POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 25.11.2009

Njoftim për shtyp

Ministri i Brendshëm Z. Lulzim Basha priti në takim Komisionerin e Përgjithshëm të Policisë Federale të Belgjikës Z. Fernand Koekelberg.

Strukturat policore të Republikës së Shqipërisë dhe Mbretërisë së Belgjikës do të thellojnë nivelin e bashkëpunimit dypalësh, posaçërisht për shkëmbimin e informacionit, si dhe për ekzekutimin e fletëarresteve dhe të ekstradimeve të kërkuara nga gjykatat e të dy vendeve respektive.

-Kemi sfida dhe objektiva të njëjta dhe përballemi me të njëjtat kërcënime të kriminalitetit, ndaj duhet të thellojmë bashkëpunimin dhe në veçanti shkëmbimin e përvojës dhe informacionit,- u shpreh Ministri i Brendshëm Z. Lulzim Basha në takimin që zhvilloi sot me Komisionerin e Përgjithshëm të Policisë Federale të Mbretërisë së Belgjikës Z. Fernand Koekelberg.

Ministri Basha paraqiti në takim një pasqyrë të përgjithshme të rezultateve të Policisë së Shtetit kundër të gjitha aktiviteteve kriminale, e në veçanti ndaj krimit të organizuar dhe trafiqeve të paligjshme.

Basha theksoi se rezultatet në luftën kundër kriminalitetit e rendisin Shqipërinë si vendin më të sigurtë sot në Ballkanin Perëndimor, e po kështu Shqipëria nuk përbën sot një vend domethënës për tranzitet e drogës apo trafiqet e tjera të paligjshme.

Nga ana tjetër, Basha bëri të ditur në takim edhe luftën e vazhdueshme kundër akteve korruptive në të gjithë sektorët e administratës publike, duke përmendur faktin se vetëm javët e fundit janë goditur 12 raste të tilla.

Basha tha se hap të rëndësishëm drejt një faze të re të luftës kundër krimit të organizuar përbëjnë edhe ligji “Antimafia” dhe ligji për konfiskimin e aseteve.

Duke u ndalur tek angazhimi i qeverisë shqiptare për përmbushjen e kritereve për liberalizimin e vizave, Ministri Basha informoi për ecurinë e pajisjes së qytetarëve shqiptarë me dokumenta të sigurta identiteti dhe instalimin e sistemeve analoge me vendet Schengen për menaxhimin e integruar të kufirit dhe analizën e informacionit kriminal.

Komisioneri i Përgjithshëm i Policisë Federale të Belgjikës Z. Fernand Koekelberg vlerësoi rezultatet e policisë shqiptare në luftë kundër krimit të organizuar e trafiqeve të paligjshme, si dhe gatishmërinë dhe vullnetin për bashkëpunim në goditjen e elementëve kriminalë.

Koekelberg shprehu interesimin dhe angazhimin e plotë të Policisë Federale të Belgjikës për shkëmbimin e informacionit dhe arritjen e rezultateve konkrete për ekzekutimin e fletëarresteve dhe kryerjen e procedurave përkatëse për të ia dorëzuar drejtësisë personat e kërkuar në të dy vendet.

Shefi i policisë belge shprehu gatishmërinë gjithashtu për të dhënë ndihmesën e nevojshme në fushën e trajnimeve dhe shkëmbimit të përvojës me policinë shqiptare.

Ambasadori i Mbretërisë së Belgjikës në Tiranë Z. Marc Miechielsen, i pranishëm në këtë takim, përgëzoi qeverinë shqiptare dhe në veçanti Ministrinë e Brendshme për progresin e bërë për përmbushjen e detyrimeve në rrugën e integrimit të vendit në Bashkimin Europian.

Në këtë aspekt, ambasadori Miechielsen vlerësoi përmbushjen e standarteve të kërkuara në zgjedhjet parlamentare të qershorit si dhe rezultatet domethënëse në fushën e përmbushjes së kritereve të udhërrëfyesit për liberalizimin e vizave, e po kështu në luftën kundër kriminalitetit e trafiqeve të paligjshme.

Në takim ishte i pranishëm edhe Drejtori i Përgjithshëm i Policisë së Shtetit Z. Hysni Burgaj.