POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

Njoftim për shtyp

  Tiranë, më 06.07.2009

Drejtori i Përgjithshëm i Policisë së Shtetit vlerëson performancën e punonjësve të policisë gjatë procesit zgjedhor
 

Sot më datë, 06.07.2009 Drejtori i Përgjithshëm i Policisë së Shtetit, z. Ahmet Prençi zhvilloi një mbledhje me drejtorët e Policisë në Qarqe, e ata Rajonal të Policisë Kufitare e Migracionit për të analizuar veprimtarinë e policisë para dhe gjatë procesit zgjedhor.

Drejtori i Përgjithshëm bëri një ekspoze të gjithë punës së bërë nga Policia e Shtetit duke u ndalur konkretisht në:

Zbatim të detyrave institucionale të Policisë së Shtetit dhe ato të përcaktuara në Kodin Zgjedhor të Republikës Shqipërisë, në Udhëzimin e KQZ-së nr.7, datë 23.03.2009, “Për detyrat e Policisë së Shtetit dhe Forcave të Ushtrisë në zgjedhjet për Kuvendin 2009”, ka qenë e angazhuar maksimalisht dhe ka marre të gjitha masat për kryerjen e detyrave me rigorozitet e paanësi.

Për të siguruar një performancë maksimale, veprimtaria e Policisë së Shtetit u nda në disa faza, të shtrira në kohë, e konkretisht;
 

• Faza përgatitore, e cila ka filluar që në fillim të vitit, deri në fillimin e fushatës zgjedhore.

U planifikua dhe u sigurua e gjithë baza teknike e logjistike e domosdoshme për realizimin e detyrave për garantimin e masave para, gjatë dhe pas zgjedhore.

Me mbështetjen dhe në bashkëpunim me Prezencës së OSBE-së, Misionin PAMECA III, Programin ICITAP, KQZ-së dhe Prokurorisë së Përgjithshme, u përgatit programi i trajnimit për punonjësit e policisë të të gjitha niveleve.

Ky program trajnimi u zhvillua i ndarë në tre faza, sipas modelit kaskadë. Për nivelin e lartë drejtues, u trajnuan 85 punonjës, për nivelin e mesëm drejtues te cilët kane shërbyer si trajner për trajnimin e nivelit baze, u trajnuan 97 punonjës, dhe faza e trete, për nivelin zbatuese u zhvillua trajnimi pranë ambienteve te strukturave te policisë vendore, duke trajnuar rreth 5500 punonjës policie te këtij niveli.

Po në kuadrin e përgatitjes profesionale, Prezenca e OSBE-së në Shqipëri, financoi botimin e 6000 kopjeve të “librit të xhepit” me detyrat e punonjësve të Policisë së bashku me 400 kopje të Kodit Zgjedhor, të cilat ju shpërndanë strukturave policore që ligji i ngarkonte me detyra për garantimin e procesit zgjedhor.

• Faza për fushatën zgjedhore, e cila ka filluar që më datë 28 Maj dhe vazhdon deri në fund të fushatës.

Me fillimin zyrtar të fushatës elektorale në të gjitha strukturat vendore dhe qendrorë të Policisë u ngritën Grupet e Koordinimit dhe Drejtimit, grupe të cilat çdo ditë ndoqën nga afër situatën e rendit dhe monitoruan shërbimet e policisë që u aktivizuan për sigurimin e 1233 aktiviteteve elektorale të zhvilluara nga subjektet e ndryshme, ku janë aktivizuar 8054 punonjës policie, 1270 automjete, duke kryer rreth 2097 orë shërbimi.

• Faza për masat në ditën e zgjedhjeve dhe sigurimin e procesit pas zgjedhor
   

Gjatë ditës së zgjedhjeve datë 28.06.2009 dhe deri me datë 01.07.2009 nga shërbimet e Policisë së Shtetit janë realizuar ndërhyrje në Qendrat e Votimit dhe në Vendet e Numërimit të Votave me vendim të Komisioneve të Qendrave të Votimit dhe të Komisioneve Zonal të Administrimit të Zgjedhjeve. Konkretisht nga ana e policisë janë bërë 22 ndërhyrje për të stabilizuar situatat e krijuara.

Gjithashtu, Drejtori i Përgjithshëm i Policisë ka falënderuar drejtuesit e policisë, pjesëmarrës në takim, dhe u ka kërkuar ti transmetojnë falënderimet të gjithë punonjësve të policisë që u angazhuan në procesin zgjedhor, dhe që me korrektësinë, profesionalizmin dhe përgjegjshmërinë që treguan gjatë realizimit të detyrave, bënë që Policia të vazhdojë të vlerësohet me konsiderata të larta nga vëzhguesit vendorë dhe ata ndërkombëtarë.

Në këtë takim z. Prençi vlerësoi me konsiderata maksimale të gjithë aktorët, si dhe institucionet që bashkëpunuan me policinë dhe kontributin e dhënë prej tyre në mbarëvajtjen e këtij procesi.

Këtë takim e parapriu një mbledhje e thirrur nga Ministri i Brendshëm, z. Bujar Nishani me drejtuesit qendrorë dhe vendorë të Policisë, të cilët morën falënderimet e z. Nishani për performancën e treguar në procesin zgjedhor.

Drejtoria e Pergjithshme e Policise se Shtetit