POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 23.11.2009

Njoftim për shtyp

 Ministri Basha:Fazë e re në luftën kundër mafias. Kjo luftë do të fitohet nga Policia e Shtetit.

Ministri i Brendshëm Z. Lulzim Basha paralajmëroi sot një fazë të re të luftës së Policisë së Shtetit kundër mafias dhe krimit të organizuar.

 -Ligji “Antimafia” dhe ligji për konfiskimin e pasurive jane mjete të reja ligjore në luftën e pashtershme të Policisë së Shtetit kundër krimit të organizuar. Një fazë e re ka nisur në luftën kundër mafias. Kjo luftë do të fitohet nga Policia e Shtetit. Në bashkëpunim me partnerët tanë ndërkombëtarë, në javët dhe muajt e ardhshëm, ne do të intensifikojmë goditjen ndaj krimit të organizuar duke shënuar nivelet më të larta të kësaj lufte,- deklaroi Ministri Basha.

Këtë deklaratë Ministri i Brendshëm Z. Lulzim Basha e bëri pas një ceremonie dhurimi të disa pajisjeve për trajnime mbi taktikat mbrojtëse të programit ICITAP, ku ishte i pranishëm edhe Ambasadori i SHBA Z. John L. Withers II.

Pajisjet, si kostume taktike, pistoleta mësimore, thika e shkopinj mësimore, dyshekë të palosshëm, mburoja etj, iu dhuruan Qendrës së Formimit Policor.

Duke falënderuar për ndihmën e dhënë dhe duke theksuar se përvoja amerikane që po fiton Policia e Shtetit është një nga praktikat më të mira ndërkombëtare të shërbimit policor, Ministri Basha tha se avancimi i policisë shqiptare drejt standarteve euroatlantike është padyshim një meritë e padiskutueshme e kontributit euroatlantik, dhe në këtë rast qeverisë së SHBA, për pajisjen e policisë me mjete dhe sisteme bashkëkohore dhe trajnimin me metodat më të përparuara të policimit.

Ministri Basha u shpreh se në sajë të bashkëpunimit, Policia e Shtetit do të njohë rezultate edhe më të larta në punën e saj.