POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

Njoftim për shtyp

Tiranë, më 29.04.2009

NJOFTIM PËR SHTYP

Shkolla e Policisë, Shpallen fituesit e testimit me shkrim për qarqet Fier, Vlorë, Berat dhe Gjirokastër  

 Në ambjentet e Universitetit Kristal në Fier u zhvillua sot testimi me shkrim i  kandidatëve që kanë aplikuar për të ndjekur studimet në shkollën Bazë të Policisë për “Patrullë të Përgjithshme” nga qarqet Fier, Vlorë, Berat dhe Gjirokastër.

 Këtij testimi ju nënshtruan 152 aplikantë nga këto qarqe, të ndarë në dy grupe. Grupi i parë që përbëhej nga aplikantët nga Qarqet Fier dhe Vlorë iu nënshtrua testimit në orën 07.00’ dhe grupi i dytë që përbëhej nga aplikantët Berat dhe Gjirokastër iu nënshtrua testimit në orën 11.00’.

 Në përfundim të konkurrimit të ditës së sotme u shpallën fitues të testimit me shkrim 68 aplikantë, të cilët arritën të grumbullonin mbi 60 pikë. 

Ashtu sikundër dhe në vitet e mëparshme korrigjimi i testimit u realizua me skaner dhe kandidatët u njohën me rezultatin brenda ditës. 

Kandidatët e shpallur fitues të testimit me shkrim do t’i nënshtrohen fazave të mëtejshme të konkurrimit.  

Aplikantët që rezultuan fitues të testimit me shkrim do t’i nënshtrohen testimit fizik me datën 30.04.2009, në orën 08.00’ në Stadiumin e qytetit të Lushnjës. Aplikantët duhet të paraqiten ditën dhe orën e përcaktuar për testimin fizik të veshur me uniformë sportive.

 Kujtojmë dhe një herë që:

-          Për qarqet Shkodër, Kukës dhe Lezhë testimi me shkrim do të zhvillohet në ambjentet e universitetit “Luigj Gurakuqi” Shkodër në datën 09.05.2009. Kandidatët duhet të paraqiten në orën 07.00’ pranë këtij universiteti.

 -          Për qarqet Elbasan dhe Korçë testimi me shkrim do të zhvillohet në ambjentet e Universitetit “Aleksandër Xhuvani” në Elbasan në datën 18.05.2009. Kandidatët duhet të paraqiten në orën 07.00’ pranë këtij universiteti. 

Të gjithë aplikantët për çdo paqartësi që mund të kenë lidhur me këtë proces mund të drejtohen pranë Zyrave të Personelit në Drejtoritë e Policisë në Qarqe ose pranë Sektorit të Pranimit në Drejtorinë e Përgjithshme të Policisë së Shtetit. Po ashtu mund t’i parashtrojnë pyetjet apo shqetësimet e tyre dhe me e-mail në adresën shkollaepolicise@mrp.gov.al.

 Për gjithë të interesuarit bëjmë me dije se procesi i aplikimeve për të ndjekur studimet pranë Shkollës së Policisë është i hapur gjatë gjithë vitit.

 Drejtoria e Pergjithshme e Policise se Shtetit