POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

Njoftim për shtyp

  Tiranë, më 05.09.2009

Fjala e mbajtur nga Drejtori i Përgjithshëm i Policisë së Shtetit

me rastin e fitimit të gradës “inspektor” të 58 punonjësve të policisë në Drejtorinë e Policisë së Qarkut Tiranë

I nderuar zoti Ministër i Brendshëm

Të nderuar kolegë të misioneve policore ICITAP dhe PAMECA

Të dashur kolegë!

Siç jeni në dijeni, sot jemi mbledhur jo vetëm për të celebruar finalizimin e dytë të suksesshëm të periudhës së provës nga 58 punonjës policie, por edhe për të hedhur një vështrim retrospektiv të rrugës nëpër të cilën ju, por edhe ne bashkë me ju, kemi bërë deri sa arritëm në këtë ditë.

Para rreth një viti e gjysëm në celebruam grupin e parë të inspektorëve të cilët u arsimuan sipas modelit të ri të shkollimit të patrullës së përgjithshme të policisë. Nga kjo kohë deri më sot ne kemi pasur mundësi të shikojmë dhe të prekim efektivisht rezultatet pozitive të arritura nga inspektorët tanë paraardhës gjë që na jep më shumë kurajë dhe besim për të vazhduar shkollimin policor sipas modelit perëndimor që tashmë kemi adoptuar.

Permanent ka qenë edhe kontributi i programit ICITAP dhe misionit PAMECA të cilët na kanë asistuar me ndihmën e tyre në rrugën e shkollimit dhe trainimit të patrullës së përgjithshme. Gjej rastin ti falënderoj me mirënjohje.

Si sot para një viti e gjysëm, kur ne celebruam brezin e parë të “inspektorëve” të policisë së shtetit, ne ishim optimistë për të sjellë ndryshimin e madh që po ndodhte në Policinë e Shtetit. Tashmë me brezin tuaj jemi jo vetëm optimistë, por të sigurt për këto ndryshime.  Rritja e profesionalizmit policor, e drejta e ecurisë në karrierë për gjithsecilin prej jush dhe çdo anëtar të organizatës policore, krijimi dhe konsolidimi i një marrëdhënie të re me komunitetin dhe në shërbim të tij, vlerësimi real i aftësive të gjithsecilit prej jush, janë bazat mbi të cilat po punojmë që të strukturojmë organizatën tonë policore.

Ndërsa ju jeni tashmë brezi i dytë i gjeneratës që provoi në praktikë se format e reja, dhe shërbimi ndaj komunitetit nuk ishin “thjesht fraza të ndërtuara bukur nga ana estetike”, por një princip bazë drejt të cilit duhet të orientohet e mbështetet e gjithë puna jonë në të ardhmen. Ju, me kurajë, iniciativë, kulturë profesionale e qytetare, arritët të demonstroni supremacinë e policimit me bazë në komunitet, përkundrejt formave tradicionale të shërbimit policor.

Shkollimi  dhe puna juaj bënë që nga sot, ju të jeni punonjës policie me kompetenca të plota policore, e kjo përkthehet në shtimin e përgjegjësive, kjo do të thotë se duhet të ballafaqoheni me sfida te reja edhe më të vështira, por jo të panjohura tashmë për ju, e aq më pak të pakapërcyeshme.

Personalisht dhe bashkë me stafin drejtues të Drejtorisë së Përgjithshme të Policisë së Shtetit kemi  ndjekur hap pas hapi të gjithë progresin e bërë nga ana juaj. Jam ndjerë krenar kur qytetarë te ndryshëm, pavarësisht statusit të tyre shoqëror, më kanë shprehur kënaqësinë në lidhje me shërbimet që kanë ofruar patrullat e përgjithshme në të gjithë Drejtoritë e Policive në Qarqe, sikurse kemi analizuar çdo rast kur jemi informuar për ndonjë veprim jo të hijshëm të tyre, që për hir të vërtetës kanë qenë sporadike e nuk kanë arritur ta zbehin të tërën.

Në këtë ditë, që për ju duhet të mbahet mend gjatë, përfitoj nga rasti që t’u inkurajoj që, pasi e keni hedhur hapin e parë të sigurt, të mbani parasysh:

Së pari; Në veprimtarinë dhe aktivitetin tuaj, duhet që në çdo rast të përçohet fryma e re që ka sjellë ligji i ri i Policisë së Shtetit, duhet të demonstroni fytyrën e re të një punonjësi policie të orientuar nga publiku e në shërbim të tij. Ky duhet të jetë i vetmi indikator matës dhe produkti i pritshëm i policimit që ju duhet të afroni.

Së dyti; Ju kujtoj, se ju jeni pjesë e rëndësishme e reformave më të mëdha që ka ndërmarrë policia deri më sot. Shkollimi, trainimi në terren dhe veprimtaria juaj në periudhën dy vjeçare të provës janë pjesë përbërëse e këtyre reformave që Policia e Shtetit të shkojë drejt plotësimit të standardeve të një organizate policore perëndimore.

Së treti; Ashtu siç keni bërë deri më sot në punën tuaj, kur jeni ndeshur me praktika apo qëndrime të cilat janë të përkundërta me ato që citova më lart, mos hezitoni, sfidojini dhe refuzojini ato! Juve ju bie për detyrë të jeni pengesa e parë e metodave dhe formave të punës të vjetra që shfaqen tek një pjesë e personelit tonë policor. Përdoreni shkollimin e ri dhe energjitë që ju jep mosha në kahun e duhur dhe do të kuptoni sa të dobishëm do të jeni për shoqërinë, organizatën, familjen dhe veten tuaj.

Mos harroni, jeni ndër brezat që keni misionin për të ndryshuar mentalitetet e vjetra në Polici. Bëni më të mirën që dini dhe do të shikoni se do të jeni të suksesshëm.

Eksperienca e grupit të parë të “inspektoreve” të policisë që tashmë po jep frutet e veta në punën e Policisë së Shtetit  na bën optimistë për suksesin e brezit tuaj duke konstatuar me kënaqësi shtimin e radhëve të saj me punonjës policie të arsimuar me një shkollim të ri dhe bashkëkohor dhe me një praktikë të re të standardeve perëndimore.

Mbështetja ime personale, por dhe i stafit që unë drejtoj, do të jetë si gjithmonë e padiskutueshme.

Ju përgëzoj për gradën e “inspektorit” që morët sot, e mos u kënaqni me kaq.  Ju uroj suksese dhe urimet më të mira për Ju e familjet tuaja.

Drejtoria e Përgjithshme e Policisë së Shtetit