POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 30.12.2009

Njoftim për shtyp

Ceremonia e përfundimit të kursit IX të shkollimit bazë

në Qendrën e Formimit Policor

Drejtori i Përgjithshëm i Policisë, z. Hysni Burgaj, mori pjesë sot, datë 30.12.2009, në ceremoninë e ndarjes së çertifikatave për 375 kursantët që përfunduan me sukses kursin IX të shkollimit bazë, në Qendrën e Formimit Policor. Për njëmbëdhjetë javë me radhë, gjatë periudhës 12 tetor – 30 dhjetor 2009, janë trajnuar pranë kësaj Qendre punonjës të policisë të nivelit zbatues, të gradave inspektor dhe kryeinspektor.

  “Ne vlerësojmë dhe vazhdojmë të jemi të bindur se shërbimi policor i orientuar për nga qytetari është ajo çka komuniteti pret nga ne. Dhe ne besojmë që kemi gjetur rrugën e përshtatshme për  përmirësimin e profesionalizmit në polici nëpërmjet një sistemi trajnimi të  përshtatshëm dhe efikas.”, theksoi gjatë fjalës së tij përshëndetëse Drejtori i Përgjithshëm i Policisë së Shtetit, z. Hysni Burgaj.

Z. Burgaj ka garantuar të pranishmit për mbështetjen e vazhdueshme të trajnimeve bazë për punonjësit e policisë, si dhe zhvillimin e një sistemi trajnimi të modeluar sipas praktikave më të mira perëndimore, të aftë për t’iu përgjigjur nevojave profesionale të organizatës.

“Që sot, pothuajse gjysma e numrit të përgjithshëm të punonjësve të policisë të nivelit zbatues që shërben si patrullë e përgjithshme, ka përfunduar trajnimin bazë dhe është e gatshme që të shërbejë  sipas koncepteve të reja. Që sot balanca e shërbimit policor do të zhvendoset më dukshëm për nga modelet moderne të policimit. Duke shfrytëzuar këtë rast, dua të them që edhe në këtë fundviti, në ditët e ndërrimit të viteve policia e shtetit do të vazhdojë të jetë në shërbim, me njerëz të pajisur me koncepte të reja dhe më një shërbim më cilësor për qytetarin.”, theksoi z. Burgaj.

Me këtë rast, Drejtori i Përgjithshëm i Policisë së Shtetit ka falenderuar për mbështetjen e madhe dhe asistencën e dhënë nga partnerët ndërkombëtar, veçanërisht nga programi ICITAP për trajnimin bazë.

Në përfundim të fjalës përshëndetëse, Drejtori i Përgjithshëm i Policisë së Shtetit i ka uruar punonjësve të policisë festën e ndërrimit të viteve si dhe suksese të mëtejshme në shërbimin e çmuar policor.

Më pas, veç çertifikatave për përfundimin me sukses të kursit IX të shkollimit bazë, u shpërndanë çertifikata edhe për instruktorët e kursit dhe kursantët me rezultate më të larta.

Drejtoria e Përgjithshme e Policisë së Shtetit