Qendra SECI për luftën ndaj krimit ndërkufitar ka vlerësuar me çertifikatë Policinë Shqiptare në shenjë mirënjohje për rezultatet mjaft domethënëse në përmbushjen e përgjegjësive në zbatimin e ligjit për luftën ndaj krimit ndërkufitar. Kjo çertifikatë vlerësimi i është dorëzuar Zv/Ministrit të Brendshëm, Z.Gjergj Lezhja, më 26 maj gjatë takimit të 23-të të Komitetit të Përbashkët Drejtues të Qendrës SECI.

Qendra SECI në veçanti ka vlerësuar Drejtorinë e luftës kundër krimit të organizuar dhe mbrojtjes së dëshmitarëve për bashkëpunimin operacional në kuadër të kësaj Qendre:

“Për operacion të suksesshëm në shkatërrimin e organizatave kriminale të përfshira në trafikun e armëve dhe eksplozivëve në Europën Juglindore.”

Në këtë kontekst në ambjentet e Ministrisë së Brendshme është organizuar ceremonia e dorëzimit të kësaj çertifikate Policisë Shqiptare. Në këtë ceremoni merrte pjesë Zv/Ministri i Brendshëm Z.Gjergj Lezhja, Drejtori i Përgjithshëm i Policisë së Shtetit, Drejtues bajram Ibraj, Drejtori i luftës kundër krimit të organizuar e mbrojtjes së dëshmitarëve, Kryekomisar Kostaq Beluri, Nënkryetari i Komitetit të Përbashkët Drejtues të Qendrës SECI, Z.Agron Sojati, etj.

Gjatë ceremonisë së zhvilluar me këtë rast Zv/Ministri i Brendshëm vlerësoi rezultatet e arritura nga Policia Shqiptare në luftën ndaj krimit, e në mënyrë të veçantë kontributin e dhënë dhe në nivel Rajonal në goditjen e krimit të organizuar. Po ashtu Z.Lezhja vlerësoi dhe rolin e përfaqësuesit të Shqipërisë pranë Qendrës SECI, Z.Agron Sojati, i cili njëkohësisht është dhe drejtuesi aktual i taskforcës së trafikut të armëve në kuadër të SECI-it.

Ndërkohë Drejtori i Përgjithshëm i Policisë së Shtetit Drejtues Bajram Ibraj garantoi dhe një herë impenjimin maksimal të strukturave policore për të goditur pa asnjë kompromis krimin.

Qendra SECI për luftën ndaj krimit ndërkufitar në vazhdimësi ka shprehur vlerësimet e saj për punën e bërë nga Policia e Shtetit për goditjen e krimit ndërkufitar dhe për bashkëpunimin e shkëlqyer në operacionet e koordinuara nga kjo Qendër. Konkretisht:

- Më 9 shkurt 2004 Qendra SECI ka vlerësuar Shqipërinë për rezultatet e arritura në kuadër të operacionit Mirazh 2003, për goditjen e trafikut të qënieve njerëzore. Në këtë kontekst ekperienca shqiptare në zbatim të operacionit “Mirazh 2003” u vlerësua si eksperienca më pozitive në goditjen, dërgimin para drejtësisë të autorëve të veprave të ndryshme penale, si dhe të sekuestrimit të pasurive me burim financiar krimin e organizuar.

- Më 5 Korrik 2004 është vlerësuar Komisariati i Policisë së Portit Detar Durrës për rezultatet e arritura në goditjen e krimit ndërkufitar.

- Më 9 janar 2006 sërish është vlerësuar Policia Shqiptare dhe veçanërisht Drejtoria e luftës kundër krimit të organizuar dhe mbrojtjes së dëshmitarëve për përpjekjet dhe kontributin e vazhdueshëm që ka dhënë në goditjen e krimit ndërkufitar.

Drejtoria e Përgjithshme e Policisë së Shtetit