POLICIA E SHTETIT

Ministria e Brendshme 

 Policia e Shtetit

 email: policiaeshtetit@mrp.gov.al

Adresa: Bulevardi Bajram Curri, Tiranë-Shqipëri   

 Botuar nga:

Prezenca e OSBE-së në Shqipëri

 Adresa: Sheraton Tirana Hotel&Towers, Kati 1

Sheshi “Italia”

Tel.: +355 4 240001/4/5

Fax:+355 4 248684

 Dizenjimi i faqes së parë nga Mira XHAMALLATI                                                      

Fjala e Drejtorit të Përgjithshëm të Policisë së Shtetit

I nderuar koleg !

Puna juaj si punonjës i Policisë së Shtetit është e një rëndësie madhore për krijimin e një mjedisi të sigurtë për zgjedhje të lira dhe të ndershme, për ruajtjen e rendit publik dhe hetimin e veprave penale.

 Që një shtet demokratik të zhvillohet dhe lulëzojë, ai duhet të respektojë parimin e zgjedhjeve të lira dhe të ndershme, ku qytetari ka të drejtë dhe mundësi të votojë në përputhje me ligjin dhe të ketë sigurinë e votës së fshehtë dhe të numërimit të votave me efektshmëri dhe saktësi. 

Në zbatim të Kodit Zgjedhor të Republikës së Shqipërisë , Policia e Shtetit ka për detyrë të kontribuojë pozitivisht në procesin parazgjedhor dhe të sigurojë zbatimin e ligjit gjatë votimit dhe numërimit të votave. Qytetarët nuk mund ta ushtrojnë të drejtën e tyre themelore për të votuar dhe të drejtën për siguri dhe liri, pa pasur më parë besim se Policia vepron në mbështetje dhe në mbrojtje të të drejtave të tyre, të cilat janë një gur themeli i demokracisë. 

Për sa më sipër është detyra juaj dhe pritshmëria themelore e qytetarëve që ju të  punoni për të siguruar zbatimin e ligjit, veçanërisht dispozitat e Kodit zgjedhor dhe të udhëzimit të Komisionit Qendror të Zgjedhjeve. “Askush nuk mund të dalë mbi ligjin” dhe si punonjës të Policisë së Shtetit me kompetenca të veçanta, ju duhet të tregoni në çdo rast gjatë kryerjes së detyrave, standarde më të larta se ato që priten nga qytetarët e thjeshtë në lidhje me etikën personale dhe integritetin në zbatimin e ligjit. 

Paragrafi 3 i nenit 6 të Ligjit Për Policinë e Shtetit, përcakton shprehimisht që Policia është e depolitizuar dhe Policia duhet t’i kryejë detyrat në përputhje me ligjin. Çelësi për policimin e suksesshëm të zgjedhjeve është kryerja e detyrave me ndershmëri dhe paanshmëri, nën detyrimin për t’i kryer ato pa diskriminim dhe në zbatim të nenit 68, “Kufizimet në jetën politike të punonjësve të policisë”. Paragrafi 3 i nenit 68 është i një rëndësie madhore për qëndrimin tënd gjatë zgjedhjeve gjatë zgjedhjeve, “Punonjësi i Policisë ka për detyrë të ushtrojë funksionet e veta në mënyrë të paanshme dhe pavarësisht bindjeve të tij politike”. 

Për kryerjen e detyrave gjatë zgjedhjeve do t’ju kërkohet të kryeni trajnime shtesë. Dëshiroj që ju t’i kryeni këto trajnime dhe t’i zbatoni ato në praktikë. 

Broshura e vënë në dispozicionin tuaj siguron informacion të vlefshëm të cilin ju duhet ta njihni dhe kuptoni ndërsa u afrohemi zgjedhjeve të 28 Qershorit 2009. 

Suksesi do të arrihet me anë të ndjekjes së metodave të mëposhtme : 

a)       Të kuptuarit e rolit dhe sjelljes që pritet nga ju si punonjës të Policisë së Shtetit në kryerjen e detyrave gjatë zgjedhjeve dhe broshura udhëzuese do t’ju ndihmojë në këtë drejtim.

b)       Ndjeshmëria e vazhdueshme nga ana juaj për nevojat e policimit në komunitet dhe nevojave, frikës dhe pritshmërive të komuniteteve lokale të cilat do të kërkojnë përgjigje prej policisë në raste trazirash apo edhe për të rritur besimin dhe sigurinë e tyre me anë të prezencës së oficerëve të policisë.

c)       Njohuritë tuaja mbi trajtimin dhe hetimin e shkeljeve që mund të ndodhin. Kur t’ju vijnë ankesat nuk do të keni kohë të hapni librat. Duhet të jeni të përgatitur.

d)      Përkushtimi juaj personal ndaj detyrës së policisë në mënyrë të pavarur dhe pa diskriminuar, që të mundësojë grumbullime të ligjshme partiake dhe dialog politik, pa kompromentuar paanshmërinë dhe integritetin e Policisë së Shtetit.

e)       Dëshira juaj për të raportuar shqetësimet dhe për të vepruar në rastet kur e kërkon ligji, me kurajo dhe paanësi me qëllim përkrahjen e ligjit.

 Duke qenë punonjës të Policisë së Shtetit, në komunitet ku jetojmë shihemi si drejtues dhe njerëz të ndershëm e me integritet e që kundërshtojnë veprimet e kundërligjshme. Që të mund t’iu përgjigjeni këtyre pritshmërive, duhet të jeni që tani të përgatitur për sfidat që ju dalin përpara dhe duhet të keni njohuritë e duhura mbi procedurat që duhen ndjekur për të siguruar që Policia e Shtetit edhe një herë të lavdërohet për përkushtimin dhe asistencën e saj në ndihmë të zgjedhjeve të drejta e të lira në Shqipëri.

 Kemi mbështetjen e misioneve ndërkombëtare të asistencës teknike PAMECA III dhe ICITAP, së bashku me OSBE-në për dhënien e trajnimit dhe materialeve të referimit, të cilat do t’ju udhëheqin në marrjen e vendimeve.

 Paraprakisht, pranoni falënderimet e mia personale për punën e lodhshme dhe përkushtimin ndaj kësaj detyre shumë të rëndësishme që tashmë ka ndërmarrë Policia e Shtetit. Për më tepër, dëshiroj të kërkoj mbështetjen tuaj, përmes policimit të efektshëm dhe etik në përmbushjen e qëllimit për Zgjedhje të Lira dhe të Drejta për të gjithë qytetarët tanë.

 Koleg i nderuar,

Raportet e organizmave ndërkombëtare për zgjedhjet e viteve 2005 dhe 2007, nënvizuan qëndrimin mjaft pozitiv të shërbimeve të policisë ndaj proceseve elektorale. Le të konfirmojmë, të gjithë së bashku edhe një herë, së Policia e Shtetit do të jetë pararojë dhe promotor i vlerave më të mira të një shoqërie demokratike.

 E drejta e votës është e shenjtë. Ne të gjithë duhet të jemi krenarë dhe të privilegjuar që Ligji na jep detyrën fisnike të ruajtjes së shenjtërisë së kësaj të drejte. Të drejtat e individëve janë të shenjta. Detyra jonë për mbrojtjen e të drejtave është po aq e shenjtë.

Drejtor i Përgjithshëm i Policisë së Shtetit

Ahmet Prençi

K U J T E S Ë

Detyrat e Punonjësit të Policisë në

 Procesin Zgjedhor 2009

 DETYRAT E POLICISË SË SHTETIT

 1. Policia e Shtetit në vijim “Policia’, është shërbim policor i Republikës se Shqipërisë. Misioni i Policisë është të ruajë rendin dhe sigurinë publike ne përputhje me ligjin dhe duke respektuar të drejtat e liritë e njeriut.

Policia ushtron veprimtarinë e saj në territorin e Republikës se Shqipërisë.

2. Përgjegjësitë e Policisë janë si më poshtë:

a)      të mbrojë jetën e njerëzve, sigurinë dhe pronën e tyre personale;

b)      të parandalojë, të zbulojë dhe të hetojë, në përputhje me ligjin penal dhe me ligjin procedural penal, veprat penale dhe autorët e kryerjes së tyre;

c)      të mbrojë rendin dhe sigurinë publike;

      ç) të mbikëqyrë dhe të drejtojë trafikun rrugor në rrugë për përdorim publik, në përputhje me legjislacionin rrugor;

d)      të mbikëqyrë dhe të kontrollojë kufijtë shtetërorë të Republikës së Shqipërisë;

dh) të mbrojë individë, mjedise dhe objekte të caktuara nga rreziqe të mundshme;

e)      të administrojë dhe të mbrojë informacionin e klasifikuar, me përjashtim të rasteve kur përcaktohet ndryshe në legjislacion;

      ë) të kryejë detyrat e parashtruara në këtë ligj, në ligje të tjera, si dhe në aktet nënligjore, të cilat parashikojnë detyra për Policinë.

3. Çdo punonjës i Policisë ka për detyrë të përmbushë të gjitha përgjegjësitë e përcaktuara në pikën 1 të këtij neni, pavarësisht se cilës strukturë i shërben.

4. Çdo punonjës i Policisë ka atributet e Policisë Gjyqësore, në përputhje me Kodin e Procedurës Penale dhe ligjin përkatës për organizimin dhe funksionimin e kësaj policie.

5. Policia është institucion i administratës publike, strukturë e Ministrisë së Brendshme, në vijim ministria.

6. Statusi i Policisë nuk ndryshon edhe në gjendje lufte, gjendje të jashtëzakonshme apo fatkeqësie natyrore.

7. Policia është e depolitizuar.

PARIME TE PËRGJITHSHME

1. Rendi dhe siguria gjatë periudhës zgjedhore ruhet nga Policia e Shtetit.

2. Ndalohet përdorimi i Forcave të Ndërhyrjes së Shpejtë dhe atyre Speciale  në ruajtjen e objektëve zgjedhore.

3. Asnjë  person i  armatosur nuk lejohet të qendrojë në mjediset e qëndrës së votimit. Përjashtohen nga rregulli punonjësit e Policisë së Shtetit, kur janë në ushtrim të detyrës, në përputhje me nenin 109 të Kodit Zgjedhor.

4. Ndalohet përdorimi i forcave të Policisë së Shtetit dhe atyre të Ushtrisë që mund të cënojnë vullnetin e zgjedhësve.

5. Ndalohet përdorimi i forcave komando dhe forcave të tjera të ushtrisë gjatë fushatës zgjedhore, përveçse me urdhër me shkrim te Ministrit te Brendshëm dhe Ministrit te Mbrojtjes, kur këto forca nevojiten për ruajtjen e objekteve te rendësisë se veçante,  ne zëvendësim të punonjësve te Policisë së Shtetit ose në zbatim të detyrimeve ndërkombëtare. Në rastet e planifikuara urdhri me shkrim i Ministrit i dërgohet KQZ 5-ditë para hyrjes në fuqi. Në rastet e veçanta kopja e urdhrit me shkrim dërgohet menjëherë ne KQZ.

6.  Ndalohet përdorimi i forcave komando dhe i forcave të tjera të ushtrisë për ruajtjen e objekteve që kanë lidhje me zgjedhjet.

7. Ndalohet gjatë gjithë fushatës zgjedhore, kryerja e ushtrimeve ose manovrave ushtarake jashtë reparteve ose vendeve të dislokimit nga forcat e ushtrisë.

8. Ndalohet përdorimi apo pjesëmarrja e punonjësve ose strukturave të SHISH-it ne ngjarjet që kanë të bëjnë me zgjedhjet apo në veprime që mund të ndikojnë në vullnetin e zgjedhësve.

DETYRAT E POLICISË SË SHTETIT NË PROCESIN ZGJEDHOR

1. Drejtori i Përgjithshëm i Policisë së Shtetit gjatë gjithë kohëzgjatjes së fushatës zgjedhore, dorëzon menjëherë në KQZ kopje të urdhërave për angazhimin e forcave të Policisë së Shtetit te angazhuara me detyra zgjedhore.

2. Drejtori i Përgjithshëm i Policisë se Shtetit gjate gjithë kohëzgjatjes se fushatës zgjedhore dorëzon menjëherë ne KQZ kopje te urdhrave për përdorimin e Forcave Speciale dhe Forcave te Ndërhyrjes së Shpejtë.

3. Në rast se KQZ-ja vlerëson se veprimtaria e forcave të Policisë së Shtetit ose të ushtrisë mund të dëmtojë apo pengojë administrimin ose zhvillimin e zgjedhjeve të lira, të drejta, demokratike dhe transparente, KQZ-ja ka të drejtë të kërkoj informacione. 

4. Institucioni përkatës është i detyruar të paraqesë menjëherë informacion për veprimet e kryera dhe marrjen e masave për zbatimin e ligjit.

5. KQZ-ja i dërgon Drejtorit të Përgjithshëm të Policisë së Shtetit 30-ditë para ditës se zgjedhjeve listën e plotë të objekteve zgjedhore dhe adresat e sakta të vendndodhjes së tyre.

6. Policia organizon ruajtjen e Qendrave të Votimit gjatë natës para ditës së votimit duke filluar nga momenti kur në Komisionin e Qëndrës së Votimit (KQV) mbërrijnë materialet zgjedhore deri në momentin kur KQV-ja fillon veprimet paraprake për çeljen e votimit.

7. Drejtori i Përgjithshëm i Policisë së Shtetit është i detyruar t’i paraqesë KQZ-së 10 ditë para datës së zgjedhjeve listën e plotë të punonjësve të ngarkuar me detyra gjatë zgjedhjeve. Ai është i detyruar të informojë menjëherë KQZ-në për çdo ndryshim në listë.

8. Për secilin nga punonjësit e përfshirë në listë, duhet të përcaktohen me shkrim, të dhënat personale (emri dhe mbiemri), grada që mban, vendvendosja e punonjësit të policisë gjatë fushatës zgjedhore dhe në ditën e votimit, emri i eprorit të drejtëpërdrejtë të tij, lloj i shërbimit të policisë ku bën pjesë, si dhe në mënyrë të detajuar rrethi i detyrave të ngarkuara.

9. KQZ-ja ruan dhe  administron informacionin e dërguar sipas pikës 7, më sipër.

10. Për problemet qe mund te lindin gjatë periudhës zgjedhore  dhe që kanë të bëjnë me sjelljen dhe qendrimin e punonjësve të Policisë së Shtetit, KZAZ-te i drejtohen Drejtorit të Policisë së Qarkut ku ndodhet KZAZ-ja dhe njoftojnë menjëherë KQZ-në. 

Ruajtja e Objekteve Zgjedhore

1. Selia e KZAZ-së ruhet nga punonjësi i Policisë së Shtetit nga momenti kur në të mbërrijnë materialet e votimit deri në datën e zgjedhjeve. Ruajtja do të bëhët prej orës 20.00 deri në orën 08.00 të ditës së nesërme.

2. Pavarësisht nga pika 1 e mësipërme, punonjësi i Policisë së Shtetit nuk e kryen shërbimin e ruajtjes së selisë së KZAZ-së gjatë kohës kur kjo e fundit është në punë.

3. Shërbimi i ruajtjes sipas pikës 1 të mësipërme fillon menjëherë me paraqitjen e kërkesës së Kryetarit të KZAZ-së. Kërkesa është me shkrim dhe i dërgohet për çdo rast, punonjësit të policisë dhe shefit të Komisariatit që mbulon Njësinë e Qeverisjes Vendore ku është vendosur zyra e KZAZ-së. Ne çdo raste kërkesa i behet me dije Drejtorit te Policisë se Qarkut.

4. Kryetari i KZAZ-së jo më vonë se 7 ditë përpara datës së zgjedhjeve i dërgon një njoftim me shkrim shefit të Komisariatit të Policisë të Njësisë të Qeverisjes Vendore, ku ndodhet zyra e KZAZ-së. Njoftimi përmban vendndodhjen e KZAZ-së dhe orarin e punës.

5. Policia organizon ruajtjen e Qëndrave të Votimit gjatë natës para ditës së votimit duke filluar nga momenti kur në KQV mbërrijnë materialet zgjedhore deri në momentin kur KQV -ja fillon veprimet paraprake për çeljen e votimit.

6. Policia organizon ruajtjen e ambientit të Vendit të Numërimit të Votave prej orës 18.00 të ditës së zgjedhjeve deri në momentin e nxjerrjes së tabelave të rezultatit nga KZAZ-ja.

7. Punonjësi i Policisë së Shtetit qëndron jashtë ambienteve të Vendit të Numërimit të Votave, sipas përcaktimit të bërë nga KZAZ-ja.

Lejimi i punonjësit të Policisë së Shtetit për tu futur në ambientet e Vendit te Numërimit të Votave (VNV)

.Gjatë procesit të numërimit të votave kur KZAZ-ja konstaton se në ambjentin e Vendit të Numërimit të Votave janë të pranishëm dhe persona të tjerë, përveç atyre të parashikuar në paragrafin e parë të nenit 121 të Kodit Zgjedhor u kërkon atyre që të largohen. Në rast refuzimi merr vendim për njoftimin e punonjësit të Policisë së Shtetit dhe mban shënim në librin e protokollit.

2. Kur në Vendin e Numërimit të Votave rrezikohet rendi, KZAZ-ja me vendim thërret organet e Policisë së Shtetit.

3. Vendimi për kërkimin e ndihmës për vendosjen e rendit i paraqitet me shkrim organeve të Policisë së Shtetit dhe përmban përshkrimin e shkurtër të shkaqeve dhe rrethanave.

4. Me marrjen e vendimit Kryetari dhe zëvendëskryetari ose çdo anëtar i KZAZ-së thërret menjëherë Policinë dhe njofton KQZ-në për incidentin e ndodhur.

5. Sapo forcat e policisë paraqiten në Vendin e Numërimit të Votave, KZAZ-ja u dorëzon atyre menjëherë përpara ndërhyrjes kopje te vendimit për thirrjen e policisë për të ndërhyre, të firmosur e vulosur nga ky komision.

6. Me rivendosjen e rendit në Vendin e Numërimit të Votave, KZAZ-ja me vendim u kërkon forcave të Policisë së Shtetit të largohen.

7. Vendimi i KZAZ-së për të ndërhyrë merret sipas modelit të miratuar dhe u bëhët i njohur më përpara punonjësve të Policisë së Shtetit.

Lejimi i punonjësit të Policisë së Shtetit për tu futur në ambjentet e Qendrës së Votimit

1. Kur në Qendrën e Votimit rrezikohet rendi ose zhvillimi i rregullt i votimit, KQV-ja pezullon votimin dhe merr vendim për thirrjen e organeve të Policisë së Shtetit. Ky vendim i njoftohet menjëherë KZAZ-së.

2. Me marrjen e vendimit, Kryetari, zëvendëskryetari ose çdo anëtar i KQV-së njofton menjëherë KZAZ-në për incidentin e ndodhur. KZAZ-ja, pasi shënon në Librin e Protokollit të Mbledhjeve njoftimin dhe orën e marrjes së vendimit, ia përcjell kërkesën menjëherë organeve të Policisë së Shtetit.

3 Vendimi për kërkimin e ndihmës për vendosjen e rendit, i paraqitet me shkrim organeve të Policisë së Shtetit dhe përmban përshkrimin e shkurtër të shkaqeve dhe rrethanave.

4. Sapo forcat e policisë paraqiten në qendrën e votimit, KQV-ja u dorëzon atyre menjëherë kopje te  vendimit për thirrjen e policisë për të ndërhyrë te firmosur e vulosur nga ky komision.

5. Me rivendosjen e rendit në qendrën e votimit, KQV-ja me vendim u kërkon forcave të Policisë së Shtetit të largohen. 

Veshja dhe armatimi i policisë

1. Punonjësit e Policisë së Shtetit, të ngarkuar me detyra zgjedhore, janë të detyruar të mbajnë uniformën gjatë ushtrimit të detyrës dhe dokumentin e identifikimit sipas modelit të përcaktuar nga KQZ-ja, në Udhëzimin nr.7,  datë 23.03.2009 “Për detyrat e Policisë së Shtetit dhe Forcave të Ushtrisë në zgjedhjet për Kuvendin 2009”.

2. Punonjësit e Policisë së Shtetit,  të ngarkuar me detyra gjatë zgjedhjeve, mbajnë vetëm armatim personal brezi (pistoletë).

3. Punonjësit e Policisë së Shtetit lejohen që, përveç armatimit personal të brezit, të mbajnë dhe automatik në rastet kur ngarkohen me ruajtjen e objekteve zgjedhore gjatë natës dhe gjate shoqërimit të kutive të votimit nga Qendra e Votimit në Vendin e Numërimit të Votave, me përjashtim të rastit kur janë ngarkuar të ruajnë godinën ku është caktuar V.N.V-ja. 

Lëvizjet e policisë

1. Qarkullimi i forcave të policisë te ngarkuara me detyra zgjedhore, bëhet vetëm me mjete policie dhe vetëm në rast se kërkohet ndërhyrja e tyre respektivisht nga KQZ-ja, KZAZ-ja ose nga KQV-ja.

2. Mjetet e përdorura prej policisë, me targa civile, duhet të kenë shenja dalluese që tregojnë se ato janë ngarkuar me detyra në funksion të zgjedhjeve. Targat civile e shenjat dalluese bëhen me dije ne KQZ jo me vone se 10-dite përpara ditës se zgjedhjeve.

 Vendqëndrimi i policisë

1. Punonjësit e forcave të policisë që ngarkohen me detyra gjatë zgjedhjeve, me përjashtim të atyre që merren me ruajtjen e objekteve zgjedhore, në 24 orët para ditës së zgjedhjeve dhe në ditën e zgjedhjeve, qëndrojnë brenda komisariateve ose në vende dislokimi larg qendrave të banuara.

2. Asnjë person i armatosur, duke përfshirë edhe forcat e policisë dhe ushtarakët, nuk lejohet të qëndrojë apo të hyjë në ambientet zgjedhore.

3. Përjashtohen nga përcaktimi i bërë në pikën 2 (të mësipërme), rastet kur prania e forcave të policisë kërkohet përkatësisht nga KZAZ-ja ose nga KQV-ja, si dhe në rastin e prezencës së punonjësve të policisë së burgjeve brenda territorit të burgut ose vendit të paraburgimit, ku është ngritur qendra e posaçme e votimit.

Shoqerimi i kutive të votimit dhe i materialeve zgjedhore

1. Me mbylljen e votimit Kryetari i KQV-së njofton komisariatin e policisë dhe KZAZ-në duke i kërkuar të dërgojë në KQV punonjësin e policisë i cili është efektiv i përhershëm i Policisë se Shtetit, përjashtuar policinë kriminale (Departamentin e Hetimit te Krimeve), që do të shoqerojë kutitë e votimit dhe kutinë e materialeve zgjedhore.

2. Punonjësi i policisë paraqitet në kohën e caktuar nga KQV dhe pret në hyrje të saj, derisa të dalin anëtarët dhe sekretari së bashku me kutitë e votimit dhe kutinë e materialeve zgjedhore.

3. Shoqerimi i kutive të votimit dhe i kutisë së materialeve zgjedhore nga KQV-ja në Vendin e Numërimit të Votave bëhet me automjet në të cilin ndodhen anëtarët e KQV-së, sekretari i KQV-së dhe një punonjës i Policisë së Shtetit.

4. Gjatë shoqërimit kutia dhe materialet e tjera zgjedhore, administrohen vetëm prej Kryetarit, Zëvendëskryetarit dhe anëtarve të KQV-së. Punonjësi i forcave te policisë nuk ka të drejtë në asnjë rast, që të posedojë, apo të ketë kontakt, me materialet e mësipërme.

5. Punonjësi i policisë, i ngarkuar me detyrën e shoqërimit të kutive të votimit dhe kutisë së materialeve zgjedhore nga Qendra e Votimit në VNV, garanton shoqërimin dhe mos prekjen e kutive të votimit nga të tretët.

6. Punonjësi i Policisë i ngarkuar me shoqërimin e kutive te votimit dhe materialeve zgjedhore, sipas pikës 3, 4 të mësipërme për çdo parregullsi të konstatuar gjatë procesit të shoqërimit nga KQV-ja në VNV përpilon një raport shërbimi si dhe informon njëkohësisht eprorin e tij dhe ky i fundit njofton shefin e komisariatit të policisë dhe KZAZ-në.

7. Pas procesit të dorëzimit të materialeve zgjedhore, punonjësi i policisë firmos procesverbalin e marrjes në dorëzim, sipas modelit të miratuar nga KQZ-ja, merr një kopje të procesverbalit dhe largohet menjëherë nga ndërtesa e KZAZ-së. Procesverbali së bashku me raportin e shërbimit, dorëzohen në komandën e strukturës ku punonjësi i policisë bën pjesë. 

PËRGJEGJËSITË DHE SANKSIONET

Përgjegjësia e personave të ngarkuar me administrimin e zgjedhjeve

 1. Anëtarët e komisioneve të zgjedhjeve dhe nënpunësit e administratës publike në shërbim të këtyre komisioneve mbajnë përgjegjësi penale dhe administrative, sipas legjislacionit në fuqi për shkeljen e dispozitave të Kodit Zgjedhor.

2. Braktisja e detyrës, pa shkaqe të ligjshme, nga anëtarët e komisioneve të zgjedhjeve, anëtarët e grupeve të numërimit apo vëzhguesit përbën kundërvajtje penale dhe dënohet me gjobë ose heqje lirie nga 6 muaj deri në 2 vjet.

 Sanksione administrative

 1. Shkelja e dispozitave të Kodit Zgjedhor nga anëtarët e komisioneve të zgjedhjeve ose nga persona të ngarkuar me detyra, sipas Kodit Zgjedhor, kur nuk përbën vepër penale, dënohet me gjobë nga 3 000 deri në 90 000 lekë.

2. Shkeljet e tjera të dispozitave të Kodit Zgjedhor, kur nuk përbëjnë vepër penale, dënohen me gjobë nga 1 000 deri në 2 500 lekë.

3. Shkelja e rregullave të përcaktuara në nenet 34 dhe 41 të Kodit Zgjedhor, përkatësisht nga sekretari i KZAZ-së ose KQV-së, dënohet me gjobë nga 30 000 deri në 60 000 lekë ose me burgim deri në 6 muaj.

4. Personat e ngarkuar nga Kodi Zgjedhor, me përgatitjen dhe miratimin e listave të zgjedhësve, kur përfshijnë në këto lista të dhëna të rreme ose kur lënë pa përfshirë zgjedhës, përgjigjen penalisht në bazë të nenit 186 të Kodit Penal.

5. Shkelja e rregullave të tjera dhe afateve të parashikuara në Pjesën II të Kodit Zgjedhor, kur nuk përbën shpërdorim të detyrës, sipas nenit 248 të Kodit Penal, dënohet me gjobë nga 10 000 deri në 100 000 lekë. Gjoba vendoset nga titullari i institucionit, përbën titull ekzekutiv dhe ekzekutohet nga zyra përkatëse e financës.

 Sanksionet për shkelje të parimeve të Kodit Zgjedhor 

1. Shkelja e ndonjërit nga parimet e përgjithshme të përcaktuara  në nenet 3, 4 ose 5 të Kodit Zgjedhor, në rastet kur kjo shkelje nuk ka ndikuar në rezultatin e zgjedhjeve, përbën kundravajtje administrative dhe dënohet me gjobë nga 100 000 deri në 500 000 lekë.

2. Masa e gjobës përcaktohet në varësi nga rrethanat e mëposhtme:

    a) rreziku që formon shkelja për zhvillimin dhe administrimin e zgjedhjeve në të ardhmen;

    b) fakti nëse autori i shkeljes ka përfituar nga shkelja materialisht ose nëpërmjet shkeljes ka ndikuar në marrjen e mandatit nga kandidati, partia politike apo koalicioni;

    c) kohëzgjatja dhe rrethi i veprimeve që kanë çuar në kryerjen e shkeljes;

    ç) fakti nëse ka pasur përpjekje për fshehjen e shkeljes dhe në ç’shkallë kanë qenë to;

    d) qëndrimi i autorit të shkeljes pas zbulimit të saj;

dh) fakti nëse në kryerjen e shkeljes kanë marrë pjesë persona zyrtarë ose janë shfrytëzuar burime publike;

    e) fakti nëse shkelja është përsëritur;

    ë) fakti nëse është kryer në bashkëpunim;

    f) rreziku potencial ndaj zgjedhjeve të lira, të drejta, demokratike dhe transparente.

3. Gjobat, sipas pikës 1 të mësipërme, vihen nga KQZ-ja.

4. Shkeljet, sipas pikës 1 të mësipërme, kur kanë ndikuar në rezultatin e zgjedhjeve, përbëjnë kundërvajtje penale dhe dënohen me burgim nga 6 muaj deri në 2 vjet.

Ekzekutimi i sanksioneve administrative 

1. Gjoba e vendosur nga KQZ-ja, sipas kësaj pjese, përbën titull ekzekutiv dhe ekzekutohet sipas procedurave të parashikuara në nenin 510 të Kodit të Procedurës Civile. 

Pengimi i subjekteve për zgjedhjet në organet përfaqësuese

 Pengimi me dhunë apo me çdo mënyrë tjetër i subjekteve elektorale për të zhvilluar rregullisht aktivitetin e tyre në përputhje me ligjin gjatë fushatës së zgjedhjeve, dënohet me gjobë ose me burgim deri në tre vjet. (Neni 325 i K.P)

Kanosja e zgjedhësit

 Kanosja që i bëhet zgjedhësit për të votuar pro ose kundër një kandidati, si dhe për të marrë pjesë ose jo në votime, përbën kundravajtje penale dhe dënohet me gjobë ose burgim gjer në dy vjet. (Neni 329 i Kodit Penal)

 Kanosja e kandidatit

Kanosja si dhe çdo veprim tjetër i paligjshëm që i bëhet kandidatit me qellim që të tërheq kandidaturën ose që të pengohet për të ushtruar çdo aktivitet të lejuar me ligj gjatë fushatës elektorale, përbën kundravajtje penale dhe dënohet me gjobë ose me burgim gjer në dy vjet. (Neni 330 i Kodit Penal)