POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

Njoftim për shtyp

Tiranë, me 16.01.2009

Fillojnë aplikimet për Shkollën e Policisë, procesi i hapur gjatë gjithë vitit, lehtësira për aplikantët

16.01.2009

Duke filluar nga data 16.01.2008, të gjithë kandidatët e interesuar për të ndjekur studimet në Shkollën Bazë të Policisë për “Patrullë të Përgjithshme”, mund të aplikojnë pranë të gjithë Drejtorive të Policisë në Qarqe.

Aplikimi është i hapur për të gjithë të interesuarit gjatë gjithë vitit dhe formularët e aplikimit mund të tërhiqen pranë strukturave të personelit në çdo Drejtorie Policie në Qark. Ndërkohë Drejtoria e Personelit në Drejtorinë e Përgjithshme të Policisë së Shtetit në bashkëpunim me Drejtoritë e Policisë në Qarqe do të bëjnë njoftimin e aplikantëve për datën dhe orën kur do të zhvillohet testimi me shkrim.

Për të krijuar lehtësira për aplikantët Drejtoria e Përgjithshme e Policisë në bashkëpunim me Universitetin “Luigj Gurakuqi” në Shkodër, Universitetin “Aleksandër Xhuvani” në Elbasan dhe Universitetin “Kristal” në Fier, ka bërë të mundur që testimi me shkrim për aplikantët të zhvillohet sipas këtij përcaktimi:

-          Për qarqet Tiranë, Durrës dhe Dibër testimi me shkrim do të zhvillohet në ambjentet e Akademisë së Policisë “Arben Zylyftari” Tiranë.

-          Për qarqet Shkodër, Kukës dhe Lezhë testimi me shkrim do të zhvillohet në ambjentet e universitetit “Luigj Gurakuqi” Shkodër.

-          Për qarqet Elbasan dhe Korçë testimi me shkrim do të zhvillohet në ambjentet e Universitetit “Aleksandër Xhuvani” në Elbasan.

-          Për qarqet Fier, Vlorë, Berat dhe Gjirokastër testimi me shkrim do të zhvillohet në ambjentet e Universitetit Kristal Fier.

Kriteret e domosdoshme që duhet të përmbushë aplikanti për të ndjekur studimet në Shkollën Bazë të Policisë për “Patrullë të Përgjithshme” janë:

-          Të jetë shtetas i Republikës së Shqipërisë.

-          Të ketë zotësi për të vepruar.

-          Të jetë në gjendje të mirë shëndetësore dhe i aftë fizikisht për të kryer detyrën.

-          Të ketë mbaruar shkollën e mesme.

-          Të japë informacionin e kërkuar në lidhje me punën e tij të mëparshme ose ndonjë çështje tjetër që lidhet me pranimin e tij në shërbimin policor.

-          Të mos jetë i dënuar penalisht me vendim të formës së prerë.

-          Të ketë dëshmi të aftësisë së drejtimit të automjetit të tipit B.

Strukturat e personelit pranë Drejtorive të Policisë në Qarqe do t’u japin të gjithë aplikantëve informacionin e nevojshëm për procesin e testimit si: shembuj pyetjesh, udhëzimet e testimit me shkrim, si dhe sqarime mbi mënyrën e plotësimit të fletës së skantronit.

Ashtu sikundër dhe në vitet e mëparshme korigjimi i testimit do të bëhet me skaner dhe kandidatët do të njihen brenda ditës me rezultatin e testimit me shkrim.

Të gjithë aplikantët për çdo paqartësi që mund të kenë lidhur me këtë proces mund të drejtohen pranë Zyrave të Personelit në Drejtoritë e Policisë në Qarqe ose pranë Sektorit të Pranimit në Drejtorinë e Përgjithshme të Policisë së Shtetit. Po ashtu mund t’i parashtrojnë pyetjet apo shqetësimet e tyre dhe me e-mail në adresën shkollaepolicise@mrp.gov.al.

Çdo material i nevojshëm për procesin e aplikimit, si dhe për fazat e përzgjedhjes së kandidatëve do të publikohet dhe në faqen e internetit të Policisë së Shtetit www.asp.gov.al.

Policia e Shtetit, përmes këtij proçesi që është ndërtuar bazuar në metodat më të mira perëndimore, synon përzgjedhjen e kandidatëve sa më cilësorë për të shërbyer si punonjës policie.

Është objektiv parësor i Policisë së Shtetit të përzgjedhë vetëm kandidatët e kualifikuar si më të mirët, përcaktuar nga një proçes i drejtë, transparent dhe i plotë përzgjedhje, në mënyrë që të përmbushë me sukses misionin e saj dhe të sigurojë një shërbim cilësor për qytetarët.

Drejtoria e Pergjithshme e Policise se Shtetit