Qendra Rajonale për Luftën ndaj Krimit Ndërkufitar, pranë Qendrës SECI në Bukuresht, i ka dhënë Policisë së Shtetit një Fletë-Nderi si “shenjë mirënjohje për rezultatet mjaft domethënëse në përmbushjen e përgjegjësive në zbatimin e ligjit për luftën ndaj krimit ndërkufitar”.

Në këtë Fletë-Nderi shprehen falenderime dhe vlerësime dhe për Drejtorinë e Luftës ndaj Krimit të Organizuar pranë Drejtorisë së Përgjithshme të Policisë së Shtetit për përpjekjet dhe kontributin e vazhdueshëm që ka dhënë në këtë drejtim.

Zv/Drejtori i Qendrës SECI, Gjeneral Alexandru Ionas, në letrën drejtuar me këtë rast Drejtorit të Përgjithshëm të Policisë së Shtetit, Drejtues Bajram Ibraj, ka shprehur vlerësimet e Qendrës SECI për përpjekjet e Policisë së Shtetit për luftimin e krimit ndërkufitar dhe për bashkëpunimin e shkëlqyer në operacionet e koordinuara nga kjo Qendër.

Duke shprehur bindjen se përpjekjet e përbashkëta për përballimin e pengesave për të arritur stabilitet dhe siguri në Europën Juglindore do të vazhdojnë, Gjeneral Ionas thekson:

“Nuk ka asnjë dyshim që veprimet e koordinuara dhe zbatimi me efektshmëri i ligjit në të gjitha nivelet janë jetësorë për një luftë efikase kundër krimit të organizuar ndër-kufitar, për këtë arsye, është mjaft i rëndësishëm një bashkëpunim i qëndrueshëm ndërmjet Policisë së Shtetit dhe Qendrës SECI për arritjen e qëllimeve të përbashkëta.”

Ndërkohë falenderime Policisë së Shtetit i kanë ardhur dhe nga Komandanti i Grupit Special Operativ të Armës së Karabinierëve Gjeneral Giampaolo Ganzer, lidhur me zhvillimin e operacionit HAREM në Shqipëri. Ndër të tjera Gjeneral Ganzer shprehet :

“Në pëfundim të një faze veçanërisht shumë domethënëse të hetimit HAREM, i cili përfshiu impenjimin e përbashkët të dy vendeve tona në luftë kundër mafias, trafikut të qënieve njerëzore dhe trafikut ndërkombëtar të armëve dhe drogës, dëshiroj t’Ju bëj falenderimet më të sinqerta në lidhje me bashkëpunimin tërësor dhe mjaft të dobishëm tek i cili Karabienierët e R.O.S. u mbështetën në Shqipëri, falë dhe bashkëpunimit dhe besimit që na dhatë Ju.

Rezultati i shkëlqyer operativ i njohur dhe vlerësuar nga drejtuesit e institucioneve të të dy vendeve tona nuk do të ishte bërë i mundur pa bashkërendimin e qëllimeve dhe përpjekjeve të njerëzve që kanë vepruar në terren, duke përballuar së bashku rreziqe, vështirësi dhe sakrifica për të mundur armiq kaq të frikshëm.”

Komandanti i Grupit Special Operativ të Armës së Karabinierëve ka vlerësuar gjithashtu punën e bërë nga Drejtoria e Luftës kundër Krimit të Organizuar e Mbrojtjes së Dëshmitarëve gjatë këtij operacioni.

Drejtoria e Përgjithshme e Policisë së Shtetit