POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

Njoftim për shtyp

Tiranë, me 05.06.2009

Fjala e Drejtorit te Luftës Kundër Krimeve të Rënda, Drejtues i Parë Nikolin Bala në Forumin Mendimi i Lirë

 

Të nderuar pjesmarrës;
 

Para disa vitesh u mbajt Konferca Kombëtare " Shteti dhe shoqëria civile në mbrojtje të të drejtës së jetës" ku fenomeni i gjakmarrjes zuri një vend të vecantë, për t`a minimizuar dhe për t`i dhënë fund atavizmit arkaik dhe për t`i dhënë vektor veprimit të shtetit ligjor . Sot në detyrën që ushtroj dhe si qytetar i këtij vendi, kam qënë dhe mbetem i obliguar, i ndjeshëm dhe i motivuar për t`i dhënë ligjit hapësirë dhe forcë veprimi mbi parcelat e ndikimit të të Drejtës Zakonore Penale, e vecanërisht të gjakmarrjes, për t`a lënë atë në skrapin e historisë pos komuniste shqiptare. 

Pa dyshim që strukturat e Policisë së Shtetit janë të parat që përballen me krimin e vrasjes në përgjithësi, dhe ato për hakmarrje dhe gjakmarrje në vecanti, sepse ajo ka detyrimin ligjor për sigurimin e rendit dhe të qetësisë publike, për mbrojtjen e jetës së qytetarit dhe të veprimtarisë së komunitetit.

Krimi i vrasjes për gjakmarrje ka specifika të vecanta që lidhen ngushtë me psikologjinë, traditën dhe me zhvillimet historike e social-kulturore të zonës. Për rrjedhojë problemi është kompleks me integrim tërrësor e jo diferencial dhe nuk lidhet vetëm me strukturat e Policisë së Shtetit. Zgjidhja e këtij fenomeni kërkon një angazhim multi dimensional që fillon me komunitetin, pushtetin vendor, instituconet shtetërore, OJF, shkollën, me grupe e individë autoritarë, të cilët së bashku mund dhe duhet t`a shkulim të keqën nga e cila ka kohë që vuajmë.

Drejtoria e Pergjithshme e Policisë së Shtetit, organizatat e policisë në Qarqe e rrethe, i kanë kushtuar rëndësi të vecantë luftës pa kompromis e me tolerancë zero fenomenit të gjakmarrjes, njohjes së gjendjes konkrete të lagjes, zonës, të familjeve në gjak, familjeve të ngujuara, të fëmijëve që për këtë arsye nuk vazhdojnë shkollën, të lindjeve të konflikteve të reja dhe parandalimi i thellimit të tyre.

Padyshim që strategjia e punës sonë mbetet performanca dhe profesionalizmi në evidentimin, parandalimin e rasteve konfliktuale, pa neglizhuar dhe pa ju dhënë presioneve, duke siguruar standarte të larta të sigurisë dhe të qetësisë publike në cdo cep të territorit. Kjo në fund të fundit, është e ardhura neto që n`a obligon ligji në shërbim të komunitetit, është produkti konkret i organizatës së policisë, që vitet e fundit ka si bilanc uljen e krimit të vrasjes në përgjithësi dhe të gjakmarrjes në vecanti.

Po t`ju referohemi shifrave krimi i gjakmarrjes ka pasur dhe ka tendenca të qarta ulje. Kështu, në vitin 1998, nga 573 vrasje 45 prej tyre ishin për gjakmarrje, në vitin 2001 nga 208 vrasje 32 ishin për gjakmarrje, në vitin 1999 ndodhën 496 vrasje nga të cilat 41 me motiv gkakmarrjen, në 2005 nga 131 vrasje 6 ishin për gjakmarrje. Në vitin 2008 shënuam minimumin historik të krimit të rëndë të vrasjes,me 88 vrasje, nga të cilat vetëm 2 vrasje kishin motiv gjakmarrjen.

Në periudhen Janar-Maj 2009 janë evidentuar 33 vrasje nga të cilat nuk kemi pasur asnjë vrasje për gjakmarrje. Shifrat që cituam janë më tepër se optimiste, të cilat të marra si të ardhura neto në shërbim të komunitetit, tregojnë për strategji të qarta e standarte profesionale, potenciale menaxhuese e performancë bashkëkohore të strukturave të policisë së shtetit.

Gjakmarrja ka rrënjë të thella në psikologjinë, mentalitetin, dhe në "të drejtën zakonore" në disa zona në veri të vendit, sidomos në Qarkun e Shkodrës, Lezhës, Kurbin, Krujë, Kukës, Dibër etj., ka inspirues të gjakmarrjes përballë veprimit të Ligjit, ka tendenca të fshehjes së krimit për të vepruar vetëgjyqësia në bazë të Kanunit dhe Dheut, sic ka dhe largime jashtë vendit të autorëve të krimit për t`i shpëtuar përballjes me drejtësinë.
 

Të nderuar miq, zonja e zotërinj.

Me implementimin e Ligjit të Ri për Policinë e Shtetit janë bërë ndryshime esenciale në formë e në strukturën e organizatës, e sidomos kemi arritur brenda dy viteve kapërcime cilësore, në konkretizimin e metodave moderne të policimit. Eshtë e rëndësishme të theksoj se vektori kryesor i eficencës së punës sonë ka qënë dhe mbetet bashkëpunimi me të gjithë faktorët që sigurojnë performancën dhe qëndrueshmërinë e rezultateve. Bashkëpunimi i organizatës së Policisë me komunitetin, organet e pushtetit vendor dhe më gjërë, është trinomi i suksesit dhe në luftën kundër gjakmarrjes.

Për të ilustruar produktin e këtij bashkëpunimi, do t`u servirja disa shifra sinjifikative. Në vitin 2007 janë zgjidhur dhe pajtuar me marrveshje mes palëve 40 066 konflikte që mund të ishin burim i krimeve të rënda dhe të paparashikueshme, ndërsa në vitin 2008 nga 1606 konflikte për pronën janë zgjidhur me marrveshje 1577, nga 1966 konflikte për motive të dobta janë zgjidhur 1867.

Qasja ndaj këtij bashkëpunimi nuk duhet t`i lihet dëshirës, ndërgjegjes profesionale e qytetare të drejtuesve të pushtetit vendor dhe të Policisë së Qarkut, apo inspektorit të zonës, të drejtorive arsimore apo të OJF-ve, se sa detyrimit ligjor për të bashkëpunuar; pra jo thjesht konvergim i aktorëve vullnetarë e civil, por një konvergim institucional.

Institucionalizimi i bashkëpunimit është dhe mbetet kërkesë e rëndësishme, e do të thoja i ngutshëm përballë sfidës së gjakmarrjes. Pra mendoj se ka ardhur koha që të veprojmë konkretisht e me vizion të qartë për të shtruar binarët e një bashkepunimi ligjor, që palët dhe aktorët të kenë obligime ligjore në realizimin e qëllimit të përbashkët për eleminimin e fenomenit.

Ligji Nr. 8465, datë 11. 03. 1999, " Për ndërmjetësimin për zgjidhjen me pajtim të mosmarrveshjeve", ka rëndësi të madhe shoqërore dhe juridike, psikologjike dhe praktike, në vend të spontanitetit të veprimit të vetëgjyqësisë që mund të ketë pasoja dhe tronditje të thella shoqërore, kultivon tolerancën dhe kulturën qytetare, maturinë dhe sensibilizimin real ndaj Ligjit. 

Një problem shqetësues për strukturat e Policisë së Shtetit dhe për gjithë strukturat shtetërore dhe shoqërinë civile, ka qënë dhe mbetet fenomeni i ngujimit, që në të shumtën e herës është kolektiv dhe jo individual. Aktualisht në vendin tonë rezultojnë 152 familje të ngujuara, ose me kufizim lirie dhe konkretisht: në Qarkun e Shkodrës nga të dhëna zyrtare janë të ngujuara ose me kufizim lirie - 109 familje; në Qarkun e Lezhës 13 familje nga të cilat 8 në rrethin e Kurbinit; në Qarkun e Kukësit dhe të Tiranës janë përkatësisht nga 15 krye familjarë të ngujuar.

Përsa i përket fenomenit të fëmijve të ngujuar për shkak të gjakmarrjes nga statistikat e kohëve të fundit rezultojnë se 37 fëmijë nuk frekuentojnë shkollën, dhe këto kryesisht në Qarkun e Shkodrës. Ky është një problem i madh shoqëror për të sotmen dhe të nesërmen dhe kursesi strukturat tona nuk e kanë larguar kujdesin për për sigurimin e një jete të qetë e normale për vazhdimësinë e "fëmijërisë pa gjakmarrje" Por lypset një strategji e përbashkët e strukturave shtetërore, e shkollës dhe e  shoqërisë civile për sensibilizimin e opinionit në luftën e përbashkët për shërimin përfundimtar të kësaj plage mesjetare, e sidomos kur bëhet fjalë për fëmijët.

Për shkak të misionit që ka organizata e Policisë së Shtetit në ruajtjen e rendit dhe të sigurisë publike, në strategjinë e saj për parandalimin dhe goditjen e krimit të vrasjes në përgjithësi dhe për gjakmarrjen në vecanti, ka synuar tek: 

• Përqëndrimi i vëmendjes nga organizatat e policisë në qarqet ku fenomeni i gjakmarrjes është i përhapur duke i dhënë përparësi për zgjedhjen e personelit dhe trajnimin e vazhdueshëm të tyre, për vecoritë e parandalimit të vrasjeve në tërësi dhe ato për hakmarrje dhe gjakmarrje në vecanti;
• Forcimi i bashkëpunimit me organet e prokurorisë për hetimin e shpejtë dhe dënimin sipas ligjit të autorëve të këtyre veprave të rënda penale;
• Organizimin e masave të shpejta dhe të gjithanëshme për kapjen e autorëve të vrasjeve në tërësi dhe për gjakmarrje në vecanti, si një masë efikase për parandalimin e mëtejshëm të gjakmarrjes;
• Arrestimi dhe përballja me drejtësinë të autorëve të dënuar për veprën penale të vrasjes me motiv gjakmarrjen;
• Zbardhja e ngjarjeve të vjetra të vrasjes dhe ekstradimi i autorëve të larguar jashtë vendit duke bashkëpunuar ngushtë me INTERPOLIN;
• Forcimin e gjithanshëm dhe institucionalizimin e bashkëpunimit me strukturat e qeverisjes vendore dhe organet e pushtetit vendor, me OJF dhe organizmat e tjera shoqërore për sensibilizimin e opnionit në parandalimin dhe luftën pa kompromis kundër fenomenit të gjakmarrjes;
• Vëmendje të vecantë i kemi kushtuar bashkërendimit të punës sonë me drejtoritë arsimore dhe shkollat, për thellimin dhe përmirësimin e kurrikulave në edukimin e fëmijve dhe rinisë me frymën e tolerancës e mirëkuptimit, të dashurisë dhe respektit për jetën dhe komunitetin. Ndoshta lypset një përmirësim i teksteve shkollore, ku edukimi të ketë hapësirat e nevojshme për këtë qëllim;
• Janë të nevojshme përmirësimet në kuadrin e veprimit të ligjit pa ekuivok dhe tolerancë për autorët e krimit të vrasjes në përgjithësi dhe për gjakmarrje në vecanti.

Të nderuar pjesmarrës

Policia e Shtetit, strukturat e saj, kanë pasur dhe kanë ndihmën dhe mbështetjen Tuaj pa rezerva, mbeshtetjen e Qeverisë, të organeve të pushtetit lokal, të partnerëve ndërkombëtarë, të mbarë shoqërisë shqiptare drejt përmbushjes me sukses të detyrës fisnike të ruajtjes së jetës dhe rendit publik. Padyshim që dhe takimi i sotëm, puna e bërë me iniciativën e Z. Mentor Kikia për evidentimin e familjeve në hasmëri në Qarkun e Shkodrës është një ndihmë e madhe jo vetëm për komunitetin e kësaj zone, për strukturat e pushtetit vendor, por vecanërisht për organizatën e Policisë së Shtetit, për t`a parë gjendjen në sy, e për të marrë masa të përbashkëta për shërimin e shpejtë dhe përfundimtar të gjendjes.

Jemi të vendosur në luftën pa kompromis kundër krimit të cdo natyre qoftë, të obliguar për sigurimin e standarteve te një vendi anetar në NATO, të një vendi aplikues për anëtarsim në familjen e madhe të Bashkimit Evropian.

Ju siguroj që sfidat që kemi përpara do t`i përballojmë me sukses.

Ju faleminderit.