POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

  Tiranë, më 29.12.2009

Njoftim për shtyp

Ceremonia e dhurimit të pajisjeve financuar nga qeveria gjermane në kuadër të projektit të zyrës së UNDOC

Në Drejtorinë e Përgjithshme të Policisë së Shtetit është zhvilluar sot, në datë 29.12.2009, ceremonia e dhurimit të disa pajisjeve logjistike, si: automjeteve, mjeteve të kontrollit antikontrabandë, pajisjeve kompjuterike dhe programeve për analizën e informacionit kriminal, lexues pasaportash biometrike, pajisje për policinë shkencore për krimin elektronik, pajisjen e vënien në funksionim të sallës së trajnimit për Policinë Kufitare në Vlorë, etj. Dhurimi i këtyre pajisjeve bëhet në kuadër të mbylljes së fazës së dytë të Projektit “Mbi forcimin e kontrollit kufitar dhe drejtësisë penale në luftë kundër trafiqeve ilegale dhe krimit te organizuar në Shqipëri”.

Gjatë fjalës përshëndetëse në këtë ceremoni, Drejtori i Përgjithshëm i Policisë së Shtetit, z. Hysni Burgaj, ka shprehur në emër të Policisë së Shtetit vlerësimet dhe konsideratat më të larta për bashkëpunimin disavjeçar me Zyrën e Kombeve të Bashkuara për drogat dhe krimin në kuadër të projektit “Mbi forcimin e kontrollit kufitar dhe të drejtësisë penale në luftë kundër trafiqeve ilegale dhe krimit të organizuar në Shqipëri”. Nga ana tjetër z. Burgaj ka falenderuar gjithashtu Qeverinë Gjermane për mbështetjen e çmuar dhe kontributin e vazhdueshëm që ka dhënë për policinë shqiptare dhe në mënyrë të veçantë për realizmin e fazës së dytë të këtij projekti të rëndësishëm, me një financim prej 632.000 dollarësh. Duke vlerësuar kontributin e partnerëve ndërkombëtarë në mbështetjen që i kanë dhënë policisë së shtetit për arritjen e standardeve të një policie Europerëndimore, Z. Burgaj theksoi:

“Një ndihmesë të vyer në këtë drejtim ka dhënë dhe implementimi me sukses i këtij projekti, i cili jo vetëm ka sjellë një kontribut mjaft të rëndësishëm në luftën kundër krimit të organizuar, që përbën njëkohësisht dhe një nga prioritet e Policisë së Shtetit, por edhe ka ndikuar ndjeshëm në forcimin e mëtejshëm të bashkëpunimit ndërmjet strukturave të Policisë së Shtetit dhe strukturave Doganore për luftën kundër krimit ndërkufitar.”, ka theksuar Drejtori i Përgjithshëm i policisë së Shtetit, z. Hysni Burgaj.

Vlerësime për këtë bashkëpunim janë dhënë edhe nga Ambasadori Gjerman, z. Bernd Borchardt, i cili theksoi kontributin e këtij projekti në forcimin e kapaciteteve të strukturave vendore të policisë shqiptare në luftën kundër drogës dhe trafiqeve të paligjshme. Sipas z. Borchardt, ky projekt është tepër i rëndësishëm edhe për faktin se është domethënës për Shqipërinë në procesin e liberalizimit të vizave në vitin e ardhshëm. “Bashkëpunimi në kuadër të këtij projekti dhe suksesi i tij gjeti jehonë edhe gjatë vizitës së delegacionit të misionit të BE-së, i cili konstatoi procedurat e verifikimit të dokumentacionit”, theksoi ambasadori Gjerman. Gjithashtu z. Borchardt garantoi mbështetjen e vazhdueshme të qeverisë gjermane në këto sektorë.

Ndërkohë gjatë fjalës së tij, Drejtori i Përgjithshëm i Doganave, z. Endri Pema, vuri në dukje bashkëpunimin maksimal që ekziston mes strukturave të Policisë së Shtetit dhe strukturave doganore në plotësimin e standardeve Shengen, menaxhimin e integruar të kufijve, si dhe implementimin e politikave për lëvizjen e lirë dhe luftën kundër krimit të organizuar.

Në fund te ceremonisë është bërë edhe nënshkrimi i Aktit të Dorëzimit të pajisjeve nga ana e Drejtorit të Përgjithshëm të Policisë së Shtetit, Drejtorit të Përgjithshëm të Doganave dhe Ambasadorit Gjerman.

Informacion mbi projektin:

Ky projekt u fokusua në forcimin e bashkëpunimit ndërmjet doganave dhe policisë në luftën kundër krimit ndërkufitar, kryesisht në Pikat e Kontroll Kalimit Kufitar dhe doganor te Kakavijë, Tre Urat, Qafë Botë, Porti i Sarandës, Porti i Vlorës, Shëngjin, Hani i Hotit dhe Muriqan. Gjithashtu asistenca është përqendruar edhe në forcimin e kapaciteteve të zyrave të Anti drogës dhe Anti Trafikut të Drejtorive të Policive të Qarqeve nën varësinë e të cilave janë këto zyra. Projekti ofroi pajisje për përdorim të përbashkët mes policisë kufitare dhe doganave, trajnim, vizita studimore dhe misione ekspertësh.

Projekti “Mbi forcimin e kontrollit kufitar dhe drejtësisë penale në luftë kundër trafiqeve ilegale dhe krimit të organizuar në Shqipëri” i ka kushtuar një vëmendje të veçantë trajnimit të oficerëve të policisë dhe doganave si dhe po punon në krijimin e një kurrikule kombëtare përmes trajnimit mbi metodat e kontrollit në kufi.

Vizitat studimore të organizuara në vendet e BE-së në kuadër të këtij projekti, kanë nxitur më tej bashkëpunimin e oficerëve të policisë dhe prokurorëve me homologet e tyre evropianë, sidomos ne shkëmbimin e informacionit dhe vendosjen e kontakteve të drejtpërdrejta. Këto vizita janë konsideruar si shkëmbime të vlefshme eksperiencash mes institucioneve që merren me luftën kundër krimit të organizuar.

Të gjitha aktivitetet e projektit janë përcaktuar në bashkëpunim të ngushtë me palën shqiptare duke iu përgjigjur më së miri nevojave të tyre. 

Drejtoria e Përgjithshme e Policisë së Shtetit