarisë së Departamentit për Trajnimin Policor ishte për vitin 2009, përmirësimi i kapaciteteve profesionale të personelit të Policisë së Shtetit nëpërmjet trajnimeve.

Ne kemi më shumë se tre vite që zbatojmë modelin e ri  të trajnimeve në polici. Implementimi i plotë dhe përqasja e tij me eksperiencat e vendeve më të përparuara do të vazhdojë të mbetet prioritet edhe për të ardhmen.

Në objektivat e këtij departamenti dhe institucioneve mësimore vartëse në fillim të vitit 2009, ka qenë trajnimi i 1500 punonjësve të policisë në shkollën bazë 11 javë për Patrullë të Përgjithshme dhe shkollimi i 300 rekrutëve të rinj në shkollën bazë 22 javë për Patrullë të Përgjithshme.

Këtë vit për herë të parë u zhvillua me sukses procesi trajnimeve për ngritjen në gradë.  Për të arritur në realizimin e këtij objektivi u punua për hartimin e programeve të kurseve, si dhe për hartimin, përmirësimin e përshtatjen e kurikulës.

Gjatë këtij viti janë zhvilluar 11 kurse për ngritjen në gradë. Po ashtu objektiv i rëndësishëm i planifikuar për vitin 2009 ka qenë dhe zhvillimi i programeve për kontrollin dhe ruajtjen e aftësive profesionale Pjesë përbërëse e këtij programi kanë qenë zhvillimi trajnimit për përdorimin e armëve të zjarrit, duke vlerësuar rëndësinë e aftësimit të nevojshëm të personelit policor në këtë drejtim. 

Është e domosdoshme që nga strukturat e këtij departamenti të vazhdohet të punohet për përmirësimin cilësor të procesit të trainimeve ndoshta edhe të rishikimeve të afateve të trainimeve.

Shërbimet Mbështetëse

Shërbimet mbështetëse kanë pasë si prioritet krijimin e kushteve optimale të punës në Policinë e Shtetit, plotësimin e nevojave materiale teknike për zbatimin sa më cilësor të detyrave nga shërbimet policore operuese si dhe zgjidhjen e gjithë problemeve të menaxhimit të burimeve njerëzore e materiale.

Me qëllim përdorimin sa më racional të burimeve njerëzore, rritja e nivelit të profesionalizmit të personelit policor nëpërmjet zhvillimit të programeve të trajnimit për të gjitha rolet dhe nivelet, hartimi i një strategjie për menaxhimin respektiv të personelit si dhe riorganizimi strukturor, ka sjellë efekte pozitive për efektivat e Policisë së Shtetit.

Gjatë këtij viti janë kryer disa aktivitete në menaxhimin e burimeve njerëzore si:

§         Realizimi i procesit të ngritjes në gradë ku aplikuan 1198 punonjës, nga të cilët 993 morën pjesë në konkurim. Janë ngritur në gradë 110 punonjës.

§         Kalimi në funksione civile për 160 punonjës dhe  kaluar në funksione të shërbimeve mbështetëse, kryesisht në 90% te rasteve të nivelin zbatues.

§         Gjate vitit 2009 janë kryer  2050  transferime, lirime, përjashtime dhe ripranime për punonjësit e policisë se të gjitha niveleve

Detajimi i fondeve të akorduara për mallra e shërbime për vitin 2009, u krye brënda datës 10 Janar 2009, gjë që shpejtoi procedurat për hartimin e regjistrit të prokurimeve dhe realizimin e prokurimit të fondeve si për artikujt e përqëndruar në QFMT, ashtu edhe për ato të prokuruara nga strukturat vendore.

Janë për tu përmendur në vecanti zërat e realizuar si :

·        furnizimi me automjete të reja për policinë e shtetit gjatë vitit 2009 (297 copë)

·        Pajisjet për kontrollin e drogave për Policinë Kufitare dhe Migracionin.

·        Pajisjet për kontrollin e pasaportave biometrikë në Pikat e Kontrollit të Kufirit.

·        Pajisja me 300 copë pistoleta “Beretta” dhe 8 komplete zhytjeje me gjithë pajisjet ndihmëse dhe aksesorët e tjerë.

·        Sigurimi i 203 kompleteve mbrojtës taktikë për strukturat e Forcave Speciale dhe të Ndërhyrjes së Shpejtë.

·        Një sërë investimesh në disa komisariate dhe drejtori policie qarku për krijimin e ambienteve të reja ose rikonstruksione të domosdoshme për përmirësimin e kushteve të punës për personelin etj.

Me përparësi është punuar gjatë vitit për dixhitalizimin e informacionit, mirëmbajtjen e sistemeve ekzistuese  dhe zgjerimin e tyre si një proces mjaft i rëndësishëm për punën e strukturave të Policisë së Shtetit.

Në këtë kuadër gjatë vitit 2009, përfundoi implementimi i Sistemit DATACOM, i cili krijoi mundesinë e një infrastrukture të teknologjisë së lartë për implementimin e të gjitha sistemeve të informacionit në interes të strukturave përbërëse të Policisë së Shtetit, si ajo kriminale, rendit, kufirit e mbështetëse, si dhe përfundoi  shtrirja e Sistemit TIMS në të gjitha Drejtoritë e Policisë në Qarqe dhe në të gjitha Pikat e Kalimit Kufitar, duke u dhënë mundësinë e komunikimit dhe transmetimit të informacionit nëpërmjet sistemeve kompjuterike dixhitale, dhe krijuar mundësinë për personelin policor të shkëmbimit të informacionit në kohë reale.

Përparësi për vitin 2010 i është dhënë

-dixhitalizimit të informacionit dhe zhvillimit të sistemeve të teknologjisë së informacionit,

-sigurimit të uniformës së re të policisë së shtetit e cila mund të quhet një revolucion më vehte në ndryshimin e imazhit të policisë së shtetit para komunitetit,

-sigurimit të pajisjeve speciale për strukturat operacionale, 

-Përmirësimi i ambjenteve të punës në strukturat e Policisë së Shtetit.

Në përfundim të kësaj sinteze, më lejoni të parashtroj prioritetet për vitin 2010.

·        Zbatimi I detyrimeve që rrjedhin nga Programi I Qeverisë dhe Ministrisë së Brëndshme.

·        Ndjekja e detyrave të plan veprimeve të strategjive sektoriale dhe planit strategjik të Policisë së Shtetit 2007-2013.

·        Vazhdimi i harmonizimit të legjislacionit të Policisë së Shtetit e përafrimi i tij me atë të Bashkimit Europian dhe akteve të tjera ndërkombëtare .

·        Thellimi i luftës kundër krimit të organizuar, trafiqeve të paligjshme dhe terrorizmit.

·        Realizmi i detyrave të Planit të Veprimit Operacional 2008-2010 “Për implementimin e policimit në komunitet” si një filozofi bashkëkohore

·        Thellimi i bashkëpunimit me agjencistë e zbatimit të ligjit si: Prokurori, SH.I.SH, Tatimet, Doganat, Drejtorinë e Pastrimit të Parave, etj. për të arritur sukses në luftën kundër kriminalitetit dhe forcimit të shtetit ligjor. 

·        Përmirësimi  i burimeve njerëzore dhe infrastrukturës për menaxhimin e kontrollit të kufijve sipas kërkesave të Marrëveshjes së Stabilizim-Asocimit.

·        Realizimi i reformës strukturore në policinë rrugore për të rritur efikasitetin e saj me qëllim parandalimin e aksidenteve e rritjen e sigurisë në rrugë.

·        Rritja e mëtejshme e kapaciteteve profesionale të personelit të policisë, nëpërmjet trajnimit dhe rritjes së etikës profesionale në punë.

·        Implementimi i vazhdueshëm i teknologjisë dixhitale për rritjen e cilësisë së informacionit dhe shërbimeve në strukturat e Policisë së Shtetit.

Në mbyllje, dua të falenderoj gjithë punonjësit e Policisë së Shtetit për kontributin e tyre në aritjen e rezultateve të mësipërme dhe njëkohësisht të falënderoj Zotin Kryeministër dhe Qeverinë për ndihmen e përkrahjen permanente që i kanë dhënë institucionit te policise se shtetit

Ju faleminderit.